ଦିନେ ଦାଦନ ଖଟୁଥିଲେ, ଏବେ କୁକୁଡ଼ା ଚାଷ କରି ଭଲ ଦୁଇ ପଇସା ରୋଜଗାର କରୁଛନ୍ତି । କରୋନା ଆରମ୍ଭ ପୂର୍ବରୁ ବାହାର ରାଜ୍ୟକୁ ଦାଦନ ଖଟିବାକୁ ଯାଇଥିଲେ । କିନ୍ତୁ ମହାମାରୀ ବେଳେ ଘରକୁ ପୁଣି ଘରକୁ ଫେରି ଆସିଲେ । ଆଉ ଘରକୁ ଆସିବା ପରେ ସରକାରୀ ଯୋଜନାର ସାହାଯ୍ୟ ନେଇ କରୁଛନ୍ତି କୁକୁଡ଼ା ଚାଷ ।
ସରକାରୀ ଯୋଜନାର ସଫଳତା ପାଇଁ ସରକାରୀ ଅଧିକାରୀଙ୍କ ଆନ୍ତରିକତା ହିଁ ମୂଳ । ଆର୍ଥାତ୍ ଅଧିକାରୀଙ୍କ ଆନ୍ତରିକତା ଥିଲେ ହିଁ ସରକାରୀ ଯୋଜନାର ସଫଳ ରୂପାୟନ ସମ୍ଭବ । ଏଭଳି କିଛି ପ୍ରମାଣିତ କରି ଦେଖାଇଛନ୍ତି ଖପ୍ରାଖୋଲ ବ୍ଲକ ପ୍ରାଣୀ ଚିକିତ୍ସାଧିକାରୀ ଡାକ୍ତର ସୁଜିତ ଶତପଥୀ । ବାହାର ରାଜ୍ୟକୁ ଦାଦନ ଯାଇ ଅନେକ ନିର୍ଯାତନାର ଶିକାର ହେଉଥିଲେ ଦାଦନ ଶ୍ରମିକ । ଇଟାଭାଟିରେ କାମ କରିବା ସମୟରେ କେତେବେଳେ ଜୀବନ ମଧ୍ୟ ଚାଲି ଯାଉଥିଲା ।
Also Read
ଏହି ସବୁ ସମସ୍ୟାକୁ କ୍ୱାରେଣ୍ଟାଇନ ସମୟରେ ଶ୍ରମିକଙ୍କୁ ବୁଝାଇଥିଲେ ସୁଜିତ । ପରେ ସରକାରୀ ଯୋଜନାରେ ସେମାନଙ୍କୁ ସାମିଲ କରି ରୋଜଗାରର ପନ୍ଥା ଦେଖାଇବାର ପ୍ରତିଶ୍ରୁତି ବି ଦେଇଥିଲେ । ଆଉ ପରେ ନିଜ ପ୍ରତିଶ୍ରୁତ ମଧ୍ୟ ପାଳନ କରିଥିଲେ । ଏବେ ଦାଦନ ଶ୍ରମିକରୁ କୁକୁଡ଼ା ଚାଷୀ ହୋଇଥିବା ଖପ୍ରାଖୋଲ ବ୍ଲକର ଅନେକ ଗରିବ ହିତାଧିକାରୀ ବେଶ୍ ଖୁସିରେ ଅଛନ୍ତି ।
ବଲାଙ୍ଗୀର ଜିଲ୍ଲା ଖପ୍ରାଖୋଲ ବ୍ଲକର ସର୍ଗିପାଲି, ବାଘଝରନ, ନାନ୍ଦୁପଲା, ଡମନିମାଲ ଏବଂ ଭଟଲି ଭଳି ଅନେକ ଗାଁର ଦାଦନ ଶ୍ରମିକଙ୍କୁ ମିଳିଛି ସରକାରୀ ସହୟତା । ହିତାଧିକାରୀଙ୍କୁ ପ୍ରାଣୀ ସମ୍ପଦ ବିକାଶ ବିଭାଗ ଦ୍ୱାରା ବ୍ରଏଲର କୁକୁଡ଼ା ଚାଷ ପାଇଁ ସହଯୋଗ କରାଯାଇଛି । ଏହି ଯୋଜନାରେ ଏକ ଲକ୍ଷ ୮୦ ହଜାର ଟଙ୍କା ଖର୍ଚ୍ଚ ହେଉଥିବା ବେଳେ ୭୨ ହଜାର ଟଙ୍କାର ସରକାରୀ ରିହାତି ମଧ୍ୟ ରହିଛି । ଯାହା ଗରିବ ହିତାଧିକାରୀଙ୍କୁ ସହାୟକ ହେଉଛି । ମାତ୍ର ୨ ମାସ ମଧ୍ୟରେ ୪୦ ହଜାର ଟଙ୍କା ଖର୍ଚ୍ଚ କରି ୬୦ ହଜାର ଟଙ୍କା ପର୍ଯ୍ୟନ୍ତ ଲାଭ ପାଉଥିବା ଜଣାଇଛନ୍ତି ଚାଷୀ । ଏପରିକି ସେମାନେ ଆଉ ଦାଦନ ଯିବେ ନାହିଁ ବୋଲି ଶପଥପାଠ ମଧ୍ୟ କରିଥିବା ଜଣାପଡ଼ିଛି ।
ତେବେ ଏ ବିଷୟରେ ଖପ୍ରାଖୋଲ ବ୍ଲକ ପ୍ରାଣୀ ଚିକିତ୍ସାଧିକାରୀ ଡାକ୍ତର ସୁଜିତ ଶତପଥୀଙ୍କ କହିବାନୁଯାୟୀ, ପ୍ରଥମେ ସେମାନଙ୍କୁ ସଚେତନତା ସଭା ମାଧ୍ୟମରେ ସରକାରୀ ଯୋଜନା ବିଷୟରେ ଜଣାଇଥିଲେ । ପରେ ସେମାନେ ଏଥିପାଇଁ ଆଗ୍ରହ ପ୍ରକାଶ କରିଥିଳେ । ତେବେ ଡାକ୍ତରଙ୍କ ଏଭଳି ପ୍ରୟାସ ପାଇଁ କେବଳ ଖପ୍ରାଖୋଲ ନିୁହେଁ ବଲାଙ୍ଗିର ଜିଲ୍ଲାର ପ୍ରଶାସନିକ ଅଧିକାରୀ ଏବଂ ସଧାରଣ ଜନତାଙ୍କ ଠାରୁ ବେଶ ପ୍ରଶଂସା ପାଉଛନ୍ତି ।