ପାଲେଷ୍ଟାଇନ୍‌ ରାଷ୍ଟ୍ରପତିଙ୍କ ଉପରେ ଆକ୍ରମଣ ଚେଷ୍ଟା; କିଏ କଲା ଆକ୍ରମଣ…

ପାଲେଷ୍ଟାଇନ୍‌ ରାଷ୍ଟ୍ରପତି ମହମୁଦ ଅବ୍ବାସଙ୍କ ଉପରେ ଆକ୍ରମଣ କରିବାକୁ ଚେଷ୍ଟା କରାଯାଇଛି। ମଙ୍ଗଳବାର ଦିନ ଅବ୍ବାସଙ୍କ କ୍‌ନଭେନ୍‌ରେ ହଠାତ୍ ଆକ୍ରମଣ କରାଯାଇଥିଲା ଯେଉଁଥିରେ ତାଙ୍କର ଜଣେ ସୁରକ୍ଷାକର୍ମୀଙ୍କର ମୃତ୍ୟୁ ଘଟିଥିଲା। ପାଲେଷ୍ଟାଇନ ରାଷ୍ଟ୍ରପତି ମହମୁଦ ଅବ୍ବାସ କିଛି ଦିନ ପୂର୍ବରୁ ହମାସ ବିଷୟରେ ଏକ ବଡ଼ ବିବୃତ୍ତି ଦେଇଥିଲେ। ଅବ୍ବାସ କହିଥିଲେ ଯେ ହମାସ ପାଲେଷ୍ଟାଇନର ଅର୍ଥ ନୁହେଁ। ତେବେ ଏଭଳି ପରିସ୍ଥିତିରେ ପାଲେଷ୍ଟାଇନ୍‌ ରାଷ୍ଟ୍ରପତିଙ୍କ ଉପରେ ଆକ୍ରମଣ ପଛରେ କିଏ ଅଛି ବୋଲି ପ୍ରଶ୍ନ ଉଠିଛି?

ମଙ୍ଗଳବାର ଦିନ ପାଲେଷ୍ଟାଇନ ରାଷ୍ଟ୍ରପତି ମହମୁଦ ଅବ୍ବାସଙ୍କ କନଭେନ ଉପରେ ଆକ୍ରମଣ କରାଯାଇଥିଲା। ରାଷ୍ଟ୍ରପତି ଅବ୍ବାସ ଆକ୍ରମଣକାରୀଙ୍କ ଟାର୍ଗେଟରେ ଥିଲେ। ଏହି ଆକ୍ରମଣରେ ରାଷ୍ଟ୍ରପତି ଅବ୍ବାସଙ୍କ ଜଣେ ସୁରକ୍ଷା କର୍ମୀଙ୍କ ମୃତ୍ୟୁ ଘଟିଛି।

ଏ ସମ୍ବନ୍ଧୀୟ ଯେଉଁ ଭିଡିଓରେ ସାମ୍ନାକୁ ଆସିଛି ସେଥିରେ ଦେଖିବାକୁ ମିଳିଛି ଯେ ବନ୍ଧୁକଧାରୀ ଆକ୍ରମଣକାରୀମାନେ ରାଷ୍ଟ୍ରପତି ଅବ୍ବାସଙ୍କ କନ୍‌ଭେନ୍‌କୁ ଟାର୍ଗେଟ୍‌ କରିଛନ୍ତି। ଏଥିରେ ଜଣେ ସୁରକ୍ଷା କର୍ମୀଙ୍କ ମୃତ୍ୟୁ ହୋଇଥିବା ବେଳେ ରାଷ୍ଟ୍ରପତିଙ୍କ ଅନ୍ୟ ସୁରକ୍ଷା କର୍ମୀମାନେ ପ୍ରତି ଆକ୍ରମଣ କରିବାରୁ ଆକ୍ରମଣକାରୀ ଫେରାର ହୋଇଯାଇଛନ୍ତି।

ପାଲେଷ୍ଟାଇନ ରାଷ୍ଟ୍ରପତିଙ୍କୁ କିଏ କଲା ଆକ୍ରମଣ:

ସୂଚନାନୁସାରେ, ପାଲେଷ୍ଟାଇନ ରାଷ୍ଟ୍ରପତି ମହମୁଦ ଅବ୍ବାସଙ୍କୁ ହମାସ ସମର୍ଥକ ଆତଙ୍କବାଦୀମାନେ ଆକ୍ରମଣ କରିଛନ୍ତି। ରାଷ୍ଟ୍ରପତି ଅବ୍ବାସଙ୍କୁ ଆକ୍ରମଣ କରିଥିବା ଆତଙ୍କବାଦୀମାନେ 'ସନ୍ସ ଅଫ୍ ଅବୁ ଜନ୍ଦାଲ' ନାମକ ଆତଙ୍କବାଦୀ ସଂଗଠନର ବୋଲି କୁହାଯାଉଛି।

