ଯୁଆଡ଼େ ଚାହିଁଲେ ସିଆଡ଼େ ଖାଲି ପାଣି ଆଉ ପାଣି...ଘର ଭିତରେ ପାଣି ପଶିବାରୁ ଜିନିଷପତ୍ର ନଷ୍ଟ

ପ୍ରବଳ ବର୍ଷାରେ ରାଜଧାନୀ ଭୁବନେଶ୍ୱରର ସ୍ଥିତି ବେହାଲ। ଆଇଗିଣିଆ ସ୍ଥିତ ରାଜୀବନଗର ଅଞ୍ଚଳରେ ଗତକାଲି ପ୍ରବଳ ବର୍ଷାରେ ଘରଦ୍ୱାରରେ ୪ ଫୁଟ ଉଚ୍ଚର ପାଣି ପଶିଯାଇଥିଲା। ଫଳରେ ଲୋକଙ୍କ ଆସବାବପତ୍ରଠୁ ଆରମ୍ଭ କରି ଦୋକାନରେ ଥିବା ସାମଗ୍ରୀ ସମ୍ପୂର୍ଣ୍ଣ ନଷ୍ଟ ହୋଇଯାଇଛି ।

ବର୍ଷା ପାଣି ଭିତରୁ ଏବେ ଲୋକେ ନିଜ ନିଜର ସାମଗ୍ରୀ ଖୋଜୁଛନ୍ତି। କେମିତି ପୁଣି ସ୍ଥିତି ସ୍ୱାଭାବିକ ହେବ ସେନେଇ ସ୍ଥାନୀୟ ଅଞ୍ଚଳର ଲୋକେ ଚିନ୍ତାରେ। କେବଳ ଘର ଓ ଦୋକାନ ସାମଗ୍ରୀ ନୁହେଁ ଲୋକଙ୍କ ଗାଡ଼ି ମଧ୍ୟ ପାଣିରେ ବୁଡ଼ିଯାଇଥିଲା । ଫଳରେ ଗାଡ଼ି ଗୁଡ଼ିକ ନଷ୍ଟ ହୋଇଯାଇଛି ।

ସେପଟେ ଖଣ୍ଡଗିରି ଅଞ୍ଚଳରେ ବି ଲୋକଙ୍କ ଅବସ୍ଥା ସଂଗୀନ । ଲେନ୍‌ ୨ ଅଞ୍ଚଳରେ ରାସ୍ତା ଉପରେ ପାଣିର ସୁଅ ଛୁଟିବା ସହ ଲୋକଙ୍କ ଘରେ ପାଣି ପଶି ଯାଇଛି । ଫଳରେ ଲୋକେ ନାହିଁ ନଥିବା ଅସୁବିଧା ଭୋଗୁଛନ୍ତି । ଜାଗମରା ଜଗମୋହନ ନଗର ଅଞ୍ଚଳରେ ବି ଦୟନୀୟ ସ୍ଥତି ଦେଖିବାକୁ ମିଳିଛି।

ଘରେ ପାଣି ଓ ରାସ୍ତାରେ ପାଣି ଚାଲିବାରୁ ଲୋକେ ସାରା ରାତି ଅନିଦ୍ରା ହୋଇ ବସିଛନ୍ତି। ରାଜଧାନୀ ଭୁବନେଶ୍ୱରରେ ଏଭଳି ସ୍ଥିତି ଲୋକଙ୍କୁ କଲବଲ କରିଛି।