World Laughter Day 2025: ହସିଲେ ଫୁସ୍‌ଫୁସ୍‌ର କ୍ଷମତା ବୃଦ୍ଧି ହୁଏ; ଜାଣନ୍ତୁ ହସିବାର ଟ୍ରିକ୍ସ

ସେ ଡାକ୍ତର ହୁଅନ୍ତି କି ପୁରୁଣାକାଳିଆ ଲୋକେ ସମସ୍ତେ କୁହନ୍ତି, ହସ ହେଉଛି ସର୍ବୋତ୍ତମ ଔଷଧ। ଜୀବନର ବ୍ୟସ୍ତତା, ଚାପ ଏବଂ କଷ୍ଟ ମଧ୍ୟରେ, ହସ ହିଁ ଏକମାତ୍ର ଜିନିଷ ଯାହା ଆମକୁ ଭିତରୁ ଖୁସି ଏବଂ ସୁସ୍ଥ ରଖିଥାଏ। ତେଣୁ ସ୍ୱାସ୍ଥ୍ୟ ପାଇଁ ହାସ୍ୟ ଜରୁରୀ ହୋଇଥାଏ। ହସିବା କେବଳ ଏକ ଭାବନା ନୁହେଁ ବରଂ ଜୀବନ ବଞ୍ଚିବାର ସବୁଠାରୁ ସରଳ ଏବଂ ସୁନ୍ଦର ଉପାୟ।

ହସର ଏହି ଗୁରୁତ୍ୱକୁ ବୁଝାଇବା ପାଇଁ, ପ୍ରତିବର୍ଷ ମେ ମାସର ପ୍ରଥମ ରବିବାରରେ ‘ବିଶ୍ୱ ହାସ୍ୟ ଦିବସ’ ପାଳନ କରାଯାଏ। ଏହି ବର୍ଷ ବିଶ୍ୱ ହାସ୍ୟ ଦିବସ ୪ ମେ ୨୦୨୫ରେ ପଡୁଛି।

ତେବେ ଏହି ଦିବସ ପାଳନ ୧୯୯୮ ମସିହାରେ ଭାରତର ଡକ୍ଟର ମଦନ କଟାରିଆଙ୍କ ଦ୍ୱାରା ଆରମ୍ଭ କରାଯାଇଥିଲା। ଡକ୍ଟର ମଦନ କଟାରିଆଙ୍କୁ ହାସ୍ୟ ଯୋଗର ଜନକ ବୋଲି ବିବେଚନା କରାଯାଏ। ସାରା ବିଶ୍ୱରେ ହସ ମାଧ୍ୟମରେ ଶାନ୍ତି, ଭାଇଚାରା ଏବଂ ସକାରାତ୍ମକତା ପ୍ରସାର କରିବା ଲକ୍ଷ୍ୟରେ ସେ ଏହି ଦିନଟି ଆରମ୍ଭ କରିଥିଲେ।

ଅଧିକ ପଢ଼ନ୍ତୁ: ମେରୁଦଣ୍ଡ ଓ ଛାତିକୁ ମଜବୁତ କରିବାକୁ ଚାହାନ୍ତି କି… କରନ୍ତୁ ଏହି ୩ ଯୋଗ

ତେବେ ଆସନ୍ତୁ ଜାଣିବା ହାସ୍ୟ ଯୋଗର ଆଶ୍ଚର୍ଯ୍ୟଜନକ ଲାଭ ଏବଂ ଏହାକୁ ଅଭ୍ୟାସ କରିବାର ସଠିକ୍ ଉପାୟ।

ହାସ୍ୟ ଯୋଗ କ'ଣ:

ହାସ୍ୟ ଯୋଗ ଏମିତି ଏକ ବ୍ୟାୟାମ ଯେଉଁଥିରେ କୌଣସି ମଜା କିମ୍ବା କମେଡି ବିନା ଜାଣିଶୁଣି ହସିବାକୁ ହୋଇଥାଏ। ଏଥିରେ ଗଭୀର ଶ୍ୱାସ ନେବା ସହିତ ହସିବାର କୌଶଳ ସାମିଲ ଅଛି। ଏହା ଏକ ଗୋଷ୍ଠୀରେ କରିବା ଦ୍ୱାରା ଅଧିକ ପ୍ରଭାବଶାଳୀ ହୋଇଥାଏ। ଆପଣ ସହିତ ଅନ୍ୟମାନେ ମଧ୍ୟ ହସନ୍ତି।

