ନିଜ ଜାଲରେ ନିଜେ ଛନ୍ଦି ହେଉଛନ୍ତି ଇମ୍ରାନ ! ବିଦେଶୀ ଷଡ଼ଯନ୍ତ୍ରର ପ୍ରମାଣ ମାଗିଲେ ସୁପ୍ରିମ୍‌କୋର୍ଟ

ପାକିସ୍ତାନର ନ୍ୟାସନାଲ ଆସେମ୍ଲିରେ ସରକାର ବିରୋଧରେ ଆସିଥିବା ନୋ କନ୍ଫିଡେନ୍ସ ମୋସନ୍, ବିରୋଧୀ ରାଷ୍ଟ୍ରର ପ୍ରାୟୋଜିତ କହି ଅନାସ୍ଥା ପ୍ରସ୍ତାବକୁ ଉପବାଚସ୍ପତି ଖାରଜ କରିଦେଇଛନ୍ତି । ଯାହା ପରଠାରୁ ନିଜ ଜାଲରେ ଛନ୍ଦି ହେଉଛନ୍ତି ଇମ୍ରାନ୍‌ ଖାନ୍‌ । ଏମିତିକି ଇମ୍ରାନ ପାକିସ୍ତାନର ସୁପ୍ରିମ୍‌ କୋର୍ଟକୁ ମଧ୍ୟ ପ୍ରତିଉତ୍ତର ଦେଇପାରୁନାହାଁନ୍ତି ।

ସୂଚନା ଅନୁସାରେ, ସରକାର ବିରୋଧରେ ରଚାଯାଇଥିବା ଷଡ଼ଯନ୍ତ୍ର ପ୍ରମାଣ କରିବା ପାଇଁ ପାକିସ୍ତାନ ସୁପ୍ରିମ୍‌ କୋର୍ଟ ଇମ୍ରାନ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି । କେବଳ ଏତିକି ନୁହେଁ ଏହାସହ ସୁପ୍ରିମ କୋର୍ଟ ରାଷ୍ଟ୍ରିୟ ସୁରକ୍ଷା ପରିଷଦର ବୈଠକର ସବିଶେଷ ତଥ୍ୟ ମଧ୍ୟ ମାଗିଛନ୍ତି ।

ଜାତୀୟ ଗଣମାଧ୍ୟମର ରିପୋର୍ଟ ଅନୁଯାୟୀ, ଇମ୍ରାନ ଖାନଙ୍କ ରିଲିରେ ବିଦେଶୀ ଷଡ଼ଯନ୍ତ୍ର ବିଷୟରେ ଲେଖା ଥିବା ଏକ ଚିଠି ଉଡ଼ୁଥିବାର ଦେଖିବାକୁ ମିଳିଥିଲା । ଯାହା ପରେ ସେ ଆମେରିକୀୟମାନେ ତାଙ୍କୁ କ୍ଷମତାରୁ ହଟାଇବାକୁ ଷଡଯନ୍ତ୍ର କରିଥିବା ଅଭିଯୋଗ କରିଥିଲେ।

(ନିଜ ଜାଲରେ ନିଜେ ଛନ୍ଦି ହେଉଛନ୍ତି ଇମ୍ରାନ !)

ଅନ୍ୟପକ୍ଷେ, ପାକିସ୍ତାନ ରାଜନୀତିରେ ଜାରି ରହିଛି ଅଚଳାବସ୍ଥା । ପାକ୍ ରାଜନୈତିକ ସଙ୍କଟ ମାମଲାର ଶୁଣାଣିକୁ ସୁପ୍ରିମକୋର୍ଟ ପୁଣି ସ୍ଥଗିତ ରଖିଥିଲେ । ପ୍ରଧାନମନ୍ତ୍ରୀ ଇମ୍ରାନ ଖାନ ଅନାସ୍ଥା ଭୋଟିଂ ଏଡାଇ ଯିବା ପରେ ଉଭୟ ପକ୍ଷରୁ ଚାଲିଛି ଗୋଟିକ ପରେ ଗୋଟିଏ ଗୋଟି ଚାଳନା । ତେଣୁ ଇମ୍ରାନଙ୍କ ଭାଗ୍ୟ କଣ ହେବ ତାହା ଏବେଠୁ କହିବା ମୁସ୍କିଲ । ହେଲେ ଏଠାରେ ସବୁଠୁ ବଡ଼ ଖବର ହେଉଛି ୩ ମାସ ଭିତରେ ପାକିସ୍ତାନରେ ସାଧାରଣ ନିର୍ବାଚନ ହୋଇପାରିବ କି ନାହିଁ ତାକୁ ନେଇ ଦେଖାଦେଇଛି ଅନିଶ୍ଚିତତା ।