ତୁର୍କୀ ଗଣମାଧ୍ୟମର ରିପୋର୍ଟ ଅନୁଯାୟୀ, ଇସ୍ରାଏଲ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ରାଷ୍ଟ୍ରପତି ମହମୁଦ ଅବ୍ବାସଙ୍କୁ 'ସନ୍ସ ଅଫ୍ ଅବୁ ଜନ୍ଦାଲ' ନାମକ ଆତଙ୍କବାଦୀ ସଂଗଠନ ଦ୍ୱାରା ୨୪ ଘଣ୍ଟା ଅଲ୍ଟିମେଟମ୍ ଦିଆଯାଇଥିଲା। ଅଲ୍ଟିମେଟମ୍ ସମୟସୀମା ଶେଷ ହେବା ପରେ ତାଙ୍କୁ ଆକ୍ରମଣ କରାଯାଇଥିଲା।

'ସନ୍ସ ଅଫ୍ ଅବୁ ଜନ୍ଦାଲ' କ’ଣ:

ଏପ୍ରିଲ୍ ୨୦୦୨ରେ ଜେନିନ୍ ଶରଣାର୍ଥୀ ଶିବିରର ଯୁଦ୍ଧର ନେତୃତ୍ୱ ନେଇଥିବା ପାଲେଷ୍ଟାଇନ କର୍ତ୍ତୃପକ୍ଷ ଅଧିକାରୀ ୟୋସେଫ୍ ଅହମ୍ମଦ ରେହାନଙ୍କ ସମ୍ମାନାର୍ଥେ ଏହି ଗୋଷ୍ଠୀ ନିଜକୁ 'ସନ୍ସ ଅଫ୍ ଅବୁ ଜନ୍ଦାଲ' ବୋଲି କହୁଛନ୍ତି। ରେହାନଙ୍କ ଉପନାମ ଅବୁ ଜନ୍ଦାଲ ଥିଲା ଏବଂ ମହମ୍ମଦ ତୱାଲବେଙ୍କ ସହ ତାଙ୍କ ନେତୃତ୍ୱରେ ଜେନିନ୍ ଯୁଦ୍ଧ ହୋଇଥିଲା।

ଅନ୍ୟପକ୍ଷରେ, ରାଷ୍ଟ୍ରପତି ଅବ୍ବାସଙ୍କ ଉପରେ ହୋଇଥିବା ଏହି ଆକ୍ରମଣ ତାଙ୍କ ବିବୃତ୍ତି ପରେ ଆସିଛି ବୋଲି ବିଶ୍ୱାସ କରାଯାଏ ଯେଉଁଥିରେ ସେ ଭେନେଜୁଏଲା ରାଷ୍ଟ୍ରପତିଙ୍କ ସହ କଥାବାର୍ତ୍ତା ସମୟରେ କହିଥିଲେ ଯେ ହମାସର ନୀତି ଏବଂ କାର୍ଯ୍ୟ ପାଲେଷ୍ଟାଇନକୁ ସମର୍ଥନ କରେ ନାହିଁ।

ହମାସ ପାଲେଷ୍ଟାଇନର ପ୍ରତିନିଧିତ୍ୱ କରେ ନାହିଁ – ରାଷ୍ଟ୍ରପତି ମହମୁଦ ଅବ୍ବାସ:

ଯୁଦ୍ଧ ଆରମ୍ଭ ହେବାର କିଛି ଦିନ ପରେ ପାଲେଷ୍ଟାଇନ ରାଷ୍ଟ୍ରପତି ଭେନେଜୁଏଲା ରାଷ୍ଟ୍ରପତି ନିକୋଲାସ ମାଦୁରୋଙ୍କ ସହ ବାର୍ତ୍ତାଳାପ ସମୟରେ କହିଛନ୍ତି ଯେ ‘ହମାସ’ର ନୀତି ଏବଂ କାର୍ଯ୍ୟ ପାଲେଷ୍ଟାଇନକୁ ସମର୍ଥନ କରୁ ନାହିଁ। ସେ କହିଥିଲେ ଯେ କେବଳ ପାଲେଷ୍ଟାଇନ ମୁକ୍ତି ସଂଗଠନର ନୀତି ପାଲେଷ୍ଟାଇନର ନେତୃତ୍ୱ ନେଇଥାଏ।

ତେବେ ଏହାର କିଛି ଘଣ୍ଟା ପରେ ରାଷ୍ଟ୍ରପତି ଅବ୍ବାସଙ୍କ କାର୍ଯ୍ୟାଳୟ ଏକ ବିବୃତ୍ତି ଜାରି କରି କହିଛି ଯେ କେବଳ PLOର ନୀତି ଏବଂ ନିଷ୍ପତ୍ତି ପାଲେଷ୍ଟାଇନର ନେତୃତ୍ୱ ନେଉଛି, ଅନ୍ୟ କୌଣସି ସଂଗଠନ ନୁହେଁ। ତେବେ ଦ୍ୱିତୀୟ ବିବୃତ୍ତିରେ କେବଳ ହମାସର ନାମ ହଟାଯାଇଥିଲା।