ମଦ୍ୟପାନ କରି ଚଲାଉଥିଲେ ବସ୍‌; ଡ୍ରାଇଭରକୁ କାବୁ କଲା ପୋଲିସ

ମହଙ୍ଗା ପଡିଲା ମଦ୍ୟପାନ କରି ବସ ଚଲାଇବା । କଟକରୁ ତାଳଚେର ଯାଉଥିବା ଗାଡ଼ିକୁ ଅଟକାଇ ପୋଲିସ ଗାଡ଼ି ଡ୍ରାଇଭରର ଯାଞ୍ଚ କରିଥିଲା । ଏହାସହ ବସରେ ଥିବା ସମସ୍ତ ଯାତ୍ରୀଙ୍କୁ ଅନ୍ୟ ଏକ ବସ ଯୋଗେ ତାଳଚେରକୁ ପଠାଯାଇଥିବାବେଳେ ଘଟଣାରେ ଡ୍ରାଇଭର ଅଟକ ହୋଇଥିବା ଜଣାପଡ଼ିଛି ।

ସୂଚନା ଅନୁସାରେ, ୫୫ ନମ୍ବର ଜାତୀୟ ରାଜପଥ ଦେଇ ଏକ ବସ୍‌ କଟକରୁ ତାଳଚେର ଯାଉଥିଲା । କୌଣସି ଏକ ସୂତ୍ରରୁ ଖବର ପାଇ ଢେଙ୍କାନାଳ ଟାଉନ ଥାନା ପୋଲିସ ଅଧାବାଟରେ ବସକୁ ଜବତ କରିବା ସହ ମଦ୍ୟପ ଡ୍ରାଇଭରକୁ ଅଟକ ରଖି ପୋଲିସ ପଚରା ଉଚରା କରୁଛି । ଏହାସହ ବସରେ ଥିବା ସମସ୍ତ ଯାତ୍ରୀଙ୍କୁ ଅନ୍ୟ ଏକ ବସ ଯୋଗେ ତାଳଚେରକୁ ପଠାଯାଇଛି ।

ତେବେ ନିଜେ ମଦ୍ୟପାନ କରି ଗାଡି ଚଳାଉଥିବା କଥାକୁ ମଦ୍ୟପ ଡ୍ରାଇଭର ସ୍ୱୀକାର କରିଛି । ଘଟଣାକୁ ନେଇ ଢେଙ୍କାନାଳ ଟାଉନଥାନା ପୋଲିସ ଅଧିକ ତଦନ୍ତ ଜାରି ରଖିଛି ।