ଚର୍ମ ରୋଗ ପାଇଁ ୬୦ ପରିବାରକୁ ଗାଁରୁ ବାସନ୍ଦ ଅଭିଯୋଗ

ଚର୍ମରୋଗ କାରଣରୁ ଭୟରେ ୬୦ ପରିବାରକୁ ଗାଁରୁ ବାସନ୍ଦ । କେନ୍ଦ୍ରାପଡା ସଦର ଥାନା ମାଗୁରଗଣ୍ଡା ପାଟଣା ମୁଣ୍ଡା ସାହିରୁ ଏଭଳି ଅଭିଯୋଗ ଆସିଛି । ମୁଣ୍ଡାସାହିରେ କିଛି ଲୋକଙ୍କୁ ଚର୍ମ ରୋଗ ହେବାରୁ ସ୍ଥାନୀୟ ଲୋକେ କାମ ଧନ୍ଦାକୁ ଡାକୁ ନଥବା ଅଭିଯୋଗ ହୋଇଛି । ଏମିତିକି ଦୋକାନ ବଜାରରୁ ସଉଦା କିଣିବା ଲାଗି ଗଲେ ଲୋକେ ବାରଣ କରୁଛନ୍ତି ।

ମୁଣ୍ଡାସାହିର ଲୋକେ କାମଧନ୍ଦା କରି ପରିବାର ପୋଷଣ କରନ୍ତି। ହେଲେ ଏବେ ସାହିରେ ରହୁଥିବା ପ୍ରାୟ ୪ ଶହ ଲୋକଙ୍କ ଦାନାପାଣି ଏକପ୍ରକାର ବନ୍ଦ ହୋଇଯାଇଛି । ଏମିତିକି ପାଖ ଗାଁ ଲୋକେ ଏବେ ଏମାନଙ୍କୁ କାମଧନ୍ଦା ପାଇଁ ଡାକୁ ନାହାନ୍ତି। କେବଳ ଏତିକି ନୁହେଁ ଦୋକାନ ବଜାରକୁ ଗଲେ ବି ଲୋକେ ବାରଣ କରୁଛନ୍ତି ।

ରୋଗରେ ପଡି ମୁଣ୍ଡାସାହିର ଜଣେ ବ୍ୟକ୍ତିଙ୍କ ମୃତ୍ୟୁ ପରେ ସ୍ଥାନୀୟ ଲୋକେ ସଂକ୍ରାମକ ରୋଗ ଭାବି ପାଖ ମାଡିବାକୁ ଦେଉନାହାନ୍ତି । ଫଳରେ ମୁଣ୍ଡାସାହି ବାସିନ୍ଦାଙ୍କ ଘରେ ଚୁଲି ଜଳିବା କଷ୍ଟକର ହୋଇପଡିଛି । ବେଙ୍ଗାଲୋରରେ ଶ୍ରମିକ ଭାବେ କାମ କରୁଥିବା ମୁଣ୍ଡା ସାହିର ଲାଲୁ ସିଦ୍ଧୁ କିଛି ଦିନ ତଳେ ଘରକୁ ଫେରିଥିଲେ ତାଙ୍କର ଚର୍ମରୋଗ ହୋଇଥିଲା। ଚିକିତ୍ସିତ ହେଉଥିବା ବେଳେ ଲାଲୁଙ୍କର ମୃତ୍ୟୁ ହୋଇଥିଲା । ଏହି ଘଟଣା ପରେ ସନ୍ଦେହରେ ମୁଣ୍ଡା ସାହି ଲୋକଙ୍କୁ ବାସନ୍ଦ କରାଯାଇଥିବା ଜଣାପଡିଛି ।

ଏନେଇ ୬ନଂ ଜୋନ ଜିଲ୍ଲାପରିଷଦ ସଦସ୍ୟା କହିଛନ୍ତି, ରୋଗ ବିଷୟରେ ସଠିକ ଭାବେ ନଜାଣି ଗରିବ ଲୋକଙ୍କୁ ହଇରାଣ କରିବା ଠିକ୍ ନୁହେଁ । ଏହାସହ ଘଟଣାକୁ ନେଇ ଜିଲ୍ଲାପାଳ କହିଛନ୍ତି, ଡାକ୍ତରୀ ଟିମ୍ ପଠାଇ ରୋଗ ନିରାକରଣ ପାଇଁ ପଦକ୍ଷେପ ନେବେ । ଏଥିସହ କାହିଁକି ଲୋକେ ଭୟଭୀତ ଅଛନ୍ତି, ସ୍ଥାନୀୟ ଜନସାଧାରଣଙ୍କୁ ଏନେଇ ସଚେତନ କରାଇବେ ।