International Youth Day 2024: ଯୁବକମାନଙ୍କ ବିକାଶ ପାଇଁ ସରକାର ଏହି ପଦକ୍ଷେପ ନେବା ଜରୁରୀ

ରାଷ୍ଟ୍ର ନିର୍ମାଣ, ବିକାଶ ଏବଂ ପ୍ରଗତି ସବୁବେଳେ ଏକ ଦେଶର ଯୁବକଙ୍କ ଅବଦାନ ଉପରେ ନିର୍ଭର କରେ। ସାମାଜିକ, ଅର୍ଥନୈତିକ ଏବଂ ରାଜନୈତିକ ଅବସ୍ଥା ପାଇଁ ଯୁବକମାନଙ୍କ ଭୂମିକା ଗୁରୁତ୍ୱପୂର୍ଣ୍ଣ। ଏଭଳି ପରିସ୍ଥିତିରେ ପ୍ରତି ସରକାର ଯୁବକମାନଙ୍କ ବିକାଶ ଏବଂ ସେମାନଙ୍କ ଜୀବନ ସହ ଜଡିତ ସମସ୍ୟା ବୁଝିବା ଜରୁରୀ । ଯୁବକମାନଙ୍କ ସମସ୍ୟା ବିଷୟରେ ଜାଣିବା ପରେ ତା’ର ସମାଧାନର ବାଟ ଖୋଜିବା ଉଚିତ, ଯାହାଫଳରେ ସେମାନେ ସମାଜ ପାଇଁ ସ୍ୱର ଉତ୍ତୋଳନ କରିପାରିବେ।

ଯୁବକମାନଙ୍କ ମାନସିକ ଏବଂ ସାମାଜିକ ବିକାଶ ପାଇଁ ପ୍ରତିବର୍ଷ ଅଗଷ୍ଟ ମାସରେ ଅନ୍ତର୍ଜାତୀୟ ଯୁବ ଦିବସ ପାଳନ କରାଯାଏ। ଯୁବ ଦିବସ ମାଧ୍ୟମରେ ଯୁବକମାନେ ସେମାନଙ୍କର ସ୍ୱର, କାମ ଏବଂ ବିଶ୍ୱସ୍ତରରେ ସେମାନଙ୍କର ଗୁରୁତ୍ୱପୂର୍ଣ୍ଣ ପଦକ୍ଷେପଗୁଡ଼ିକ ବିଷୟରେ ଜାଣିବା ପାଇଁ ଏକ ସୁଯୋଗ ପାଆନ୍ତି। ତେବେ ଏହି ଲେଖା ମାଧ୍ୟମରେ, ଅନ୍ତର୍ଜାତୀୟ ଯୁବ ଦିବସ କାହିଁକି ଏବଂ କିପରି ପାଳନ କରାଯାଏ ଜାଣିବା ସହିତ ଏହି ଦିନର ଇତିହାସ, ମହତ୍ତ୍ୱ ଏବଂ ଚଳିତ ବର୍ଷର ବିଷୟବସ୍ତୁ କ’ଣ ଜାଣିବା।

ପ୍ରତିବର୍ଷ ୧୨ ଅଗଷ୍ଟରେ ‘ଅନ୍ତର୍ଜାତୀୟ ଯୁବ ଦିବସ’ ପାଳନ କରାଯାଏ। ଯୁବକମାନଙ୍କର ସ୍ୱର, କାମ ଏବଂ ପ୍ରୟାସକୁ ଆଲୋକିତ କରିବା ଏବଂ ସେମାନଙ୍କ ବିକାଶ ପାଇଁ ସୁଯୋଗକୁ ପ୍ରୋତ୍ସାହିତ କରିବା ପାଇଁ ଦିନଟି ଏକ ଗୁରୁତ୍ୱପୂର୍ଣ୍ଣ ଅବସର।

ପ୍ରଥମ ଯୁବ ଦିବସ:

‘ଅନ୍ତର୍ଜାତୀୟ ଯୁବ ଦିବସ’ ପ୍ରଥମେ ୧୨ ଅଗଷ୍ଟ ୨୦୦୦ରେ ପାଳନ କରାଯାଇଥିଲା। ମିଳିତ ଜାତିସଂଘର ସାଧାରଣ ସଭା ୧୭ ଡିସେମ୍ବର ୧୯୯୯ରେ ଏହି ଦିନ ପାଳନ କରିବାକୁ ଏକ ସଂକଳ୍ପ ପାରିତ କରିଥିଲା। ଏହା ପରେ ୨୦୦୦ରେ ପ୍ରଥମ ଥର ପାଇଁ ‘ଅନ୍ତର୍ଜାତୀୟ ଯୁବ ଦିବସ’ ପାଳନ କରାଯାଇଥିଲା, ଯାହା ଆଜି ପର୍ଯ୍ୟନ୍ତ ପ୍ରତ୍ୟେକ ବର୍ଷ ୧୨ ଅଗଷ୍ଟରେ ପାଳନ କରାଯାଉଛି।

ଇତିହାସ:

୧୯୮୫କୁ "ଅନ୍ତର୍ଜାତୀୟ ଯୁବ ବର୍ଷ" ଭାବରେ ଘୋଷଣା କରାଯାଇଥିଲା। ଏହି ବର୍ଷର ସଫଳତାକୁ ଦୃଷ୍ଟିରେ ରଖି ୧୯୯୫ରେ ମିଳିତ ଜାତିସଂଘ "ଯୁବକମାନଙ୍କ ପାଇଁ ବିଶ୍ୱ କାର୍ଯ୍ୟକ୍ରମ" ଆରମ୍ଭ କରିଥିଲା। ୧୯୯୮ ମସିହାରେ ପର୍ତ୍ତୁଗାଲର ଲିସବନ୍‌ଠାରେ ଆୟୋଜିତ ହୋଇଥିବା ବିଶ୍ୱ ଯୁବ ସମ୍ମିଳନୀରେ ଯୁବକଙ୍କ ବିକାଶ ଏବଂ ଅଂଶଗ୍ରହଣର ଗୁରୁତ୍ୱ ଉପରେ ଜୋର ଦିଆଯାଇଥିଲା। ପରବର୍ତ୍ତୀ ବର୍ଷ ୧୯୯୯ରେ ମିଳିତ ଜାତିସଂଘର ସାଧାରଣ ସଭା ୧୨ ଅଗଷ୍ଟକୁ ‘ଅନ୍ତର୍ଜାତୀୟ ଯୁବ ଦିବସ’ ଭାବରେ ଘୋଷଣା କଲା। ଏହି ପ୍ରସ୍ତାବ ବିଶ୍ୱ ଯୁବ ସମ୍ମିଳନୀ ଏବଂ "ଯୁବକମାନଙ୍କ ପାଇଁ ବିଶ୍ୱ କାର୍ଯ୍ୟକ୍ରମ" ର ସୁପାରିଶର ଫଳାଫଳ ଥିଲା।

କାହିଁକି ହୁଏ ପାଳନ:

‘ଅନ୍ତର୍ଜାତୀୟ ଯୁବ ଦିବସ’ ପାଳନ କରିବାର ମୁଖ୍ୟ ଉଦ୍ଦେଶ୍ୟ ହେଉଛି ଯୁବକମାନଙ୍କର ଭୂମିକା ଏବଂ ଅବଦାନକୁ ଜାଣିବା ଏବଂ ଉତ୍ସାହିତ କରିବା। ଏହି ଦିନର ଉଦ୍ଦେଶ୍ୟ ହେଉଛି ଯୁବକମାନଙ୍କ ସହ ଜଡିତ ସମସ୍ୟାଗୁଡିକ ଉପରେ ସଚେତନତା ସୃଷ୍ଟି କରିବା ଏବଂ ସେମାନଙ୍କ ବିକାଶ ପାଇଁ ଏକ ଅନୁକୂଳ ପରିବେଶ ସୃଷ୍ଟି କରିବା।

ଥିମ୍:

