ଶ୍ରୀମନ୍ଦିରର ଶହେ ମିଟର ପରିଧି ଭିତରେ ନିର୍ମାଣ କାର୍ଯ୍ୟ ପାଇଁ ପ୍ରଶାସନ ପାଖରେ ଅଛି କି ଅନୁମତି ? ASI ଓ ନ୍ୟାସନାଲ ମନୁମେଣ୍ଟ ଅଥୋରିଟି ଦେଇଛନ୍ତି କି NOC ? ଜିଲ୍ଲାପାଳ ଗତ ୭ ତାରିଖରେ ସମସ୍ତ ଅନୁମତି ମିଳିଥିବା କହିଥିବା ବେଳେ ASIର ସୁପରିଟେଣ୍ଡଣ୍ଟ ଆରକ୍ୟଲୋଜିଷ୍ଟ ଅରୁଣ ମଲ୍ଲିକ କହିଛନ୍ତି ASI ପକ୍ଷରୁ ପ୍ରଶାସନକୁ ଏବାବଦରେ କିଛି କୁହାଯାଇ ନାହିଁ । ତେବେ ASI ଡିଜି ଶ୍ରୀମନ୍ଦିର ଗସ୍ତ ପରେ ରାଜ୍ୟ ସରକାରଙ୍କୁ ରିପୋର୍ଟ ଦେଇଛନ୍ତି ।ଏହି ରିପୋର୍ଟ ଆଧାରରେ ସରକାର କାର୍ଯ୍ୟ କରିବେ ।
ତେବେ ନିୟମ ଅନୁୟାୟୀ ଶ୍ରୀମନ୍ଦିର ଶହେ ମିଟର ପରିଧି ଭିତରେ ଜନ ସାଧାରଣଙ୍କ ସୁବିଧା ପାଇଁ ଶୌଚାଳୟ, ପାଣି ବ୍ୟବସ୍ଥା, ଡ୍ରେନେଜ୍, ବିଦ୍ୟୁତ ବ୍ୟବସ୍ଥା ଆଦି କରିବା ପାଇଁ ଅନୁମତି ରହିଛି । ଶହେ ମିଟର ବାହାରେ ଯେକୌଣସି ନିର୍ମାଣ ପାଇଁ ନ୍ୟାସନାଲ ମନୁମେଣ୍ଟ ଅଥୋରିଟିଙ୍କ ଠାରୁ ଅନୁମତି ନେବାକୁ ପଡ଼ିବ । କିନ୍ତୁ ଶହେ ମିଟର ଭିତରେ ନିର୍ମାଣ ପାଇଁ ASI କୌଣସି NOC ଦେଇନଥିବା କହିଛନ୍ତି ASIର ସୁପରିଟେଣ୍ଡଣ୍ଟ ଆରକ୍ୟଲୋଜିଷ୍ଟ ।
ଗତ ୭ ତାରିଖରେ ଶ୍ରଦ୍ଧାଳୁଙ୍କ ସୁବିଧା ପାଇଁ ଶ୍ରୀନ୍ଦିର ଚାରିପାଖରେ ଶୌଚାଳୟ ଏବଂ ପାନୀୟ ଜଳର ବ୍ୟବସ୍ଥା କରାଯାଉଥିବା ଜିଲ୍ଲାପାଳ କହିଥିଲେ । ତେବେ ଶ୍ରୀମନ୍ଦିର ଚର୍ତୁପାର୍ଶ୍ୱରେ ଚାଲିଥିବା ଖନନ କାର୍ଯ୍ୟ ନେଇ ପୁରୀ ବାସିନ୍ଦା ଅସନ୍ତୋଷ ପ୍ରକାଶ କରିବା ସହ ଏହା ଶ୍ରୀମନ୍ଦିର ପ୍ରତି ବିପଦ ସୃଷ୍ଟି ହୋଇପାରେ ବୋଲି ଆଶଙ୍କା କରିଥିଲେ ।