ଭୁବନେଶ୍ୱର: ପାଇକ ବିଦ୍ରୋହକୁ ପ୍ରଥମ ସ୍ୱାଧୀନତା ସଂଗ୍ରାମର ମାନ୍ୟତା ଓ ବରୁଣେଇରେ ପାଇକ ସ୍ମାରକୀ ପାଇଁ ବିନା ମୂଲ୍ୟରେ ଜମି ଯୋଗାଇ ଦେବା ଦାବିରେ ବିରାଟ ପାଇକ ଆନ୍ଦୋଳନ ହୋଇଛି। ବୀର ପାଇକ ସଂଗଠନର ସଭାପତି ପ୍ରକାଶ ଶ୍ରୀଚନ୍ଦନଙ୍କ ନେତୃତ୍ୱରେ ଶହ ଶହ ପାଇକ ଖୋର୍ଦ୍ଧାର ବରୁଣେଇ ପୀଠରୁ ପାରମ୍ପରିକ ବେଶରେ ଆସି ରାଜଧାନୀ ଭୁବନେଶ୍ୱରରେ ବିରାଟ ସମାବେଶ କରିଥିଲେ।
ରାମ ମନ୍ଦିର ନିକଟରୁ ଏକ ବିରାଟ ଶୋଭାଯାତ୍ରା ବାହାରି ଥିଲା। ପାଇକ ଆଖଡ଼ା ନୃତ୍ୟ ସହିତ ଏହି ଶୋଭାଯାତ୍ରା ମାଷ୍ଟର କ୍ୟାଣ୍ଟିନ ଦେଇ ଏକାମ୍ର ହାଟ ସମ୍ମୁଖରେ ପହଞ୍ଚିବା ପରେ ସମାବେଶ କରାଯାଇଥିଲା। ଏଥିରେ ୨ ଶହ ପାଇକ ଆଖଡ଼ା ଦଳ, ଦଳେଇ ଓ ଦଳବେହେରା ଓ ପାଇକ ସର୍ଦ୍ଦାର ଯୋଗ ଦେଇଥିଲେ।
ଦାବି ପୂରଣ ନ ହେଲେ ଆନ୍ଦୋଳନ ଜୋରଦାର କରାଯିବ ବୋଲି ସେମାନେ କହିଛନ୍ତି। ସେପଟେ ଜମି ଯୋଗାଇବା ଲାଗି ସରକାରୀ ନିୟମ ଅନୁସାରେ, ଲିଜ୍ ନେବାକୁ ପଡିଥାଏ। କେନ୍ଦ୍ର ସରକାରଙ୍କ ସଂସ୍କୃତି ଓ ପର୍ଯ୍ୟଟନ ବିଭାଗ ପକ୍ଷରୁ ୨ ଦିନ ପୂର୍ବରୁ ଏକ ଚିଠି ଆସିଛି। ନିୟମ ପ୍ରକାରେ ଫର୍ମ ପୂରଣ ହେବା ପରେ ଜମି ଯୋଗାଣ ପ୍ରକ୍ରିୟା ଆରମ୍ଭ ହେବ ବୋଲି ଖୋର୍ଦ୍ଧା ଜିଲ୍ଲାପାଳ କହିଛନ୍ତି।