World Alzheimer's Day 2024 : ଆପଣ ସବୁ କଥା ଭୁଲି ଯାଉଛନ୍ତି କି...ହୋଇପାରେ ଏହି ରୋଗ, ଜାଣନ୍ତୁ ଘରୋଇ ଉପଚାର

ପ୍ରତିବର୍ଷ ସେପ୍ଟେମ୍ବର ୨୧ରେ ‘ବିଶ୍ୱ ଆଲ୍‌ଜାଇମର ଦିବସ’ ପାଳନ କରାଯାଏ। ଆଲ୍‌ଜାଇମର୍‌ ରୋଗ (AD) ଏବଂ ଅନ୍ୟାନ୍ୟ ଡିମେନ୍‌ସିଆ ପାଇଁ ଆନ୍ତର୍ଜାତୀୟ ସଚେତନତା ସୃଷ୍ଟି କରିବା ପାଇଁ ଏହି ଅଭିଯାନ ପାଳନ କରାଯାଏ। ଏଥର ‘ବିଶ୍ୱ ଆଲ୍‌ଜାଇମର୍‌ ଦିବସ’ର ବିଷୟବସ୍ତୁ ହେଉଛି "ଡିମେନ୍‌ସିଆକୁ ଜାଣ, ଆଲଜାଇମର୍‌କୁ ଜାଣ"।

ଆକଳନ କରାଯାଇଛି ଯେ ବିଶ୍ୱରେ ୫୭ ମିଲିୟନରୁ ଅଧିକ ଲୋକ ଆଲ୍‌ଜାଇମର୍‌ ରୋଗରେ ପୀଡିତ। ଏଥିସହିତ, ଭାରତରେ ଲଙ୍ଗିଟେଡେନାଲ୍ ଏଜିଂ ଷ୍ଟଡି ଇନ୍ ଇଣ୍ଡିଆ (LASI) ର ତଥ୍ୟ ଅନୁଯାୟୀ, ୬୦ ବର୍ଷରୁ ଅଧିକ ବୟସର ୮.୮ ମିଲିୟନ୍ ଭାରତୀୟ ଏହି ମାନସିକ ରୋଗରେ ପୀଡିତ ଅଛନ୍ତି। ଏପରି ପରିସ୍ଥିତିରେ, ଏହି ରୋଗର କାରଣ, ଲକ୍ଷଣ ଏବଂ ଚିକିତ୍ସା କ’ଣ ଆସନ୍ତୁ ଜାଣିବା।

ତେବେ ଭୁଲିଯିବା ସମସ୍ୟା, ଠିକ୍ ସମୟରେ କୌଣସି ଜିନିଷ କିମ୍ବା କାହାର ନାଁ ମନେ ନ ପଡିବା ଏକ ସ୍ୱାଭାବିକ କଥା। କିନ୍ତୁ ଯଦି ବାରମ୍ବାର ଏହି ସମସ୍ୟାର ସମ୍ମୁଖୀନ ହେବାକୁ ପଡେ ଏବଂ ଏହା ଦୈନନ୍ଦିନ କାର୍ଯ୍ୟକଳାପକୁ ପ୍ରଭାବିତ କରେ, ତେବେ ଏଥିପ୍ରତି ଧ୍ୟାନ ଦେବା ଜରୁରୀ। ଏହା କିଛି ନ୍ୟୁରୋ-ସାଇକିଆଟ୍ରିକ୍ ସମସ୍ୟା ହେତୁ ମଧ୍ୟ ହୋଇପାରେ।

ଲେଖିବା କିମ୍ବା କହିବା ସମୟରେ କୌଣସି ଜିନିଷ ବା ଲୋକଙ୍କ ନାଁ ମନେ ନ ପଡିବା ମେଡିକାଲ ଭାଷାରେ 'ଏନୋମିୟା'ର ସମସ୍ୟା କୁହାଯାଏ। ଏହି ବ୍ୟାଧିରେ ପୀଡିତ ଲୋକମାନେ ପ୍ରାୟତଃ ଅନୁଭବ କରନ୍ତି ଯେ ସେମାନଙ୍କର ଜିଭରେ ଶବ୍ଦ ଅଛି କିନ୍ତୁ ସେମାନେ ସେଗୁଡିକ ପ୍ରକାଶ କରିବାରେ ଅସମର୍ଥ। ଆପଣ କିମ୍ବା ଆପଣ ଜାଣିଥିବା ବ୍ୟକ୍ତିଙ୍କ ପାଖରେ ଏହି ପ୍ରକାରର ସମସ୍ୟା ଅଛି କି? କିପରି ଜାଣିବେ?

