ଭୟଙ୍କର...ବୀଭତ୍ସ...ଜଘନ୍ୟ... ଏଭଳି କିଛି ଶବ୍ଦ ବି ବୋଧହୁଏ ହମାସ ଆତଙ୍କୀଙ୍କ ବର୍ବରତାର କାହାଣୀ ବଖାଣି ପାରିବ ନାହିଁ । ଇସ୍ରାଏଲ ଓ ପାଲେଷ୍ଟାଇନ୍ ମଧ୍ୟରେ ଯୁଦ୍ଧ ଓ ସଂଘର୍ଷର ଅନ୍ତ ଘଟିବାର ଆଶା ଶୂନ୍ୟପ୍ରାୟ । ଯୁଦ୍ଧ ଭିତରେ ମଣିଷ କିପରି କ୍ଷଣକରେ ନର ରାକ୍ଷସ ପାଲଟିଯାଏ ତାହା ସ୍ପଷ୍ଟ ଦେଖିବାକୁ ମିଳୁଛି । ହମାସ ଆତଙ୍କୀ ନୁହେଁ ତ ଯେପରି ନିଷ୍ଠୁର ମୃତ୍ୟୁ ଦୂତ ପରି ମାଡ଼ି ଆସୁଛନ୍ତି । ଯିଏ ଆଖିରେ ପଡ଼ୁଛି, ତାକୁ ଅତି ବୀଭତ୍ସ ଭାବରେ ହତ୍ୟା କରୁଛନ୍ତି । ଏସବୁ ଭିତରେ ପ୍ରଶ୍ନ ଉଠୁଛି, କି ଭୁଲ କରିଛନ୍ତି ସେହି ନୀରିହ ମଣିଷ ଗୁଡ଼ାକ ଯିଏ ଘନ ଘନ ରକେଟ୍ ମାଡ଼ରେ ଜୀବନ ହରାଇଛନ୍ତି । କି ଭୁଲ କରିଛି ମା’ ପେଟରେ ଥିବା ଶିଶୁ, ଯାହାକୁ ପେଟ ଭିତରେ ହିଁ ମାରି ଦେଇଛନ୍ତି ହମାସ୍ ଆତଙ୍କୀ ।
ଯୁଦ୍ଧ ମଧ୍ୟରେ ଗୋଟିଏ ପରେ ଗୋଟିଏ ହମାସ୍ ଆତଙ୍କବାଦୀଙ୍କ ଅମାନବୀୟ କାଣ୍ଡ ସାମ୍ନାକୁ ଆସୁଛି । ଜୀବନ କ’ଣ ଜାଣିବା ପୂର୍ବରୁ ସମସ୍ତଙ୍କୁ ଅତି ବର୍ବରତାର ସହ ହତ୍ୟା କରୁଛନ୍ତି ଆତଙ୍କବାଦୀ। କାହା ଶରୀରରୁ ମୁଣ୍ଡ ଅଲଗା ହୋଇଛି ତ କାହା ଶରୀରକୁ ଅତି ବୀଭତ୍ସ ଭାବ କ୍ଷତାକ୍ତ କରି ତା’ ଜୀବନ ନେଇଛନ୍ତି ସେମାନେ। ଭୟଙ୍କର ତଥା ଛାତିଥରା କାହାଣୀ ବଖାଣିଛନ୍ତି ଜଣେ ସ୍ୱେଚ୍ଛାସେବୀ ୟଶି ଲାନ୍ଦୁ ।
Also Read
ୟଶି ଲାନ୍ଦୁ ଏଭଳି ଏକ ସଂଗଠନ ସହିତ ଜଡ଼ିତ, ଯାହା ଅସ୍ୱାଭାବିକ ମୃତ୍ୟୁ ଭୋଗୁଥିବା ଲୋକଙ୍କ ମୃତଦେହ ଉଦ୍ଧାର କରେ । ସେହି ସଂଗଗନରେ ୟଶି ଲାନ୍ଦୁଙ୍କର ଦୀର୍ଘ ୩୩ ବର୍ଷର ଅଭିଜ୍ଞତା ରହିଛି । ହମାସ ଆତଙ୍କୀଙ୍କ ଅତର୍କିତ ଆକ୍ରମଣ ପରେ ସେ ତାଙ୍କର ସହଯୋଗୀ ଗୋଷ୍ଠୀଙ୍କ ସହ ମୃତଦେହ ଉଦ୍ଧାର କରିବା ପାଇଁ ବାହାରିଥିଲେ । ଉଦ୍ଧାର କାର୍ଯ୍ୟ ଜାରି ରହିଥିବା ବେଳେ ଏକ କୋଠା ଭିତରକୁ ପଶି ଯାଇଥିଲେ ୟଶି ଲାନ୍ଦୁ । ହେଲେ ସେଠାକାର ଦୃଶ୍ୟ ଦେଖି ତାଙ୍କ ଛାତି ଥରି ଉଠିଥିଲା ।
