Special Story: ଅଢ଼େଇ ବର୍ଷରେ ଇଣ୍ଡିଆ ବୁକ୍ ରେକର୍ଡ

ଖନେଇ ଖନେଇ ସିନା କହୁଛି, କିନ୍ତୁ ସବୁ ମନେ ରଖି ଦେଇଛି । ପାଟି ଭଲରେ ଖୋଲିନି ସତ, ହେଲେ ମୁଖସ୍ତ ହୋଇଯାଇଛି କବିତା । କେବଳ କବିତା ନୁହେଁ, ମାସ, ବର୍ଷ, ଋତୁ ସାଙ୍ଗକୁ ବିଭିନ୍ନ ପନିପରିବାର ନାମ ଏବଂ ସପ୍ତାହ ଆଉ ମହାପୁରୁଷଙ୍କ ନାଁ ଅନର୍ଗଳ କହି ପକାଉଛି। ମାତ୍ର ଅଢେଇ ବର୍ଷରୁ ଏପରି ଚମତ୍କାରିତା ପାଇଁ ଆଜି ଇଣ୍ଡିଆ ବୁକ୍ ଅଫ୍ ରେକର୍ଡର ଅଧିକାରୀ । ଆଜ୍ଞା ହଁ, କୁନି ପିଲାଟିର ବିଚକ୍ଷଣ ସ୍ମରଣ ଶକ୍ତି ତାକୁ ଏହି ବିରଳ ରେକର୍ଡର ଅଧିକାରୀ କରିପାରିଛି ।

ଅଧିକ ପଢ଼ନ୍ତୁ: ପୁଣି ଲଜ୍ଜା: କନ୍ୟା ସନ୍ତାନର ମା’ ହେଲେ ଦଶମଶ୍ରେଣୀ ଛାତ୍ରୀ

ପରିବାର ସହ ଜିଲ୍ଲା ସମେତ ସାରା ରାଜ୍ୟକୁ ଗର୍ବିତ କରିଥିବା ମୃଣାଳିନୀ ସାହୁ ହେଉଛନ୍ତି ଭଦ୍ରକ ଜିଲ୍ଲା ଚାନ୍ଦବାଲି ବ୍ଲକର ସୁଶାନ୍ତ ସାହୁ ଓ ମଧୁସ୍ମିତା ସାହୁଙ୍କ କନ୍ୟା । ବୟସ ଏବେ ଦୁଇ ବର୍ଷ ୧୦ ମାସ ଚାଲିଛି । କିନ୍ତୁ କାମ ଯାହା କରି ଦେଖାଇଛନ୍ତି ତାହା ସମସ୍ତଙ୍କୁ ଗର୍ବିତ କରିଛି । 'ତୁଳସୀ ଦୁଇ ପତ୍ରରୁ ବାସିବା' ପରି ମାତ୍ର ୨ ମାସରୁ ମୃଣାଳିନୀଙ୍କ ପ୍ରତିଭା ଚହଟି ଥିଲା। ମୃଣାଳିନୀ ଯେତେବେଳେ ୨ ମାସର ହୋଇଥିଲେ 'ଝୁଲରେ ନୀତାଇ ଝୁଲ ' ଗୀତକୁ ଖୁବ୍ ଆଗ୍ରହର ସହ ଶୁଣୁଥିଲେ । ଗୀତ ବନ୍ଦ ହୋଇଗଲେ, କାନ୍ଦୁଥିଲେ । ଏଥିରୁ ତାଙ୍କର ଗୀତ ପ୍ରତି ଆଗ୍ରହ ଥିବା ଜାଣିପାରିଥିଲେ ମୃଣାଳିନୀଙ୍କ ମାଆ ।

ଏହାପରେ ୯ ମାସ ଭିତରେ ପାଟି ଖୋଲିଯିବା, ପରେ ନିଜେ ସବୁ ପଚାରି ବୁଝିବା, ସବୁ କିଛି ଅତି କମ୍ ସମୟରେ ମନେ ରଖିବା ଭଳି ବିଚକ୍ଷଣତା ତାଙ୍କ ପାଖରେ ପରିଲକ୍ଷିତ ହୋଇଥିଲା । ଫଳରେ ମୃଣାଳିନୀଙ୍କ ମାଆ ଅଙ୍ଗନବାଡ଼ି କାମ ସାରି ଘରେ ରୋଷେଇ, ଟେଲର ଏବଂ ଟ୍ୟୁସନ୍‌ ପରେ ଯାହା ସମୟ ମିଳେ, ସେଥିରେ ଝିଅକୁ ଶିକ୍ଷା ଦେବାରେ ବିତାନ୍ତି । ଯଦି ତାଙ୍କୁ ଭଲ ଭାବେ ଗାଇଡ୍ କରାଯିବ ତେବେ ସେ ଆଗକୁ ଆହୁରି କିଛି ବଡ଼ କାମ କରି ଦେଖାଇ ପାରିବ ବୋଲି ମୃଣାଳିନୀଙ୍କ ବାପା କହିଛନ୍ତି ।

ଯେଉଁ ବୟସରେ ପିଲାଙ୍କ ପାଟି ଖୋଲେନି, ସେହି ବୟସରେ ଇଂରାଜୀ ଓ ଓଡ଼ିଆ ଶବ୍ଦକୁ ବୁଝିବା ନିଶ୍ଚିତ ରୂପେ ବିଚକ୍ଷଣତା । ମୃଣାଳିନୀ ବଡ଼ ହୋଇ ଏକାଧିକ ସୁନାମ ଅର୍ଜନ କରନ୍ତୁ, ଏତିକି ହିଁ କାମନା ।