ପୁଅର କର୍ତ୍ତବ୍ୟ କଲେ ପୋଲିସ୍ ବାବୁ ! ଖାକି ବର୍ଦ୍ଦିରେ ଅଜଣା ଭିକାରୀଙ୍କ ଦାହ ସଂସ୍କାର ଓ ଶୁଦ୍ଧିକ୍ରିୟା

ପୁଅ ସାଜିଲେ ପୋଲିସ୍ ବାବୁ । ଅଜଣା ଭିକାରୀଙ୍କୁ ମୁଖାଗ୍ନି ଦେଲେ । ଅସହାୟ ଶବର ଦାହ ସଂସ୍କାର କରିବା ପରେ ଏବେ ସମସ୍ତଙ୍କ ମୁହଁରେ କଣ୍ଟାବାଞ୍ଜି ପୋଲିସର ପ୍ରଶଂସା । ରାସ୍ତାକଡରେ ଗୁରୁତର ଅବସ୍ଥାରେ ପଡିଥିବା ଜଣେ ଭିକାରୀକୁ ପ୍ରଥମେ ଚିକିତ୍ସା ପାଇଁ ଡାକ୍ତରଖାନାରେ ଭର୍ତ୍ତି କରିଥିଲେ । ହେଲେ ଆଖି ବୁଜିଦେଲେ ଗୁରୁତର ଭିକାରୀ ଜଣକ । କୌଣସି ସଂପର୍କୀୟ ନଆସିବାରୁ ଅନ୍ତିମ ସଂସ୍କାର କରିବାକୁ ଅଣ୍ଟାଭିଡିଥିଲା କଣ୍ଟାବାଞ୍ଜି ପୋଲିସ । କୋକେଇରେ ନେଇ ଦାହସଂସ୍କାର କରିବା ସହିତ ମୁଖାଗ୍ନି ଦେଇଥିଲେ ଖୋଦ ଏସ୍.ଡି.ପି.ଓ । ଆଉ ଠିକ ଦଶଦିନ ପରେ ମୃତ ବ୍ୟକ୍ତିର ଶୁଦ୍ଧିକ୍ରିୟା କରିଛି କଣ୍ଟାବାଞ୍ଜି ପୋଲିସ ।

ତାରିଖ ୨୫ ଡିସେମ୍ବର,୨୦୨୧ । ସ୍ଥାନ-କଣ୍ଟାବାଞ୍ଜି ଥାନା । ଦିନ ୧୧ ଟାରେ ହଠାତ ଚଳଚଞ୍ଚଳ ହୋଇଥିଲା କଣ୍ଟାବାଞ୍ଜି ଥାନା । ହେଲେ କାରଣ କୌଣସି ଆଇନ ଶୃଙ୍ଖଳା ପରିସ୍ଥିତି ନଥିଲା । ଥାନା ଭିତରେ ପୂଜାପାଠ ସହିତ ଚାଲିଥିଲା ଭୋଜିଭାତ । ଏପରିକି ସହରର ଗରିବଗୁରୁବା ଓ ଭିକାରୀ ମାନଙ୍କୁ ଖାଇବା ପିଇବା ଦେଇ ଶୀତବସ୍ତ୍ର ବାଣ୍ଟୁଥିଲେ ପୋଲିସ ବାବୁ ।

ଘଟଣା ଥିଲା କିଛି ଏମିତି । ଦଶଦିନ ତଳେ ଜଣେ ଭିକାରୀଙ୍କର ମୃତ୍ୟୁ ହୋଇଥିଲା । ଆଉ ଏବେ ଥାନା ଭିତରେ ଚାଲିଛି ଭିକାରୀଙ୍କ ଶୁଦ୍ଧିକ୍ରିୟା । ସାଧାରଣ ପରିବାରରେ ଶୁଦ୍ଧିକ୍ରିୟା ଯେମିତି ହୁଏ, ଠିକ ସେମିତି ଫଟୋଚିତ୍ରରେ ମାଳ ପକାଇ ସହରର ଜଣାଶୁଣା ଲୋକେ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି । ଅନ୍ୟପଟେ ଏହି ଶୁଦ୍ଧିକ୍ରିୟାରେ ଯୋଗଦେଇଥିଲେ ସହର ଭିତରେ ଭିକ ମାଗୁଥିବା ଅନ୍ୟ ଭିକାରୀ ମାନେ । ନିଜ ଭିତରୁ ଜଣକର ମୃତ୍ୟୁ ହୋଇଥିବାରୁ ଶ୍ରଦ୍ଧାଞ୍ଜଳି ଦେଇ ଶ୍ରାଦ୍ଧ ଭୋଜି ଖାଉଥିଲେ । ଆଉ ଖାଇ ସାରିବା ପରେ ସମସ୍ତଙ୍କୁ ଶୀତବସ୍ତ୍ର ବାଣ୍ଟିଛନ୍ତି ପୋଲିସ ବାବୁ । ଅନ୍ନବସ୍ତ୍ର ଦାନ କରିବାର ନେତୃତ୍ୱ ନେଇଥିଲେ କଣ୍ଟାବାଞ୍ଜି ଏସ୍.ଡି.ପି.ଓ । ପୋଲିସର ଏଭଳି କାମ ଦେଖି ଅଭିଭୂତ ହୋଇଯାଇଥିଲେ ସାଧାରଣ ଲୋକେ ।

ତେବେ ଏ କାହାଣୀ ପଛରେ ମଧ୍ୟ ଅଛି ଆଉ ଏକ କାହାଣୀ । ଶୁଦ୍ଧିକ୍ରିୟାର ଠିକ ଦଶଦିନ ପୂର୍ବରୁ ଅଜଣା ଭିକାରୀ ଜଣକ ଗୁରୁତର ଭାବେ ଅସୁସ୍ଥ ହୋଇଥିଲେ । ଆଉ ତାଙ୍କୁ ଡାକ୍ତରଖାନାରେ ଭର୍ତ୍ତି କରିଥିଲା କଣ୍ଟାବାଞ୍ଜି ପୋଲିସ । କିନ୍ତୁ ସେ ଡାକ୍ତରଖାନାରେ ଆଖି ବୁଜିଦେଲେ । ପ୍ରାୟ ଚାରଦିନ ଧରି ହସ୍ପିଟାଲରେ ପଡିରହିଲା ଶବ । ହେଲେ ତାଙ୍କ ଶବ ନେବା ପାଇଁ କୌଣସି ସମ୍ପର୍କୀୟ ଆସିନଥିଲେ ।

ଶେଷରେ ଜଣେ ମାଜିଷ୍ଟ୍ରେଟଙ୍କ ଉପସ୍ଥିତିରେ କୋକେଇ ବାନ୍ଧିଥିଲା କଣ୍ଟାବାଞ୍ଜି ପୋଲିସ । କାନ୍ଧ ଦେଇଥିଲେ ପୋଲିସ ବାବୁ । ପାଖାପାଖି ଦୁଇ କିଲୋମିଟର ଶବକୁ କାନ୍ଧ ଦେଇ ସସମ୍ମାନରେ ଦାହସଂସ୍କାର କରିଥିଲା ପୋଲିସ । ଖାଲି ସେତିକି ନୁହେଁ ଖାକି ବର୍ଦ୍ଦିରେ ପୁଅ ସାଜି ମୁଖାଗ୍ନି ଦେଇଥିଲେ ପୋଲିସ ବାବୁ ।

ମନୋରଞ୍ଜନ ଯୋଶୀ ଓ ଅନ୍ତିମ ପାଣିଗ୍ରାହୀଙ୍କ ରିପୋର୍ଟ