ଖେଳ ଦୁନିଆରୁ ରାଜ୍ୟସଭା, କେମିତି ଥିଲା ପିଟି ଉଷାଙ୍କ ଜୀବନ

ଭାରତର ଷ୍ଟାର୍‌ ଆଥଲେଟ୍ ତଥା ଫ୍ଲାଇଙ୍ଗ୍ ମେରି ଭାବରେ ଜଣାଶୁଣା ପିଟି ଉଷାଙ୍କୁ ରାଜ୍ୟସଭାକୁ ମନୋନୀତ କରାଯାଇଛି। ଉଷାଙ୍କୁ ଟୁଇଟ୍ କରି ପ୍ରଧାନମନ୍ତ୍ରୀ ମୋଦି ଅଭିନନ୍ଦନ ଜଣାଇଛନ୍ତି। ସେ ଟ୍ୱିଟ୍ କରି ଲେଖିଛନ୍ତି - ପିଟି ଉଷା ପ୍ରତ୍ୟେକ ଭାରତୀୟଙ୍କ ପାଇଁ ପ୍ରେରଣା। କ୍ରୀଡା ପ୍ରତି ତାଙ୍କର ଅବଦାନ ଜଣାଶୁଣା।

୧୯୮୪ ଅଲିମ୍ପିକ୍ ଗେମ୍ସରେ ପିଟି ଉଷା ଚତୁର୍ଥ ସ୍ଥାନ ହାସଲ କରିଥିଲେ। ସେବେଠାରୁ ସେ ସାରା ଦେଶରେ ଲୋକପ୍ରିୟ ହୋଇଥିଲେ। ତାଙ୍କର ଲୋକପ୍ରିୟତା ଏତେ ବଢିଗଲା ଯେ ପରେ ସେ ଆଥ୍‌ଲେଟିକ୍ସ ସହିତ ସମକକ୍ଷ ହୋଇଗଲେ। ବର୍ତ୍ତମାନ ତାଙ୍କ ଅବଦାନକୁ ସମ୍ମାନ ଜଣାଇ ତାଙ୍କୁ ରାଜ୍ୟସଭାକୁ ମନୋନୀତ କରାଯାଇଛି।

୧୯୮୦ ଦଶକରେ ଦେଶର ଅବସ୍ଥା ସମ୍ପୂର୍ଣ୍ଣ ଭିନ୍ନ ଥିଲା ବୋଲି ପିଟି ଉଷା ନିଜେ କହିଥିଲେ। ଯେତେବେଳେ ସେ କ୍ରୀଡା ଜଗତକୁ ଆସିଥିଲେ, ସେ ଭାବି ନଥିଲେ ଯେ ଦିନେ ସେ ଅଲିମ୍ପିକ୍ସରେ ଭାଗ ନେଇ ପାରିବେ।

ଚତୁର୍ଥ ଶ୍ରେଣୀରୁ ଆରମ୍ଭ କରିଥିଲେ ଦୌଡିବା:

ପି.ଟି ଉଷାଙ୍କ ପ୍ରାରମ୍ଭିକ ଜୀବନ ଦକ୍ଷିଣ ଭାରତର କେରଳର ଉପକୂଳବର୍ତ୍ତୀ ଜିଲ୍ଲା ପୟୋଲିରେ ଅତିବାହିତ ହୋଇଥିଲା। ସେଥିପାଇଁ ପିଟି ଉଷା ପୟୋଲି ଏକ୍ସପ୍ରେସ ନାମରେ ମଧ୍ୟ ଜଣାଶୁଣା। ଯେତେବେଳେ ସେ ଚତୁର୍ଥ ଶ୍ରେଣୀରେ ପଢୁଥିଲେ ତାଙ୍କ ଶାରୀରିକ ଶିକ୍ଷା ଶିକ୍ଷକ ଉଷାଙ୍କୁ ଜିଲ୍ଲାର ଚାମ୍ପିୟନ ସହିତ ପ୍ରତିଯୋଗିତା କରିବାକୁ କହିଥିଲେ।

