ଋଷ-ୟୁକ୍ରେନ୍‌ ଯୁଦ୍ଧ ମଧ୍ୟରେ କ୍ରିପ୍ଟୋ ମାର୍କେଟ ଧରାଶାୟୀ : ବଡ଼ ବଡ଼ ମୁଦ୍ରାର ପ୍ରଭୁତ୍ୱ ହ୍ରାସ

ଋଷ ଏବଂ ୟୁକ୍ରେନ ମଧ୍ୟରେ ଯୁଦ୍ଧ ଆରମ୍ଭ ହୋଇଯାଇଥିବା ବେଳେ ସମଗ୍ର ବିଶ୍ୱରେ ଷ୍ଟକ୍ ମାର୍କେଟ ଧରାଶାୟୀ ହୋଇଯାଇଛି । ୟୁରୋପରୁ ଏସିଆ ପର୍ଯ୍ୟନ୍ତ ଚାରିଆଡ଼େ ବଜାର ହ୍ରାସ ପାଇଛି । ଗୁରୁବାର ଦିନ କ୍ରିପ୍ଟୋକରେନ୍ସି ବଜାରରେ ମଧ୍ୟ ଏକ ବଡ଼ ହ୍ରାସ ଘଟିଛି । ଆଜି ସକାଳ ୧୦ଟା ରେ ଗ୍ଲୋବାଲ୍ କ୍ରିପ୍ଟୋ ମାର୍କେଟ୍ କ୍ୟାପ୍ ୮.୨୭ ପ୍ରତିଶ ହ୍ରାସ ପାଇଛି । ଗତକାଲି ୧.୭୨ ଟ୍ରିଲିୟନ ଡଲାର ହୋଇଥିବା ବେଳେ ଆଜି ୧.୫୮ ଟ୍ରିଲିୟନ ଡଲାର ରହିଛି ।

ଗୁରୁବାରର ଦିନ ସମସ୍ତ ପ୍ରକାର ମୁଦ୍ରାରେ ପତନ ଦେଖିବାକୁ ମିଳିଛି । ବଜାର ପାଇଁ ଏହା ଦୁଃସ୍ୱପ୍ନ କହିଲେ ଚଳେ । ବିଟକଏନ୍ ଠାରୁ ଏଥେରମ୍ (Ethereum) ପର୍ଯ୍ୟନ୍ତ ସମସ୍ତ ମାର୍କେଟ ଧରାଶାୟୀ ହୋଇପଡ଼ିଛି । Terra – LUNA ବ୍ୟତୀତ ୧୦ ଟି ମୁଦ୍ରାରେ ୧୦ ପ୍ରତିଶତ ହ୍ରାସ ରେକର୍ଡ ହୋଇଛି ।

ସର୍ବ ବୃହତ ମୁଦ୍ରା ବିଟକଏନ୍ (Bitcoin Price Today) ୭.୯୯ ପ୍ରତିଶତ ହ୍ରାସ ପାଇ ୩୪,୯୦୦.୭୮ ଡଲାରରେ ପହଞ୍ଚିଛି । ସେହିପରି ଗତ ୨୪ଘଣ୍ଟା ମଧ୍ୟରେ ଏଥେରମ୍ ମୂଲ୍ୟ ୯.୫୮ ପ୍ରତିଶତ ହ୍ରାସ ପାଇ ୨, ୩୮୪.୦୪ ଡଲାରରେ ପହଞ୍ଚିଛି । ଗତ ସପ୍ତାହ ସମ୍ପର୍କରେ ଆଲୋଚନା କଲେ ବିଟକଏନ୍ ୧୯.୮୮ ପ୍ରତିଶକ୍ଷ କ୍ଷତି ସହିଥିବାବେଳେ ଏଥେରମ୍‌ ୨୨.୩୪ ପ୍ରତିଶତ ହରାଇଛି । ବର୍ତ୍ତମାନ କ୍ରିପ୍ଟୋ ବଜାରରେ ବିଟକଏନର ପ୍ରାଧାନ୍ୟ ୪୧.୯ ପ୍ରତିଶତ ଥିବାବେଳେ ଏଥେରମର ପ୍ରାଧାନ୍ୟ ୧୮.୧ ପ୍ରତିଶତ ରହିଛି ।

ସେପଟେ ଏସିଆ ଟ୍ରେଡ୍‌ରେ ଅଶୋଧିତ ତୈଳ ଦର ବ୍ୟାରେଲ୍‌ ପିଛା ୧୦୧.୩୪ ଡଲାରରେ ପହଞ୍ଚିଛି । ୨୦୧୪ ମସିହା ସେପ୍ଟେମ୍ବରରୁ ଏହା ହେଉଛି ସର୍ବାଧିକ । ୨୦୧୪ ମସିହାରେ ଅଶୋଧିତ ତୈଳ ଦର ବୃଦ୍ଧି ପାଇ ବ୍ୟାରେଲ୍‌ ପିଛା ୯୬.୫୧ ଡଲାରରେ ପହଞ୍ଚି ଥିଲା । ଋଷ୍ ହେଉଛି ବିଶ୍ୱର ଦ୍ୱିତୀୟ ବୃହତ୍ତମ ତୈଳ ଉତ୍ପାଦନକାରୀ। ଯାହା ମୁଖ୍ୟତଃ ୟୁରୋପୀୟ ରିଫାଇନେରୀକୁ ଅଶୋଧିତ ତୈଳ ବିକ୍ରି କରିଥାଏ। ଋଷ୍ ବିଶ୍ୱର ଏକ ଅଗ୍ରଣୀ ଅଶୋଧିତ ତୈଳ ଉତ୍ପାଦନକାରୀ ରାଷ୍ଟ୍ର ହୋଇଥିବାରୁ ବିଶ୍ୱବ୍ୟାପୀ ଏହାର ପ୍ରଭାବ ପଡ଼ିପାରେ।