ଜଣେ ଗର୍ଭବତୀ ମହିଳା ମରିକି ତଳେ ପଡ଼ିଥିବା ସେ ଦେଖିଥିଲେ । କୋଠରୀ ଭିତରେ ରକ୍ତର ନଦୀ ବହୁଥିଲା । ସବୁଠାରୁ ହୃଦୟବିଦାରକ ହେଲା ହମାସ ଆତଙ୍କୀ ମହିଳାଙ୍କ ଗର୍ଭସ୍ଥ ଶିଶୁକୁ ମଧ୍ୟ ଛାଡ଼ି ନଥିଲେ । ମହିଳାଙ୍କ ପେଟ ଚିରି ଗର୍ଭସ୍ଥ ଶିଶୁକୁ ଛୁରି ଭୁଶି ଦେଇଥିଲେ । ସତରେ ମଣିଷ କ’ଣ ଏତେ ବର୍ବର କାଣ୍ଡ ଘଟାଇପାରେ । ଯାପାଖରେ ମାନବିକତାରେ ଚିହ୍ନବର୍ଣ୍ଣ ବୋଲି ହିଁ କିଛି ନାହିଁ ।
ହମାସ ଆତଙ୍କୀଙ୍କ ଆକ୍ରମଣରେ ଆଖି ପିଛୁଳାକେ ସୁନାର ସହର ଧ୍ୱଂସସ୍ତୁପରେ ପରିଣତ ହୋଇସାରିଥିଲା । ଘନ ଘନ ରକେଟ୍ ମାଡ଼ରେ ରାସ୍ତାରେ ବିଛେଇ ହୋଇ ପଡ଼ିଥିଲା ଶହ ଶହ ଶବ । କେବଳ ଏତିକି ନୁହେଁ ଆତଙ୍କୀଙ୍କ ଆକ୍ରମଣରେ କେଉଁଠି ଶିଶୁର ମୁଣ୍ଡ ଅଲଗା ହୋଇ ଯାଇଥିଲା ତ କେଉଁଠି କୁନି ଶରୀରରେ ବର୍ବରତାର ଅସଂଖ୍ୟ ଚିହ୍ନ ବାରି ହୋଇଯାଉଥିଲା । କୁନି କୁନି ପିଲାଙ୍କ ହାତବାନ୍ଧି ଗୁଳି ମାରିବାର ଦୃଶ୍ୟ ଦେଖି ଉଦ୍ଧାରକାରୀ ଦଳ ମଧ୍ୟ ହତବିମ୍ବ ହୋଇ ପଡ଼ିଥିଲେ। ଆଖି ସାମ୍ନାରେ ଶହ ଶହ ଲୋକଙ୍କ ଶବ ତାଙ୍କ ହୃଦୟକୁ ଉଦବେଳିତ କରିଥିଲା ।
ଏତେ ସବୁ ପରେ ବି ଇସ୍ରାଏଲ ଉପରେ ହମାସ ଆତଙ୍କବାଦୀ ସଂଗଠନ ଘନଘନ ଆକ୍ରମଣ ଜାରି ରଖିଛି । ହମାସ ଆତଙ୍କବାଦୀମାନେ ଇସ୍ରାଏଲର ଅନେକ ସହରରେ ପଶି ସାଧାରଣ ଲୋକଙ୍କୁ ଖୋଜିଖୋଜି ହତ୍ୟା କରୁଛନ୍ତି । ବିଶେଷ କରି ଗାଜା ଷ୍ଟ୍ରିପକୁ ଲାଗିଥିବା ଇସ୍ରାଏଲର ସହର ଗୁଡ଼ିକରେ ସେମାନେ ବର୍ବରକାଣ୍ଡ ଘଟାଇ ଚାଲିଛନ୍ତି ।