ଉଷା ମଧ୍ୟ ଏହି ଦୌଡରେ ଜିଲ୍ଲା ଚାମ୍ପିୟନ ହୋଇଥିଲେ। ପରବର୍ତ୍ତୀ କିଛି ବର୍ଷ ଧରି ସେ ନିଜ ବିଦ୍ୟାଳୟ ପାଇଁ ଜିଲ୍ଲା ସ୍ତରୀୟ ମ୍ୟାଚ୍ ଜିତିବାରେ ଲାଗିଲେ। କିନ୍ତୁ, ପିଟି ଉଷାଙ୍କ ପ୍ରକୃତ କ୍ୟାରିୟର ୧୩ ବର୍ଷ ବୟସରେ ଆରମ୍ଭ ହୋଇଥିଲା ଯେତେବେଳେ ସେ କେରଳ ସରକାରଙ୍କ ଦ୍ୱାରା ଆରମ୍ଭ ହୋଇଥିବା ବାଳିକାମାନଙ୍କ ପାଇଁ କ୍ରୀଡା ବିଭାଗରେ ନାମ ଲେଖାଇଥିଲେ।

ପିଲାଦିନରୁ ଦୌଡିବା ପସନ୍ଦ ଥିଲା:

ପି.ଟି ଉଷାଙ୍କ ଦାଦା ବିଦ୍ୟାଳୟରେ ଶିକ୍ଷକ ଥିଲେ। ଏହି କାରଣରୁ, କ୍ରୀଡ଼ାରେ କ୍ୟାରିୟର କରିବାକୁ ତାଙ୍କ ବାପାମାଆଙ୍କୁ ମନାଇବା ପାଇଁ ଅଧିକ ପରିଶ୍ରମ କରିବାକୁ ପଡିଲା ନାହିଁ। ଉଷାଙ୍କ ପରିବାର ତାଙ୍କୁ ସମ୍ପୂର୍ଣ୍ଣ ସମର୍ଥନ କରିଥିଲେ ଏବଂ ତାଲିମ ସମୟରେ ତାଙ୍କୁ ଉତ୍ସାହିତ କରିଥିଲେ। ସେ ଅନେକ ପ୍ରାୟ ସମୟ ଧୂଳି ରାସ୍ତାରେ ଦୌଡୁଥିଲେ ଏବଂ ଗାଡି ସହିତ ଦୌଡୁଥିଲେ।

କୋଚ୍ ହିଁ ବଦଳାଇଦେଲେ ଜୀବନ:

ପିଟି ଉଷା ରାଜ୍ୟ ସରକାରଙ୍କ ତାଲିମ ଅଭିଯାନରେ ଜଡିତ ଥିଲେ। ତଥାପି ତାଙ୍କୁ ବହୁତ କମ୍ ସୁବିଧା ମିଳୁଥିଲା। ସେ କୁହନ୍ତି ଯେ "ଆଥଲେଟ୍ସଙ୍କ ସମେତ ୪୦ ଜଣ ଖେଳାଳି ଥିଲେ। ଆମ ପାଇଁ କମ ବାଥ୍‌ରୁମ୍‌ ଥିଲା। ସମସ୍ତ ଅସୁବିଧା ସତ୍ତ୍ୱେ ଆମକୁ କଡା ନିୟମ ମାନିବାକୁ ପଡୁଥିଲା। ମୋର ଦିନ ସକାଳ ପାଞ୍ଚଟାରୁ ଆରମ୍ଭ ହେଉଥିଲା। ଦୌଡିବା ସହିତ ଆମକୁ ମଧ୍ୟ ପାଠପଢା ସମାପ୍ତ କରିବାକୁ ପଡିଲା।

ଠିକ୍ ଏହି ସମୟ ମଧ୍ୟରେ ସେ ପ୍ରସିଦ୍ଧ କୋଚ୍ ଓଏମ୍ ନାମ୍ବିୟାରଙ୍କୁ ଭେଟିଥିଲେ। ସେ ହିଁ ବଦଳେଇ ଦେଇଥିଲେ ତାଙ୍କ ଜୀବନ।

୧୬ ବର୍ଷରେ ପ୍ରଥମ ଥର ପାଇଁ ଅଲିମ୍ପିକ୍ସର ଯୋଗ:

