ଜୋରଦାର ହେଉଛି ଗଙ୍ଗା ଅଭିଯାନ, ଭାରତୀୟ ଛାତ୍ରଙ୍କ ପାଇଁ ୟୁକ୍ରେନ୍‌ରେ ସ୍ୱତନ୍ତ୍ର ଟ୍ରେନ୍‌

ୟୁକ୍ରେନର କିଭ୍ ସହରରେ ଅବସ୍ଥାପିତ ଭାରତୀୟ ଦୂତାବାସ ଦ୍ୱାରା ମିଳିଥିବା ଖବର ଅନୁସାରେ ପ୍ରାୟ ୪ଶହ ଭାରତୀୟ ଛାତ୍ରଛାତ୍ରୀଙ୍କୁ ସ୍ୱତନ୍ତ୍ର ଟ୍ରେନ ଯୋଗେ ପଶ୍ଚିମ ୟୁକ୍ରେନକୁ ସ୍ଥାନାନ୍ତର କରାଯାଇଛି । ଏହାସହ କିଭ୍‌ର କିଛି ଅଞ୍ଚଳରେ ଲାଗିଥିବା କର୍ଫ୍ୟୁ ହଟିଲେ ଅନ୍ୟାନ୍ୟ  ଏକ ହଜାର ଛାତ୍ରଛାତ୍ରୀଙ୍କୁ ସ୍ଥାନାନ୍ତର ଲାଗି ଯୋଜନା ରହିଛି ।

ସେପଟେ ଭାରତ ସରକାରଙ୍କ ଅପରେସନ ଗଙ୍ଗା ସପ୍ତମ ପର୍ଯ୍ୟାୟରେ ୧୮୨ଜଣ ଭାରତୀୟ ନାଗିରକଙ୍କୁ ରୋମାନିଆର ବୁଚାରେଷ୍ଟରୁ ସ୍ୱତନ୍ତ୍ର ବିମାନ ଯୋଗେ ମୁମ୍ବାଇ ଅଣାଯାଉଛି । ଏନେଇ ଭାରତୀୟ ବୈଦେଶିକ ବ୍ୟାପାର ମନ୍ତ୍ରୀ ଏସ୍ ଜୟଶଙ୍କର ସୂଚନା ଦେଇଛନ୍ତି । ଏହାସହ କିଭ୍ ଅଞ୍ଚଳରେ ଯୁଦ୍ଧ ବିଭିଷିକା ଚାଲିଥିବା ବେଳେ ପ୍ରାୟ ୧୪ଶହ ଛାତ୍ରଛାତ୍ରୀଙ୍କୁ ଯାଫ୍ରୋଜିଆ ଅଞ୍ଚଳରୁ ବାହାରକୁ ସ୍ଥାନାନ୍ତର କରାଯାଇଥିବା ନେଇ ଭାରତୀୟ ଦୂତାବାସ ଟ୍ୱିଟ୍ କରିଛି ।

ସେପଟେ ୟୁକ୍ରେନ୍-ଋଷ ଯୁଦ୍ଧ ମଧ୍ୟରେ ମୁହାଁମୁହିଁ ହେଲେଣି ଆମେରିକା ଏବଂ ଋଷ । ଆଣବିକ ମିଜାଇଲ ପ୍ରସ୍ତୁତ ରଖିବାକୁ ରାଷ୍ଟ୍ରପତି ପୁଟିନ କହିବା ପରେ ଆସିଛି ଋଷ ପ୍ରତିରକ୍ଷା ମନ୍ତ୍ରୀଙ୍କ ବୟାନ । ସେ କହିଛନ୍ତି, ଜରୁରୀ ଆକ୍ରମଣ ପାଇଁ ଋଷ ତାର ଆଣବିକ କ୍ଷେପଣାସ୍ତ୍ର ବାହୀନିକୁ ସଜାଗ ରଖିବା ସହ ଅସ୍ତ୍ରଶସ୍ତ୍ର ପ୍ରସୁତ ରଖିଛି । ଉତ୍ତର ଏବଂ ପ୍ରଶାନ୍ତ ମହାସାଗରୀୟ ଅଂଚଳରେ ଯୁଦ୍ଧ ଜାହାଜ ସହ ଆମେ ପ୍ରସ୍ତୁତ । ସେପଟେ ବେଲାରୁଷରେ ଥିବା ଦୂତାବାସକୁ ବନ୍ଦ କରିଦେଇଛି ଆମେରିକା ।

ଏପରିକି ଋଷରେ ଥିବା ଆମେରୀକିୟ ନାଗରିକଙ୍କୁ ତୁରନ୍ତ ଦେଶ ଛାଡିବାକୁ କୁହାଯାଇଛି । ଏହାରି ଭିତରେ ୟୁକ୍ରେନ ସ୍ଥିତି ସମୀକ୍ଷା ନେଇ ଉଚ୍ଚସ୍ତରୀୟ ବୈଠକ କରିଛନ୍ତି ପ୍ରଧାନମନ୍ତ୍ରୀ ମୋଦି । ୟୁକ୍ରେନରୁ ଭାରତୀୟଙ୍କୁ ସୁରକ୍ଷିତ ଉଦ୍ଧାର କରିବା ଉପରେ ବି ବୈଠକରେ ଆଲୋଚନା ହୋଇଥିବା ସୂଚନା ମିଳିଛି ।