ଆଲ୍‌ଜାଇମ୍‌ର ଲକ୍ଷଣ:

• ଏହି ରୋଗର ଶିକାର ହେବା ପୂର୍ବରୁ କିଛି ସାଧାରଣ ଲକ୍ଷଣ ଦେଖାଯାଏ, ଯାହା ବିଷୟରେ ଆପଣ ସଚେତନ ହେବା ଉଚିତ...
• ଏହି ରୋଗ ଦ୍ୱାରା ପ୍ରଭାବିତ ହେଲେ କମ୍ ନିଦ ହୁଏ
• ଚିନ୍ତା ବଢିବାରେ ଲାଗେ
• ସ୍ମୃତି ଦୁର୍ବଳ ହେବାକୁ ଲାଗେ
• ଗୋଟିଏ ଜିନିଷକୁ ବାରମ୍ବାର ପୁନରାବୃତ୍ତି କରିବା
• ନିତ୍ୟକର୍ମ କାର୍ଯ୍ୟଗୁଡ଼ିକୁ ମନେରଖିବାରେ ଅସୁବିଧା
• ଧ୍ୟାନ ଦେବାରେ ଅସୁବିଧା
• ଅର୍ଥ ପରିଚାଳନାରେ ଅସୁବିଧା
• ସଠିକ୍ ଭାବରେ ପୋଷାକ ପିନ୍ଧିବାରେ ସକ୍ଷମ ନ ହେବା ମଧ୍ୟ ଏହି ରୋଗର ଲକ୍ଷଣ ହୋଇପାରେ

ଆଲ୍‌ଜାଇମ୍‌ର ବିପଦ:

ତେବେ ସ୍ୱାସ୍ଥ୍ୟ ବିଶେଷଜ୍ଞଙ୍କ ଅନୁଯାୟୀ ମହିଳାମାନଙ୍କଠାରେ ଆଲଜାଇମର ବିପଦ ଅଧିକ ଦେଖାଯାଏ। ପ୍ରତି ୧୦ ଜଣ ମଧ୍ୟରୁ ୬ ଜଣ ମହିଳା ଏହି ଡିମେନ୍‌ସିଆରେ ପୀଡିତ। ପ୍ରକାଶଥାଉ ଯେ ବିଶ୍ୱରେ ଆଲ୍‌ଜାଇମ୍‌ର ରୋଗରେ ପୀଡିତ ଦେଶମାନଙ୍କ ମଧ୍ୟରେ ଭାରତ ତୃତୀୟ ସ୍ଥାନରେ ରହିଛି।

ଘରୋଇ ଉପଚାର:

ଏହି ରୋଗକୁ ଭଲ କରିବା ପାଇଁ ଆପଣ ହଳଦି ଖାଇପାରିବେ। ଆଲ୍‌ଜାଇମର୍‌ ଉପଶମ ପାଇଁ ଏହା ଏକ ଭଲ ଘରୋଇ ଉପଚାର ଭାବରେ ବିବେଚନା କରାଯାଏ। ଏହା ବ୍ୟତୀତ ବହି ପଢିବା, ସଙ୍ଗୀତ ଶୁଣିବା; ଏହି ରୋଗକୁ ଭଲ କରିବା ପାଇଁ ମଧ୍ୟ ଏକ ଉପାୟ ହୋଇପାରେ।

ଏହା ବ୍ୟତୀତ, ଡ୍ୟାନ୍ସ, ଚିତ୍ରକଳା ପ୍ରଦର୍ଶନୀ ପରିଦର୍ଶନ କରିବା ଏବଂ ସାଙ୍ଗମାନଙ୍କ ସହିତ ଅଧ୍ୟୟନ କରନ୍ତୁ। ଏହି ସମସ୍ତ ପଦ୍ଧତିଗୁଡ଼ିକ ନିଜର ଶିକ୍ଷଣ ଶକ୍ତିକୁ ଦୃଢ କରିବ।