୧୯୮୦ରେ ୧୬ ବର୍ଷ ବୟସରେ, ପି.ଟି ଉଷା ମସ୍କୋରେ ଗ୍ରୀଷ୍ମ ଅଲିମ୍ପିକ୍ସରେ ଭାଗ ନେଇଥିଲେ। ଚାରି ବର୍ଷ ପରେ, ୧୯୮୪ରେ, ସେ ପ୍ରଥମ ଭାରତୀୟ ମହିଳା ଆଥଲେଟ୍ ଭାବରେ ଅଲିମ୍ପିକ୍ ଗେମ୍ସର ଫାଇନାଲରେ ପ୍ରବେଶ କରିଥିଲେ। ମାତ୍ର ଅଳ୍ପ ବ୍ୟବଧାନରେ ଉଷା ଅଲିମ୍ପିକ୍ ପଦକ ଜିତିବାରେ ବଞ୍ଚିତ ହୋଇଥିଲେ।

ଅଲିମ୍ପିକ୍ସ ପରେ ପିଟି ଉଷାଙ୍କ ପ୍ରଦର୍ଶନ ହ୍ରାସ ପାଇଲା ଏବଂ ଲୋକମାନେ ତାଙ୍କୁ ସମାଲୋଚନା କରିବା ଆରମ୍ଭ କଲେ। ସେ ୧୯୮୬ ସିଓଲ୍ ଏସୀୟ ଗେମ୍ସରେ ଚାରିଟି ସ୍ୱର୍ଣ୍ଣ ପଦକ ଜିତିଥିଲେ। ଉଷା ୪୦୦ ମିଟର ବାଧା ଦୌଡ଼, ୪୦୦ ମିଟର ରେସ୍‌, ୨୦୦ ମିଟର ଏବଂ ୪x୪୦୦ ଦୌଡ଼ରେ ସ୍ୱର୍ଣ୍ଣ ପଦକ ଜିତିଥିଲେ। ସେ ୧୦୦ ମିଟର ଦୌଡ଼ରେ ଦ୍ୱିତୀୟ ସ୍ଥାନ ଅଧିକାର କରିଥିଲେ। ତାଙ୍କୁ ୧୯୮୩ରେ ଅର୍ଜୁନ ପୁରସ୍କାର ପ୍ରଦାନ କରାଯାଇଥିଲା। ୧୯୮୫ ରେ ତାଙ୍କୁ ଦେଶର ଚତୁର୍ଥ ସର୍ବୋଚ୍ଚ ନାଗରିକ ସମ୍ମାନ ପଦ୍ମଶ୍ରୀ ପ୍ରଦାନ ମିଳିଥିଲା।

ସ୍ୱାମୀଙ୍କ ସାହାଯ୍ୟ:

୧୯୯୧ ରେ ବିବାହର କିଛି ଦିନ ପରେ ଉଷା ଆଥ୍‌ଲେଟିକ୍ସରୁ ବିରତି ନେଇଥିଲେ। ତା’ପରେ ସେ ନିଜ ପୁତ୍ର ସନ୍ତାନକୁ ଜନ୍ମ ଦେଇଥିଲେ। ପିଟି ଉଷାଙ୍କ ସ୍ୱାମୀ ଭି ଶ୍ରୀନିବାସନ୍ ମଧ୍ୟ କ୍ରୀଡା ପ୍ରତି ଆଗ୍ରହୀ ଥିଲେ। ସେ ନିଜେ ଜଣେ ଖେଳାଳି ଥିଲେ। ସେ ପୂର୍ବରୁ କବାଡି ଖେଳୁଥିଲେ। ସେ ଉଷାଙ୍କୁ ସବୁଥିରେ ଉତ୍ସାହିତ କରିଥିଲେ। ପି.ଟି ଉଷା କ୍ରୀଡା ଜଗତକୁ ପୁନର୍ବାର ଫେରିଥିଲେ ଏବଂ ୧୯୯୭ରେ ସେ ତାଙ୍କ କ୍ରୀଡ଼ା କ୍ୟାରିୟରକୁ ବିଦାୟ ଦେଇଥିଲେ। ସେ ଭାରତ ପାଇଁ ୧୦୩ ଟି ଆନ୍ତର୍ଜାତୀୟ ପଦକ ଜିତିଛନ୍ତି।