ମଙ୍କିପକ୍ସକୁ ନେଇ କେନ୍ଦ୍ରର ସତର୍କ ସୂଚନା; ଲକ୍ଷଣ ଦେଖାଗଲେ ତୁରନ୍ତ ପରୀକ୍ଷା କରିବାକୁ ନିର୍ଦ୍ଦେଶ

ମଙ୍କିପକ୍ସ ନେଇ ନ୍ୟାସନାଲ ସେଣ୍ଟର ଫର୍ ଡିଜିଜ୍ କଣ୍ଟ୍ରୋଲ ଏବଂ ଇଣ୍ଡିଆନ କାଉନସିଲ ଫର୍ ମେଡିକାଲ ରିସର୍ଚ୍ଚକୁ ସତର୍କ କରାଇଲେ କେନ୍ଦ୍ର ସରକାର । ଏହି ରୋଗ ଉପରେ ସତର୍କ ଦୃଷ୍ଟି ରଖିବାପାଇଁ ସରକାର କହିଛନ୍ତି । କିଛି ଲକ୍ଷଣ ଦେଖାଗଲେ, ସାଙ୍ଗେ ସାଙ୍ଗେ ପୁଣେର ନ୍ୟାସନାଲ ଇନଷ୍ଟିଟ୍ୟୁଟ୍‌ ଅଫ୍ ଭାଇରୋଲୋଜିକୁ ନମୁନା ପଠାଇବାକୁ କହିଛନ୍ତି ।

ମଙ୍କିପକ୍ସ ପଶୁମାନଙ୍କଠାରୁ ମଣିଷକୁ ବ୍ୟାପିଥାଏ । ଏହି ରୋଗକୁ ନେଇ ୟୁରୋପ ଓ ଉତ୍ତର ଆମେରିକାରେ ଆତଙ୍କ ଖେଳି ଯାଇଛି । ବିଶ୍ୱ ସ୍ୱାସ୍ଥ୍ୟ ସଂଗଠନ ମଧ୍ୟ ଏହାକୁ ନେଇ ଏକ ଜରୁରୀ ବୈଠକ ଡାକିଛନ୍ତି । ବ୍ରିଟେନ, ସ୍ପେନ, ପର୍ତ୍ତୁଗାଲ, ଜର୍ମାନୀ, ଇଟାଲି, ଆମେରିକା, କାନାଡ଼ା ଓ ଅଷ୍ଟ୍ରେଲିଆରେ ମଙ୍କି ପକ୍ସ ଅଧିକ ପରିମାଣରେ ବ୍ୟାପିଛି ।

ମଙ୍କିପକ୍ସ କେତେ ମାରାତ୍ମକ ଓ ସଂକ୍ରାମକ, ଏନେଇ ଅଧିକ ଗବେଷଣା ଚାଲୁଥିବା ବେଳେ ୟୁକେ ହେଲ୍ଥ ସିକ୍ୟୁରିଟି ଏଜେନ୍ସି(UKHSA) ଏହା ବିପଜ୍ଜନକ ନୁହେଁ ବୋଲି କହିଛନ୍ତି । ଉତ୍ତର ଆମେରିକା ଏବଂ ୟୁରୋପର ସ୍ୱାସ୍ଥ୍ୟ କର୍ତ୍ତୃପକ୍ଷ ମେ ମାସ ଆରମ୍ଭରୁ ମଙ୍କିପକ୍ସରେ ଆକ୍ରାନ୍ତ ଚିହ୍ନଟ ହୋଇଥିବା କହିସାରିଛନ୍ତି । ଯାହା ବର୍ତ୍ତମାନ ପାଶ୍ଚାତ୍ୟ ଦେଶ ବ୍ୟାପିବାରେ ଲାଗିଛି।