Bolbam 2023: ଶିବଙ୍କୁ ପ୍ରସନ୍ନ କରିବା ପାଇଁ କାଉଡିଆମାନେ କାହିଁକି ଦିଅନ୍ତି 'ବୋଲବମ୍' ନାରା

କାଉଡି ଯାତ୍ରା ବା ବୋଲ୍‌ବମ୍‌ ଯାତ୍ରା ହେଉଛି ଏକ ବାର୍ଷିକ ତୀର୍ଥଯାତ୍ରା ଯାହା ଜୁଲାଇ ଏବଂ ଅଗଷ୍ଟ ମାସରେ ଏବଂ ହିନ୍ଦୁ କ୍ୟାଲେଣ୍ଡର ଅନୁଯାୟୀ ଶ୍ରାବଣ ମାସରେ ଆରମ୍ଭ ହୋଇଥାଏ। ଏହି ଯାତ୍ରାରେ ଶିବ ଭକ୍ତମାନେ କଳସିରେ ଜଳ ଭର୍ତ୍ତି ବାହୁଙ୍ଗି ସାହାଯ୍ୟରେ ପବିତ୍ର ଜଳ ନେଇ ବିଭିନ୍ନ ଶୈବପୀଠକୁ ଯାତ୍ରା କରିଥାନ୍ତି।

ସନାତନ ଧର୍ମର ପ୍ରାଚୀନ ବିଶ୍ୱାସ ଅନୁଯାୟୀ କେବଳ ସ୍ୱୟମ୍ଭୁ ଶିବଲିଙ୍ଗ ଏବଂ ଦ୍ୱାଦଶ ଜ୍ୟୋତିର୍ଲିଙ୍ଗକୁ ଗଙ୍ଗା ଜଳରେ ଅଭିଷିକ୍ତ କରାଯାଏ। କିନ୍ତୁ ବର୍ତ୍ତମାନ ସମୟରେ ଲୋକମାନେ ମଧ୍ୟ ନିଜ ଘରେ ଥିବା ଶିବଲିଙ୍ଗଙ୍କୁ ଗଙ୍ଗା ଜଳରେ ଅଭିଷେକ କରୁଛନ୍ତି। କିନ୍ତୁ ଏହି ଯାତ୍ରାରେ ଶହ ଶହ କିଲୋମିଟର ଦୂର ଖାଲି ପାଦରେ ଚାଲି ସଂପୂର୍ଣ୍ଣ ଶୁଦ୍ଧତା ସହିତ ଗଙ୍ଗା ଜଳକୁ ଶିବଲିଙ୍ଗରେ ଢଳାଯାଏ।

ବର୍ତ୍ତମାନର ବ୍ୟସ୍ତବହୁଳ ଜୀବନରେ ସମୟର ଅଭାବ ହେତୁ କିଛି ଲୋକ ଯାନବାହାନରେ ଏହି ଯାତ୍ରା ମଧ୍ୟ କରୁଛନ୍ତି। କିନ୍ତୁ ପୁରୁଣା ଦିନରେ ଲୋକମାନେ ଏହି କଷ୍ଟଦାୟକ ଯାତ୍ରାକୁ କେବଳ ଖାଲି ପାଦରେ କରୁଥିଲେ। କାଉଡି ଯାତ୍ରା ସମୟରେ ବିଭିନ୍ନ ଗୋଷ୍ଠୀ ଏବଂ ନାଗରିକ ସଂଗଠନ ବିଭିନ୍ନ ସ୍ଥାନରେ କାଉଡିଆଙ୍କ ବିଶ୍ରାମ ଓ ଭୋଜନ ପାଇଁ ଶିବିରମାନ ସ୍ଥାପନ କରିଥାନ୍ତି। ଏହା ଭାରତୀୟ ସଂସ୍କୃତିରେ ମାନବ ସେବାର ପ୍ରାଚୀନ ଆଦର୍ଶକୁ ସୂଚାଇଥାଏ।

ଅଧିକ ପଢ଼ନ୍ତୁ: ଆପଣ ପ୍ରଥମ ଥର ପାଇଁ ବୋଲ୍‌ବମ୍‌ ଯାତ୍ରା କରୁଛନ୍ତି କି; ଜାଣନ୍ତୁ ଏହାର ନିୟମ

ଯେଉଁମାନେ ବୋଲ୍‌ବମ୍‌ ଯାତ୍ରା କରନ୍ତି, ସେମାନେ ପବିତ୍ର ନଦୀର ଜଳକୁ କାନ୍ଧରେ ନେଇ ଶିବଲିଙ୍ଗ ଉପରେ ଜଳାଭିଷେକ କରନ୍ତି। ପ୍ରତି ସୋମବାର ଏହି ଜଳାଭିଷେକ କଲେ ମହାଦେବ ସନ୍ତୁଷ୍ଟ ହୁଅନ୍ତି ବୋଲି ବିଶ୍ୱାସ ରହିଛି। କାଉଡିଆମାନେ ଜଳ ନେଇ ଯାତ୍ରା ସମୟରେ ‘ବୋଲ୍‌ବମ୍‌’ ନାରା ଦେଇଥାନ୍ତି।

କାହିଁକି ଦିଅନ୍ତି 'ବୋଲବମ୍' ନାରା:

ପୌରାଣିକ କାହାଣୀ ଅନୁସାରେ ସ୍ୱାମୀଙ୍କୁ ଅପମାନ ହେବାରୁ ମାତା ସତୀ ରାଜା ଦକ୍ଷଙ୍କ ଯଜ୍ଞରେ ନିଜ ଶରୀରକୁ ତ୍ୟାଗ କରିଦେଲେ। ଏହି ଖବର ଭଗବାନ ଶିବ ଜାଣିବା ପରେ ସେଠାରେ ପହଞ୍ଚି ପ୍ରଥମେ ଦକ୍ଷଙ୍କ ବେକକୁ କାଟିଦେଲେ। ପରେ ତାଙ୍କୁ ପୁନର୍ଜୀବିତ କରିବା ପାଇଁ ଏକ ଛେଳିର ମୁଣ୍ଡକୁ ଦକ୍ଷଙ୍କ ଶରୀରରେ ଲଗେଇଥିଲେ।

ରାଜା ଦକ୍ଷ ଜୀବିତ ହେବା ପରେ ତାଙ୍କ ପାଟିରୁ ଯେଉଁ ଛେଳିର ବାଣୀ ବାହାରିଲା ଶଙ୍କରଙ୍କୁ ତାହା ଅତ୍ୟନ୍ତ ପ୍ରିୟ ଲାଗିଲା। ଭଗବାନ ଶଙ୍କର ବହୁତ ପ୍ରସନ୍ନ ହେଲେ। ସେବେଠାରୁ ଭକ୍ତମାନେ 'ବମ୍‌-ବମ୍‌ ହର୍‌-ହର୍‌ ବମ୍‌-ବମ୍‌' ଜପ କରି ଭଗବାନ ଶଙ୍କରଙ୍କୁ ପ୍ରସନ୍ନ କରୁଛନ୍ତି। ତେଣୁ କାଉଡିଆମାନେ ଏହି ଯାତ୍ରା ବେଳେ 'ବୋଲବମ୍' ନାରା ଦେଇଥାନ୍ତି।

ଅଧିକ ପଢ଼ନ୍ତୁ: ଭଗବାନ ଶିବକୁ କାହିଁକି ଘୃଣା କରନ୍ତି ରାଜା ଦକ୍ଷ; ଜାଣନ୍ତୁ ଏହା ପଛର ତିନି କାରଣ