ସରକାରୀ ବିହନକୁ ଭରସା କରି ଚାଷୀ ହତାଶ : ଗାଈଗୋରୁଙ୍କ ଚରା ଭୂଇଁ ପାଲଟିଛି ବିରି କ୍ଷେତ

ଆନନ୍ଦପୁର,କୋରାପୁଟ(ପ୍ରଣୟ ପାମି ଓ ସୂର୍ଯ୍ୟ ନାରାୟଣ ପଣ୍ଡା) : ଧୋକାଦେଲା ସରକାରୀ ବିରି ବିହନ । ସରକାରୀ ବିହନକୁ ଭରସା କରି ସର୍ବସ୍ୱ ହରାଇଲା ଚାଷୀ । ବିରି ବୁଣିବା ପରେ ଭଲ ଗଛ ହେଲା, ହେଲେ ଗଛରେ ନା ଧରିଲା ଫୁଲ ନା ଫଳିଲା ଫଳ । କେନ୍ଦୁଝର ଜିଲ୍ଲା ଆନନ୍ଦପୁର ଉପଖଣ୍ଡ ସରେଇଁ ଗାରୁ ଆସିଛି ଏଭଲି ଅଭିଯୋଗ । ସେପଟେ କୋରାପୁଟ ଜିଲ୍ଲାରେ ଏବର୍ଷ ଭଲ ଆଳୁ ଫସଲ ହୋଇଛି, ହେଲେ ବଜାରରେ ଚାହିଦା ନଥିବାରୁ ଏବେ ହତାଶ ହୋଇଛନ୍ତି ଆଦିବାସୀ ଚାଷୀ ।

ଆନନ୍ଦପୁର ଉପଖଣ୍ଡ ସରେଇଁ ଗାଁରେ ସବୁଜ ବର୍ଣ୍ଣରେ ଭରି ରହିଛି । ଦୂରରୁ ଦେଖିଲେ ପେଟ ପୁରୁଛି, ହେଲେ ଅସଲି ଚିତ୍ର ଚାଷୀଙ୍କ ପେଟକୁ ନାତ ମାରିଛି । ବିରି ଫସଲ ଚଳିତ ବର୍ଷ ଆରମ୍ଭରୁ ବର୍ଷା ଅଭାବରୁ ଚାଷୀ ଧାନ ଚାଷରେ କ୍ଷତି ସହିଥିଲେ, ଏହାପରେ ଏହାକୁ ଭରଣା କରିବା ଲାଗି ବିରି ଚାଷ କରିବାକୁ ଅଣ୍ଟା ଭିଡିଥିଲେ । ସରକାରୀ ବିହନ ଆଣି କ୍ଷେତରେ ବୁଣିଲେ, ଭଲ ଗଛ ବି ହେଲା, ହେଲେ ଗଛରେ ନା ଆସିଲା ଫୁଲ ନା ଧରିଲା ଫଳ । ସମୟାନୁସାରେ ବିରି ଉତ୍ପାଦନ ନହେବାରୁ ଏବେ ଗାଈ ଗୋରୁଙ୍କ ଚରା ଭୂଇଁ ପାଲଟିଛି ବିରି କ୍ଷେତ । ସେପଟେ ବିରି ବିହନର ନୂତନ କିସମ ଭଲ ଥିଲା, ଚାଷୀମାନେ ସଠିକ ରକ୍ଷଣାବେକ୍ଷଣ କରି ନପାରିବାରୁ ଏଭଳି ହୋଇଥିବା କହିଛନ୍ତି ଘଷିପୁରା କୃଷି ଅଧିକାରୀ ।

ସେପଟେ କୋରାପୁଟ ଜିଲ୍ଲାରେ ଦେଖିବାକୁ ମିଳିଛି ଭିନ୍ନ ଦୃଶ୍ୟ । ଚଳିତ ବର୍ଷ ଉପାନ୍ତ ଓ ପାହାଡ଼ଇା ଅଞ୍ଚଳରେ ହୋଇଛି ଭଳ ଅଳୁ ଫସଲ ଦେଶୀ ଆଳୁ ଠାରୁ ଆରମ୍ଭ କରି ନାଲି ଆଳୁ ଆଉ ଛୋଟ ଆଳୁ ଭଲ ଉତ୍ପାଦନ ହୋଇଛି । ହେଲେ ବଜାରରେ ମିଳୁନି ସଠିକ୍ ଦର । ଚାହିଦା କମିଥିବାରୁ ଆଳୁ କିଲୋ ପିଛା ୮ ଟଙ୍କାରେ ବିକିବାକୁ ବାଧ୍ୟ ହେଉଛି ଚାଷୀ । ଚଳିତ ବର୍ଷ ଚାଷୀ ପଞ୍ଜାବ ଓ କୋଲକାତାରୁ ବିହନ ଆଣି ଚାଷ କରିଥିବାରୁ ଭଲ ଫତ୍ପାଦନ ହୋଇଛି । ହେଲେ ଆଳୁ ଗଚ୍ଛିତ ରଖିବାକୁ ଭିତ୍ତଭୂମୀ ନଥିବାରୁ ଏଭଳି ସ୍ଥିତି ଉପୁଜିଛି । ସେପଟେ ଚାଷୀଙ୍କ ଆଳୁବିକ୍ରି ଲାଗି ଶୀଘ୍ର ବଜାରିକରଣ ବ୍ୟବସ୍ଥା ହେବ ବୋଲି କହିଛନ୍ତି ଅତିରିକ୍ତ ଉଦ୍ୟାନ କୃଷି ଉପ ନିର୍ଦ୍ଦେଶକ ।

ଗୋଟିଏ ପଟେ ଆନନ୍ଦପୁର ବ୍ଲକରେ ବିରି ଚାଷରେ ଚାଷୀଙ୍କ କ୍ଷତି ତ ଅନ୍ୟପଟେ ଭଲ ଉତ୍ପାଦନ ପରେ ବି କୋରାପୁଟିଆ ଆଳୁ ଚାଷୀଙ୍କୁ ମିଳୁନି ଉପଯୁକ୍ତ ମୂଲ୍ୟ । ଏଭଳି ସ୍ଥିତିରେ ଚାଷୀଙ୍କୁ ସହାୟକ ହେବା ଭଳି ପଦକ୍ଷେପ ନେବା ନିତାନ୍ତ ଆବଶ୍ୟକ ।