କଥା କହିପାରୁନଥିବା ଜୀବଜନ୍ତୁଙ୍କ ମନର କଥା ବୁଝୁଛି ଅନନ୍ୟା

ଟାଇଁ ଟାଇଁ ଖରାରେ ବାହାରକୁ ବାହାରିଲେ ମୁଁହ ପୋଡି ଯାଉଛି l ପାରଦ ପୁରା ଉପରେ l ହେଲେ ଏହି ଅସହ୍ୟ ଖରାରେ ରାସ୍ତାର ତତଲା ପିଚୁରେ ହାତ କୁ ହାତ ଧରା ଧରି ହୋଇ ଚାଲିଛନ୍ତି ଏକ ଯୁବ ଗୋଷ୍ଠୀ l ଏମାନଙ୍କ ଲକ୍ଷ୍ୟ ହେଉଛି ପରିବେଶ ସେବା l ଏକ ସ୍ୱତନ୍ତ୍ର ଚିନ୍ତାଧାରାରେ ନିମଗ୍ନ ଏହି ଯୁବ ଗୋଷ୍ଠୀଙ୍କ କାମକୁ ଦେଖିଲେ ସମସ୍ତଙ୍କ ମୁହଁରୁ ପ୍ରଶଂସାର ସୁଅ ଛୁଟୁଛି । ତାତି କୁ ଖାତିର ନ କରି ସେମାନେ ବାହାରିଛନ୍ତି ସେବା ପାଇଁ l

ନୟାଗଡ଼ର ପ୍ରମୁଖ ସ୍ୱେଚ୍ଛାସେବୀ ଯୁବ ଗୋଷ୍ଠୀ ‘ଅନନ୍ୟା ଫାଉଣ୍ଡେସନ’ର ସ୍ୱେଚ୍ଛାସେବୀ ମାନେ ବାଲଟି, ମଗ ପୁରୁଣା ପ୍ଲାଷ୍ଟିକ ଡବା ଆଉ ସଚେତନତା ଉଦେଶ୍ୟରେ ପୋଷ୍ଟର ଧରି ରାସ୍ତାକଡ଼ରେ ଥିବା ଗଛ ମାନଙ୍କରେ ପକ୍ଷୀ ମାନଙ୍କ ତୃଷ୍ଣା ନିବାରଣ ପାଇଁ ଖୋଲିଛନ୍ତି ଜଳଛତ୍ର l ସରକାର ଲୋକମାନଙ୍କ ପାଇଁ ଜଳଛତ୍ର ଖୋଲିଥିବା ବେଳେ ଏମାନେ ପକ୍ଷୀଙ୍କ ମନ ର କଥା ବୁଝିଛନ୍ତି l ଅବ୍ୟବହୃତ ପ୍ଲାଷ୍ଟିକ ବଟଲକୁ କାଟି ତାର ଉପର ମୁଣ୍ଡ କୁ କଣା କରି ଲୁହା ତାର ରେ ଗଛରେ ଓହଳାଇ ଦେଉଛନ୍ତି l ଏବଂ ସେଥିରେ ପାଣି ବି ଭରି ଦେଉଛନ୍ତି l ଗୋଟିଏ କି ଯୋଡିଏ ନୁହେଁ ବରଂ ଶହ ଶହ ଗଛରେ କରିଛନ୍ତି ଏହି ବ୍ୟବସ୍ଥା l ଜିଲ୍ଲାର ବିଭିନ୍ନ ରାସ୍ତା କଡ଼ ରେ ଲଗାଇଛନ୍ତି ଜଳଛତ୍ର l

ଖାଲି ସେତିକି ନୁହେଁ ପାଣି ସରିଗଲେ ଗଛରେ ଲାଗିଥିବା ଏହି ଡବା କୁ ସଫାକରି ନୂଆ ପାଣି ମଧ୍ୟ ଭରୁଛନ୍ତି l ଗତ ମାସେ ହେଲା ନିୟମିତ ଏହିଭଳି କାମ ଚଳାଇଛନ୍ତି ଅନନ୍ୟା ଫାଉଣ୍ଡେସନର ମୁଖ୍ୟ ଆଶୁତୋଷ ଦାସ ଏବଂ ତାଙ୍କ ସାଥି ସ୍ୱେଚ୍ଛାସେବୀ ମାନେ l ଏମାନଙ୍କ କାମକୁ ଯିଏ ବି ଦେଖୁଛି ପ୍ରଶଂସା ନ କରି ରହି ପାରୁନି l ଯେତେବେଳେ ସ୍ୱାର୍ଥପର ମଣିଷଟି ନିଜ ବିଷୟରେ ଅହରହ ଚିନ୍ତାକରେ, ସେତେବେଳେ ଏହି ଯୁବ ଗୋଷ୍ଠୀ ନିରୀହ ପକ୍ଷୀର ଆତ୍ମକଥାକୁ ବୁଝିଛନ୍ତି l

କଥା କହି ପାରୁ ନ ଥିବା ଜୀବଜନ୍ତୁଙ୍କ ମନର ଭାଷାକୁ ପଢ଼ିଛନ୍ତି ଅନନ୍ୟା ଫାଉଣ୍ତେସନ୍‌ର କର୍ମକର୍ତ୍ତାମାନେ l ତେଣୁ ଏମାନଙ୍କ ପାଇଁ ସବୁଆଡୁ ଛୁଟୁଛି ପ୍ରଶଂସାର ସୁଅ l