ହାସ୍ୟ ଯୋଗ ଅଭ୍ୟାସ ଉପାୟ:

ହାସ୍ୟ ଯୋଗ ଅଭ୍ୟାସ କରିବା ପାଇଁ, ଗଭୀର ଶ୍ୱାସ ନିଅନ୍ତୁ ଏବଂ ଧୀରେ ଧୀରେ ଶ୍ୱାସ ଛାଡ଼ନ୍ତୁ। ଏହାକୁ ଚାରିରୁ ପାଞ୍ଚ ଥର ପୁନରାବୃତ୍ତି କରନ୍ତୁ। ଏହି ସମୟରେ, ତାଳି ବଜାଇ ଉର୍ଜା ବଢାନ୍ତୁ। ହାତରେ ତାଳି ବଜାଇ "ହୋ… ହୋ… ହା… ହା…" କହି ଉର୍ଜା ଜାଗ୍ରତ କରନ୍ତୁ।

ଅଭ୍ୟାସ ସମୟରେ, ପିଲାମାନେ ଖେଳିବା ବେଳେ ଯେପରି ହସିଥାନ୍ତି, ସେହିପରି ନିଜକୁ ବିନା ଦ୍ୱିଧାରେ ଜୋରରେ ହସିବାକୁ ଦିଅନ୍ତୁ। ତା'ପରେ ପାଟି ଖୋଲା ରଖନ୍ତି କିନ୍ତୁ କୌଣସି ଶବ୍ଦ କରନ୍ତୁ ନାହିଁ, କେବଳ ହସିବାର ଭାବନା ରଖନ୍ତୁ। ଶେଷରେ, ଆଖି ବନ୍ଦ କରନ୍ତୁ ଏବଂ ହାଲୁକା ହସ ଦେଇ ଆପଣଙ୍କ ଶରୀରକୁ ଶାନ୍ତ କରନ୍ତୁ।

ହସିବାର ଲାଭ:

• ହସିବା ଦ୍ୱାରା କର୍ଟିସୋଲ୍‌ (ଷ୍ଟ୍ରେସ୍ ହରମୋନ୍) ସ୍ତର କମିଯାଏ ଏବଂ ମୁଡ୍‌ରେ ଉନ୍ନତି ଆସେ।
• ହାସ୍ୟ ହୃଦୟ ଏବଂ ଫୁସ୍‌ଫୁସ୍‌ ପାଇଁ ଲାଭଦାୟକ। ଜୋର୍‌ରେ ହସିବା ଦ୍ୱାରା ଫୁସ୍‌ଫୁସ୍‌ର କ୍ଷମତା ବୃଦ୍ଧି ହୁଏ ଏବଂ ରକ୍ତ ସଞ୍ଚାଳନ ଉନ୍ନତ ହୁଏ। ଏହା ଦ୍ୱାରା ହୃଦୟ ସ୍ୱାସ୍ଥ୍ୟରେ ଉନ୍ନତି ହୁଏ।
• ଏହା ରୋଗ ପ୍ରତିରୋଧକ ଶକ୍ତିକୁ ଦୃଢ଼ କରିଥାଏ। ହସ ଶରୀରରେ ରୋଗ ପ୍ରତିରୋଧକ କୋଷଗୁଡ଼ିକୁ ସକ୍ରିୟ କରିଥାଏ, ଯାହା ରୋଗ ସହିତ ଲଢ଼ିବାର କ୍ଷମତା ବୃଦ୍ଧି କରେ।
• ଏଣ୍ଡୋର୍‌ଫିନ୍ ହେଉଛି ପ୍ରାକୃତିକ ଯନ୍ତ୍ରଣା ନିବାରଣକାରୀ ହରମୋନ୍, ହସିବା ଦ୍ୱାରା ଏଣ୍ଡୋରଫିନ୍ ନିର୍ଗତ ହୁଏ ଯାହା ଯନ୍ତ୍ରଣାରୁ ମୁକ୍ତି ଦିଏ।
• ହସିବା ଦ୍ୱାରା ଚାପ ହ୍ରାସ ପାଇଥାଏ ଯାହା ଭଲ ନିଦ ଆଣିଥାଏ।

ଅଧିକ ପଢ଼ନ୍ତୁ: କରନ୍ତୁ ଏହି ୫ ଆସନ; ଯେତେ ଗରମ ହେଲେ ବି କିଛି ଫରକ ପଡିବନି