ସାଙ୍ଗମାନଙ୍କ ସହ ଖେଳିବାକୁ ଗଲେ, ବାଲିରେ ପୋତି ହୋଇଗଲେ

କମ୍ପାନୀ ପାଇଁ ଫିଲିଂ ହୋଇଥିବା ବାଲିରେ ପୋତି ହୋଇ ଚାଲିଗଲା ନାବାଳକର ଜୀବନ । ପାରାଦୀପ ଷଣ୍ଢକୁଦ ବସ୍ତିରେ ଘଟିଛି ଏହି ଅଘଟଣ । ଷଣ୍ଡକୁଦ ଅଞ୍ଚଳର ମୁନା ମଲ୍ଲିକଙ୍କ ୧୦ ବର୍ଷର ପୁଅ ଶୁଭମ୍ ମଲ୍ଲିକ ଜଣେ ସାଙ୍ଗ ସହ ଏକାଠି ଖେଳୁଥିଲେ ।

ତେବେ ପାଣି ସହିତ ମିଶି ରହିଥିବା ବାଲିରେ ଗୋଡ ପଡିଯିବାରୁ ସେଠାରେ ଧିରେ ଧିରେ ପୋତି ହୋଇ ପଡିଥିଲା । ସାଙ୍ଗ ଜଣକ ମାଡଗାଳି ଭୟରେ କାହାକୁ କିଛି ନ କହି ଚୁପ ରହିଥିଲା । ଘରଲୋକେ ଦିନ ତମାମ ଶୁଭମକୁ ଖୋଜାଖୋଜି କରି ନିରାଶ ହୋଇଥିଲେ । ସଂଧ୍ୟାରେ ଉକ୍ତ ବାଲିରେ ଖୋଜାଖୋଜି କରିବା ପରେ ନାବାଳକର ମୃତଦେହ ମିଳିଥିଲା ।

ଖବର ପାଇ ଜଟାଧାରମୁହାଣ ସାମୁଦ୍ରିକ ଥାନା ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରିଛି । ସେପଟେ ଶୁଭମର ପରିବାର ଲୋକ ପୁଅ ମୃତ୍ୟୁ ପାଇଁ କମ୍ପାନୀ କର୍ତ୍ତୃପକ୍ଷଙ୍କୁ ଦାୟୀ କରିଛନ୍ତି । ତେବେ ଏନେଇ ସଂପୃକ୍ତ କଂପାନୀ ପକ୍ଷରୁ ପ୍ରତିକ୍ରିୟା ମିଳିପାରିନି ।