ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଅନ୍ଧାରୀ ଚିକିତ୍ସା : ଟର୍ଚ୍ଚ ଲାଇଟରେ ଚାଲିଛି ରୋଗୀ ସେବା

ରାଜ୍ୟ ସରକାର ସ୍ୱାସ୍ଥ୍ୟ ସେବା ପାଇଁ କୋଟି କୋଟି ଟଙ୍କା ଖର୍ଚ୍ଚ କରୁଥିବା ବେଳେ ରୋଗୀମାନେ କେମିତି ଉତ୍ତମ ସ୍ୱାସ୍ଥ୍ୟ ପାଇପାରିବେ ସେନେଇ ଯୋଜନା ଉପରେ ଯୋଜନା କରୁଛନ୍ତି । ହେଲେ ବରଗଡ଼ ସହର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ସ୍ୱାସ୍ଥ୍ୟସେବାର ବିକଳ ଚିତ୍ର ଦେଖିବାକୁ ମିଳିଛି । ଏଠାରେ ଟର୍ଚ୍ଚ ଲାଇଟରେ ଚାଲିଛି ରୋଗୀ ସେବା । ଘଣ୍ଟା ଘଣ୍ଟା ଧରି ପାୱାରକଟ ଯୋଗୁଁ ବିଦ୍ୟୁତ ସରବରାହ ବାଧାପ୍ରାପ୍ତ ହୋଇଥିବା ବେଳେ ଏଭଳି ଢଙ୍ଗରେ ଅନ୍ଧାରୀ ଚିକିତ୍ସା ଚାଲିଛି । ମେଡିକାଲରେ ଜେନେରେଟର ବ୍ୟବସ୍ଥା ଥିବା ସତ୍ତ୍ୱେ ତେଲ ନଥିବା କହୁଛନ୍ତି ମେଡିକାଲ କର୍ତ୍ତୃପକ୍ଷ । ଇଞ୍ଜେକସନଠୁ ଆରମ୍ଭ କରି ସାଲାଇନ, ରକ୍ତ ଓ ବ୍ୟାଣ୍ଡେଜ ସବୁ କିଛି ଟର୍ଚ୍ଚ ଆଲୁଅରେ କରାଯାଉଛି ।

ଗୋଟିଏ ପଟେ ଗ୍ରୀଷ୍ମ ରୁଦ୍ରତାପ ଯୋଗୁଁ ଜନଜୀବନ ଅସ୍ତବ୍ୟସ୍ତ ହୋଇପଡିଛି । ଅନ୍ୟ ପଟେ ବିଦ୍ୟୁତ ସରବର ବ୍ୟାଘାତ ଲାଗିବା ସହିତ ବାରମ୍ବାର ପାୱାର କଟ ହେଉଛି । ଫଳରେ ବରଗଡ ସହରରେ ଥିବା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରର ରୋଗୀମାନେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛି । ଘଣ୍ଟା ଘଣ୍ଟା ଧରି ପାୱାର କଟ୍ ହେଉଛି । ଯଦ୍ଵାରା ହସ୍ପିଟାଲରେ ମୋବାଇଲ ଟର୍ଚ୍ଚ ଲାଇଟରେ ରୋଗୀ ଚିକିତ୍ସା କରାଯାଉଛି ।

ବରଗଡ ସହ ରେ ଥିବା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଉପରେ ସହରର ପ୍ରାୟ ଦୁଇ ଲକ୍ଷ ଲୋକ ନିର୍ଭରଶୀଳ । କିନ୍ତୁ ଏଠି ବାରମ୍ବାର ପାୱାର କଟ ଯୋଗୁଁ ରୋଗୀମାନେ ହଇରାଣ ହେବା ସହିତ ସେମାନଙ୍କ ଜୀବନ ବାଜିରେ ଲାଗିଛି । ଅଧିକାରୀଙ୍କୁ ପଚାରିବାରୁ ତେଲ ସରିଯାଇଛି ବୋଲି କହି କଥାକୁ ମଜାକରେ ଉଡାଇ ଦେଉଛନ୍ତି ।

ଏହି ଘଟଣାକୁ ନେଇ ରୋଗୀ ଓ ସଂପର୍କୀୟଙ୍କ ମହଲରେ ଅସନ୍ତୋଷ ବୃଦ୍ଧି ପାଇଛି । ଏନେଇ ମେଡିକାଲ କର୍ତ୍ତୃପକ୍ଷଙ୍କୁ ପଚାରିବାରୁ କ୍ୟାମେରା ସାମନାରେ କେହି କିଛି କହିବାକୁ ମନା କରିଛନ୍ତି ।