ବଦଳିଲା ଅଗ୍ନିବୀର ନିଯୁକ୍ତି ପ୍ରକ୍ରିୟା, ଏଣିକି ପରୀକ୍ଷା ଦେବେ ଇଚ୍ଛୁକ ପ୍ରାର୍ଥୀ

ବଦଳିଲା ଅଗ୍ନିବୀର ନିଯୁକ୍ତି ପ୍ରକ୍ରିୟା । ଏଣିକି ସେନାରେ ଯୋଗ ଦେବାକୁ ହେଲେ ମିଳିତ ପ୍ର‍ବେଶିକା ପରୀକ୍ଷା ଦେବାକୁ ହେବ । ଅଗ୍ନିବୀର ମାଧ୍ୟମରେ ଯେଉଁ ଯୁବକମାନେ ସେନାରେ ସାମିଲ ହେବାକୁ ଇଚ୍ଛୁକ ଥିବେ ସେମାନେ ବର୍ତ୍ତମାନ ପରୀକ୍ଷା ଦେବେ ବୋଲି ଘୋଷଣା କରାଯାଇଛି  । ପରୀକ୍ଷାରେ ଉତ୍ତୀର୍ଣ୍ଣ ହେବା ପରେ ସେମାନଙ୍କର ଶାରୀରିକ ସୁସ୍ଥତା ଓ ଡାକ୍ତରୀ ପରୀକ୍ଷା କରାଯିବ ।  

ଏଥିପାଇଁ ଇଚ୍ଛୁକ ଯୁବକ ମାନେ ଅନଲାଇନ୍ ମାଧ୍ୟମରେ ଆବେଦନ କରିପାରିବେ ।  ଫେବ୍ରୁଆରୀ ୧୦ ତାରିଖରୁ ମାର୍ଚ୍ଚ ୧୧ ତାରିଖ ଯାଏଁ ଆବେଦନ ପ୍ରକ୍ରିୟା ଚାଲୁରହିବ ।  ଆସନ୍ତା ଏପ୍ରିଲ ମାସ ୧୨ ତାରିଖରେ ଏହି ପରୀକ୍ଷା କରାଯିବା ନେଇ କୁହାଯାଇଛି । ଖାଲି ସେତିକି ନୁହେଁ ଯେଉଁ ପ୍ରାର୍ଥୀମାନେ ଦଶମ ଓ ଦ୍ୱାଦଶ ପରୀକ୍ଷା ଦେଇଛନ୍ତି ସେମାନେ ମଧ୍ୟ ଆବେଦନ କରିପାରିବେ ।

ବର୍ତ୍ତମାନ ଅଗ୍ନିବୀର ନିଯୁକ୍ତି ପ୍ରକ୍ରିୟା ପରିବର୍ତ୍ତନ କରାଯାଇଥିବାରୁ ପ୍ରାର୍ଥୀମାନେ ନିଯୁକ୍ତି ପାଇବାକୁ ହେଲେ ୩ଟି ପର୍ଯ୍ୟାୟ ଦେଇ ପରୀକ୍ଷା ଦେବାକୁପଡ଼ିବ । 

ପ୍ରଥମ ପର୍ଯ୍ୟାୟରେ ନିର୍ଦ୍ଧିଷ୍ଟ କେନ୍ଦ୍ର ଗୁଡ଼ିକରେ ସିଇଇ ଅନୁଷ୍ଠିତ ହେବ । ଏଥିରେ ଯେଉଁ ପ୍ରାର୍ଥୀ ପାସ୍ କରିବେ ସେମାନେ ଦ୍ୱିତୀୟ ପର୍ଯ୍ୟାୟରେ ଫିଟନେସ୍ ପରୀକ୍ଷା ଦେବେ । ଶେଷରେ ଅର୍ଥାତ୍ ତୃତୀୟ ପର୍ଯ୍ୟାୟରେ ସେମାନଙ୍କୁ ଡାକ୍ତରୀ ପରୀକ୍ଷା ଦେବାକୁ ହେବ । ସେନା ଦ୍ୱାରା ଘୋଷଣା କରାଯାଥିବା ନିୟମ ଅନୁସାରେ  ସିଇଇ ଅନଲାଇନ୍ ମାଧ୍ୟମରେ କରାଯିବ । 

ସେହିପରି ପ୍ରଥମ ପର୍ଯ୍ୟାୟ ପରୀକ୍ଷା ପାଇଁ ୨୦୦ଟି ସ୍ଥାନ ସ୍ଥିର କରାଯିବ । ଏଥିପାଇଁ ସମସ୍ତ ପ୍ରସ୍ତୁତି ଶେଷ ହୋଇଥିବା ସୂଚନା ଦିଆଯାଇଛି । ପ୍ରାର୍ଥୀମାନଙ୍କୁ ଅନଲାଇନରେ ଆବେଦନ କରିବାକୁ ହେଲେ ୨୫୦ଟଙ୍କା ଦେବାକୁ ହେବ । ସମସ୍ତ ପଦ୍ଧତି ଅନୁସାରେ ଅନଲାଇନରେ ପ୍ରାର୍ଥୀମାନେ ଆବେଦନ କରିପାରିବେ । ୧୧ ମାର୍ଚ୍ଚ ଆବେଦନ ପ୍ରକ୍ରିୟାର ଶେଷ ଦିନ ରହିଛି ।