ପ୍ରତ୍ୟେକ ବର୍ଷ ଏକ ନିର୍ଦ୍ଦିଷ୍ଟ ଥିମ୍‌କୁ ନେଇ ‘ଅନ୍ତର୍ଜାତୀୟ ଯୁବ ଦିବସ’ ପାଳନ କରାଯାଏ। ଚଳିତ ବର୍ଷର ଥିମ୍ ହେଉଛି 'କ୍ଲିକ୍ ଠାରୁ ପ୍ରଗତି ପର୍ଯ୍ୟନ୍ତ: ସ୍ଥାୟୀ ବିକାଶ ପାଇଁ ଯୁବ ଡିଜିଟାଲ୍ ମାର୍ଗ'। ତେବେ ସ୍ଥାୟୀ ବିକାଶ ଲକ୍ଷ୍ୟ ହାସଲ ଦିଗରେ ଅଗ୍ରଗତି କରିବାକୁ ଡିଜିଟାଲ୍ ଟେକ୍ନୋଲୋଜିକୁ କିପରି ଉପଯୋଗ କରାଯିବ ଏହି ବିଷୟଗୁଡିକ ଉପରେ ଧ୍ୟାନ ଦିଆଯାଇଛି।

ତେବେ ଯୁବକମାନଙ୍କ ବିକାଶ ପାଇଁ ସରକାର ହିଁ ଗୁରୁତ୍ୱପୂର୍ଣ୍ଣ ଭୂମିକା ନେଇପାରିବେ। ତେବେ ଏମିତି କିଛି ପଦକ୍ଷେପ ଅଛି, ଯୁବକମାନଙ୍କ ବିକାଶ ପାଇଁ ସରକାର ନେବା ଜରୁରୀ। ଆସନ୍ତୁ ସେସବୁ ଜାଣିବା।

• ଯୁବ ନୀତି ଡିଜାଇନ୍, କାର୍ଯ୍ୟାନ୍ୱୟନ ଏବଂ ମୂଲ୍ୟାଙ୍କନରେ ଆରମ୍ଭରୁ ସମସ୍ତ ହିତାଧିକାରୀଙ୍କୁ ଜଡିତ କରିବା
• ଦେଶରେ ଯୁବ ବିକାଶର ସ୍ଥିତିର ବିବରଣୀ ପ୍ରସ୍ତୁତ କରିବା। WPAY ରେ ଅନ୍ତର୍ଭୁକ୍ତ ଯୁବ ବିକାଶ ପାଇଁ ପ୍ରାଥମିକ କ୍ଷେତ୍ରଗୁଡିକ ଏହି ବିଶ୍ଳେଷଣକୁ ସଂଗଠିତ କରିବାର ଏକ ମାଧ୍ୟମ ଭାବରେ କାର୍ଯ୍ୟ କରିପାରିବ।
• ଆବଶ୍ୟକ ମୂଲ୍ୟାଙ୍କନ ଏବଂ ପରିସ୍ଥିତିର ବିଶ୍ଳେଷଣ କରି ଯୁବକମାନଙ୍କ ସମସ୍ୟାର ସମାଧାନ କରିବା।
• ଯୁବ ନୀତି କାର୍ଯ୍ୟକାରୀ କରିବା ପାଇଁ ଏକ ସ୍ପଷ୍ଟ ଆଭିମୁଖ୍ୟର ବିକାଶ କରିବା। ଯୁବକମାନଙ୍କର ଆବଶ୍ୟକତା ଏବଂ ଉପଲବ୍ଧି ବଜେଟରେ ପ୍ରତିଫଳିତ ହେବା ଅଆବଶ୍ୟକ। ଏହା ଦ୍ୱରା ଏକ ଜାତୀୟ କାର୍ଯ୍ୟ ଯୋଜନା ପ୍ରସ୍ତୁତ କରାଯାଇପାରିବ।
• ଯୁବ ନୀତିର କାର୍ଯ୍ୟକାରିତା ପାଇଁ ଆବଣ୍ଟିତ ବଜେଟ୍ ପ୍ରତିଷ୍ଠା କରିବା ଜରୁରୀ