ଉଇଗର ମୁସଲମାନଙ୍କ ଉପରେ କମୁନି ଜିନପିଙ୍ଗ ସରକାରଙ୍କ ବର୍ବରତା । ଚୀନ୍ ଦ୍ୱାରା ପୂର୍ବରୁ ପ୍ରଦାନ କରାଯାଇଥିବା ରିପୋର୍ଟରେ ପ୍ରକାଶ ପାଇଥିବା ତାଲିକା ଅନୁଯାୟୀ ଚୀନର ସିନଜିଆଙ୍ଗ ଅଞ୍ଚଳରେ ୧୦,୦୦୦ ରୁ ଅଧିକ ଉଇଗର କାରାଗାରରେ ବନ୍ଦ ଅଛନ୍ତି । ଏହି ରିପୋର୍ଟ ନ୍ୟୁଜ୍ ଏଜେନ୍ସି ଏଏଫପି ଦ୍ୱାରା ପ୍ରକାଶ ପାଇଛି । ଚୀନର କମ୍ୟୁନିଷ୍ଟ କର୍ତ୍ତୃପକ୍ଷଙ୍କ ଦ୍ୱାରା ସିନଜିଆଙ୍ଗ ଅଞ୍ଚଳ ଉପରେ ତୀକ୍ଷ୍ଣ ନଜର ରଖାଯାଉଛି । ଏଠାରେ ଅନେକ ଗୁପ୍ତ କୋଠରୀ ସହ ଗୁପ୍ତ ନେଟୱାର୍କ ମଧ ରହିଛି । ଚୀନର ଏହି ଅଞ୍ଚଳରେ ଏକ ମିଲିୟନରୁ ଅଧିକ ଉଇଗରୁ ଏବଂ ଅନ୍ୟାନ୍ୟ ସଂଖ୍ୟାଲଘୁ ସମ୍ପ୍ରଦାୟର ଲୋକେ କାରାଗାରରେ ବନ୍ଦୀ ଅଛନ୍ତି ବୋଲି ଅନୁସନ୍ଧାନକାରୀ କହୁଛନ୍ତି ।
ଲିକ୍ ହୋଇଥିବା ତାଲିକାରେ କ’ଣ ଅଛି?
ଲିକ୍ ହୋଇଥିବା ତାଲିକାରେ ପ୍ରତ୍ୟେକ କଏଦୀଙ୍କ ନାମ, ଜନ୍ମ ତାରିଖ, ଜାତି, ପରିଚୟ ପତ୍ର, ଚାର୍ଜ, ଠିକଣା, ଦଣ୍ଡର ସମୟ ଏବଂ ଜେଲ ବିଷୟରେ ସୂଚନା ରହିଛି । ୨୦୧୪ରୁ ୨୦୧୮ ପର୍ଯ୍ୟନ୍ତ ତଥ୍ୟକୁ ସୂଚାଉଛି ଏହି ତାଲିକା । 'ସାମାଜିକ ଶୃଙ୍ଖଳାକୁ ଭଣ୍ଡୁର କରିବା, ଗୋଷ୍ଠୀ ନିଆରି କରିବା, 'ଉଗ୍ରବାଦକୁ ପ୍ରୋତ୍ସାହିତ କରିବା' ଏବଂ 'ଉତ୍ତେଜନାମୂଳକ କାର୍ଯ୍ୟ' ପରି ଅନେକ ଅଭିଯୋଗରେ ସେମାନଙ୍କୁ ଜେଲରେ ବନ୍ଦ କରାଯାଇଛି ।
ଜେଲକୁ ତାଲିମ କେନ୍ଦ୍ର କହୁଛି ଚୀନ୍
ପାଶ୍ଚାତ୍ୟ ଦେଶଗୁଡ଼ିକ ଉଇଗର ଉପରେ ବର୍ବରତାଙ୍କୁ ବିରୋଧ କରୁଥିବା ବେଳେ ଚୀନ୍ ଏହାକୁ ଏକ ତାଲିମ କେନ୍ଦ୍ର ବୋଲି କହି କଥା ଘୋଡ଼ାଇବା ପାଇଁ ଚେଷ୍ଟା କରୁଛି । ତେବେ ମିଳିତ ଜାତିସଂଘର ମାନବାଧିକାର ମୁଖ୍ୟ ମିସେଲ ବ୍ୟାଚେଲେଟ୍ ଚଳିତ ମାସରେ ଚୀନ୍ର ବର୍ବରତା ସମ୍ପର୍କରେ ଯାଞ୍ଚ କରିବା ପାଇଁ ସିନଜିଆଙ୍ଗ ଗସ୍ତରେ ଯାଉଛନ୍ତି ।
୨୦୧୭ରେ ଇସଲାମିକ୍ ଉଗ୍ରବାଦ ବିରୋଧରେ 'ଷ୍ଟ୍ରାଇକ୍ ହାର୍ଡ' ନାମକ ଅଭିଯାନକୁ ତୀବ୍ର କରିଥିଲା ଚୀନ୍ । ବ୍ରିଟେନର ଶେଫିଲ୍ଡ ୟୁନିଭରସିଟିର ଇଷ୍ଟ ଏସିଆନ୍ ଷ୍ଟଡିଜର ଅଧ୍ୟାପକ ଡେଭିଡ୍ ଟୋବିନଙ୍କ ଅନୁଯାୟୀ ଏହା ଆତଙ୍କବାଦ ବିରୋଧୀ ନୁହେଁ । ଚୀନର ଅଧିକାରୀମାନେ ଘର ଘର ଯାଇ ଲୋକଙ୍କୁ ତାଲିମ କେନ୍ଦ୍ରକୁ ନେଇ ଯାଉଛନ୍ତି । ପ୍ରକୃତ କଥା ହେଉଛି ଚୀନ୍ ସ୍ପଷ୍ଟ ରୂପରେ ଗୋଟିଏ ସମ୍ପ୍ରଦାୟକୁ ଟାର୍ଗେଟ କରୁଛି।