World Vegetarian Day 2023 : ହାଡ ଏବଂ ମାଂସପେଶୀକୁ ମଜବୁତ କରେ ଶାକାହାର ଖାଦ୍ୟ

କୁହାଯାଏ “ସଣ୍ଡେ ହୋ ୟା ମଣ୍ଡେ… ରୋଜ୍ ଖାଓ ଅଣ୍ଡେ”। ଶରୀରରେ ପ୍ରୋଟିନ୍ ଏବଂ କ୍ୟାଲୋରୀ ପାଇଁ ପ୍ରାୟତଃ ଏଭଳି ପ୍ରଚାର କରାଯିବା ଦେଖାଯାଏ ଏବଂ ଶୁଣାଯାଏ। କିନ୍ତୁ, ଯଦି ଆପଣ ଶାକାହାରୀ ତେବେ ଆପଣ ବୁଟ, ସୋୟାବିନ୍, ମୁଗ ଏବଂ କ୍ଷୀରରୁ ଅଧିକ ଲାଭ ପାଇପାରିବେ। ଏଗୁଡ଼ିକରେ ଅଣ୍ଡା ଅପେକ୍ଷା ଅଧିକ ପୋଷକ ତତ୍ତ୍ୱ ଥାଏ। ଡାକ୍ତର ଏବଂ ଡାଏଟିସିଆନମାନେ ମଧ୍ୟ ବିଶ୍ୱାସ କରନ୍ତି ଯେ ଶସ୍ୟରେ ମାଂସହାର ଅପେକ୍ଷା ଶାକାହାରରେ ଅଧିକ ଫାଇବର ଥାଏ। ଏଥିରେ ରୋଗ ପ୍ରତିରୋଧକ ଶକ୍ତି ଅଧିକ। ଶାକାହାର ସେବନ ଦ୍ୱାରା ପେଟ ରୋଗ ମଧ୍ୟ କମିଯାଏ।

ଅନେକ ଲୋକ ଭାବନ୍ତି ମାଂସ, ମାଛ ଏବଂ ଅଣ୍ଡାରେ ଅନ୍ୟ ପୋଷକ ତତ୍ତ୍ୱ ସହିତ ପ୍ରୋଟିନ୍ ଏବଂ କ୍ୟାଲୋରୀ ଭରପୂର ପରିମାଣରେ ଥାଏ। ଡାଏଟିସିଆନ୍‌ଙ୍କ ମତରେ କିନ୍ତୁ ତାହା ନୁହେଁ। ସେମାନେ କୁହନ୍ତି ଯେ ଶାକାହାରୀମାନେ ଏମାନଙ୍କ ଅପେକ୍ଷା ଅଧିକ ପୋଷକ ତତ୍ତ୍ୱ ପାଆନ୍ତି। ତେବେ ଆସନ୍ତୁ ଆଜି ‘ବିଶ୍ୱ ଶାକାହାରୀ ଦିବସ’ରେ ଶାକାହାରର ଉପକାର ବିଷୟରେ ଜାଣିନେବା।

ଡାଏଟିସିଆନ୍‌ଙ୍କ ମତରେ ୧୦୦ ଗ୍ରାମ ଓଜନର ଅଣ୍ଡା (୨ଟା ଅଣ୍ଡା) ୧୪ ଗ୍ରାମ ପର୍ଯ୍ୟନ୍ତ ପ୍ରୋଟିନ୍, ୧୭୦ କିଲୋ କ୍ୟାଲୋରୀ, ୬୦ ମିଗ୍ରା କ୍ୟାଲସିୟମ୍ ଏବଂ ୨.୧ ମିଗ୍ରା ଲୌହ ମିଳିଥାଏ। ସମାନ ଓଜନର ୧୦୦ ଗ୍ରାମ ମୁଗ, ସୋୟାବିନ୍, ବୁଟ ଏବଂ ଏହିଭଳି ଅନ୍ୟାନ୍ୟ ଶସ୍ୟରୁ ୨୦ ଗ୍ରାମ ପର୍ଯ୍ୟନ୍ତ ପ୍ରୋଟିନ୍, ୩୨୫ କିଲୋ କ୍ୟାଲୋରୀ, ୪-୬ ମିଗ୍ରା ଲୌହ ଏବଂ ୧୨୦-୧୭୦ ମିଗ୍ରା କ୍ୟାଲସିୟମ୍ ମିଳିଥାଏ। ଏସବୁକୁ ପାଣିରେ ଭିଜାଇ ଖାଇବା ଦ୍ୱାରା ଏଥିରେ ଭିଟାମିନ୍ ବି-କମ୍ପ୍ଲେକ୍ସ ଏବଂ ଏନ୍‌ଜାଇମ୍ ସକ୍ରିୟ ହୋଇଯାଏ, ଯାହା ଖୁବ ଲାଭଦାୟକ ହୋଇଥାଏ।

ଦ୍ରୁତ ଗତିରେ ବଢେ ପ୍ରତିରୋଧକ ଶକ୍ତି:

ହୋମିଓପାଥିକ ବିଜ୍ଞାନ ଅନୁସାରେ ହାଡ ଯନ୍ତ୍ରଣା ଭଳି ଅନେକ ରୋଗରେ ପୀଡିତ ରୋଗୀଙ୍କୁ ଔଷଧ ସହିତ ମୁଗ, ସୋୟାବିନ୍, ବୁଟ ଖାଇବା ସହିତ ପୁଷ୍ଟିକର ଖାଦ୍ୟ ଖାଇବାକୁ ପରାମର୍ଶ ଦିଆଯାଏ। ଏହା ଦ୍ୱାରା ରୋଗୀ ଶୀଘ୍ର ସୁସ୍ଥ ହୁଏ ଏବଂ ରୋଗ ପ୍ରତିରୋଧକ ଶକ୍ତି ମଧ୍ୟ ଦ୍ରୁତ ଗତିରେ ବୃଦ୍ଧି ପାଏ।

ହାଡ ଏବଂ ମାଂସପେଶୀକୁ ମଜବୁତ କରେ:

ଫିଜିଓଥେରାପିଷ୍ଟଙ୍କ ମତରେ ବୁଟ, ଡାଲି, ସୋୟାବିନ୍, କ୍ଷୀର, ଫଳ, ସବୁଜ ପନିପରିବା ଏବଂ ଅନ୍ୟାନ୍ୟ ଶସ୍ୟରେ ଭିଟାମିନ୍, ପ୍ରୋଟିନ୍ ଏବଂ ଅନ୍ୟାନ୍ୟ ପୋଷକ ତତ୍ତ୍ୱ ଭରପୂର ଥାଏ। ଏହା ହାଡ ଏବଂ ମାଂସପେଶୀକୁ ମଜବୁତ କରେ। ବ୍ୟାୟାମ କରୁଥିବା ଯୁବପିଢିମାନଙ୍କ ମଧ୍ୟରେ ଏହି ଧାରା ଦ୍ରୁତ ଗତିରେ ବୃଦ୍ଧି ପାଉଛି।