ବିଶ୍ୱର ସବୁଠାରୁ ଲାଭଦାୟକ ଫିଲ୍ମ; ୬ ଲକ୍ଷରେ ତିଆରି ୮୦୦କୋଟି ରୋଜଗାର

ଆଜିକାଲି ପ୍ରାୟ ସମସ୍ତଙ୍କ ନଜର ବଡ ବଜେଟର ଫିଲ୍ମ ଉପରେ। ଏହାରି ଭିତରେ କିନ୍ତୁ ଅନେକ ସ୍ୱଳ୍ପ ବଜେଟର ଫିଲ୍ମ ଅଛି ଯାହା ଆଶାଠାରୁ ଅଧିକ ବକ୍ସ ଅଫିସରେ ବଡ ସଫଳତା ହାସଲ କରିଛି। ଉଭୟ ଭାରତ ଏବଂ ବିଦେଶରେ ବଡ ବଜେଟ୍‌ର ଫିଲ୍ମ ସହ ପ୍ରତିଦ୍ୱନ୍ଦ୍ୱିତା କରି ଅନେକ ଛୋଟ ବଜେଟ୍ ଫିଲ୍ମ ବ୍ଲକବଷ୍ଟର ହୋଇପାରିଛନ୍ତି।

ଉଦାହରଣ ସ୍ୱରୂପ, ‘ଦି କାଶ୍ମୀର ଫାଇଲ’ ୧୫ କୋଟି ଟଙ୍କା ବଜେଟରେ ତିଆରି ହୋଇଥିବା ବେଳେ ଏହା ୩୪୧ କୋଟି ଟଙ୍କା ରୋଜଗାର କରିଥିଲା। କିନ୍ତୁ ୨୦୦୭ରେ ରିଲିଜ୍ ହୋଇଥିବା ଏକ ହଲିଉଡ ଫିଲ୍ମ ଯେତିକି ଲାଭ କରିଥିଲା ତାହା ତୁଳନାରେ ଏହା କିଛି ନୁହେଁ। ଏବେ ପର୍ଯ୍ୟନ୍ତ ଏହା ସବୁଠାରୁ ବଡ ଲାଭଦାୟକ ଫିଲ୍ମ ଭାବେ ରହିଛି।

୨୦୦୭ ରେ, ଚଳଚ୍ଚିତ୍ର ନିର୍ମାତା ଓରେନ୍ ପେଲି ‘ପାରାନର୍ମାଲ୍ ଆକ୍ଟିଭିଟି’ ନାମକ ଏକ ସ୍ୱଳ୍ପ ବଜେଟ’ର ହରର୍‌ ଫିଲ୍ମ ଲେଖିଥିଲେ, ସୁଟିଂ କରିଥିଲେ, ନିର୍ଦ୍ଦେଶନା ଦେଇଥିଲେ ଏବଂ ପ୍ରସ୍ତୁତ କରିଥିଲେ। ୧୯୯୯ର ହିଟ୍ ଦି ବ୍ଲେୟାର ୱିଚ୍ ପ୍ରୋଜେକ୍ଟର ଉଦାହରଣକୁ ଅନୁସରଣ କରି ଏହି ଫିଲ୍ମଟି ଫୁଟେଜ୍ ଫର୍ମାଟ୍ ବ୍ୟବହାର କରିଥିଲା ​​ଏବଂ ସମ୍ପୁର୍ଣ୍ଣ ଭାବରେ ହାତ କ୍ୟାମେରା ବା ସିସିଟିଭିରେ ସୁଟିଂ କରାଯାଇଥିଲା। ଜାତୀୟ ଗଣମାଧ୍ୟମରେ ପ୍ରକାଶିତ ଏକ ଖବର ଅନୁଯାୟୀ, ଏହି ଫିଲ୍ମଟି ମାତ୍ର ଚାରି ଜଣ ବ୍ୟକ୍ତିଙ୍କୁ ନେଇ ମାତ୍ର ୬ ଲକ୍ଷ ଟଙ୍କାର ବଜେଟ୍‌ରେ ସୀମିତ ଥିଲା। 

ଏହା ପାରାମାଉଣ୍ଟ୍ ପିକ୍ଚର୍ସ ଦ୍ୱାରା ସ୍ୱୀକୃତି ପାଇବା ପରେ, ଶେଷକୁ ପରିବର୍ତ୍ତନ କରାଯାଇଥିଲା ଏବଂ କିଛି ପୋଷ୍ଟ୍ ପ୍ରଡକ୍ସନ ୱାର୍କ ମିଶିଥିଲା। ପରେ ଏହାର ମୋଟ ବଜେଟ୍ ୯୦ ଲକ୍ଷ ଟଙ୍କାରେ ପହଞ୍ଚିଥିଲା। ଏହା ହିଟ୍ ହୋଇଥିଲା ଏବଂ ସାରା ବିଶ୍ୱରେ ପ୍ରାୟ ୮୦୦ କୋଟି ଟଙ୍କା ରୋଜଗାର କରିଥିଲା। ଏହା ସିନେମା ଇତିହାସରେ ରେକର୍ଡ କରି ସର୍ବାଧିକ ଲାଭ କରିଥିଲା।

‘ପାରାନର୍ମାଲ୍ ଆକ୍ଟିଭିଟି’ ଏକ ଫ୍ରାଞ୍ଚାଇଜ୍ ସୃଷ୍ଟି କରିଥିଲା, ଯେଉଁଥିରେ ୬ ଟି ସିକ୍ୱେଲ୍ ଏବଂ ସ୍ପିନୋଫ୍ ଥିଲା। ଏହି ଫ୍ରାଞ୍ଚାଇଜରେ ଥିବା ଏହି ୭ଟି ଫିଲ୍ମ ୨୩୦କୋଟି ଟଙ୍କାରେ ତିଆରି ହୋଇଥିବା ବେଳେ ବିଶ୍ୱରେ ମୋଟ ୭୩୨୦ କୋଟି ଟଙ୍କା ରୋଜଗାର କରିଥିଲା।

ତେବେ ‘ପାରାନର୍ମାଲ୍ ଆକ୍ଟିଭିଟି’ ପୂର୍ବରୁ, ଏହି ଟ୍ୟାଗ୍ ‘ବ୍ଲେୟାର ୱିଚ୍ ପ୍ରୋଜେକ୍ଟ’ ପାଇଁ ଲାଗୁହୋଇଥିଲା। ୧୯୯୯ରେ ୮୫ ଲକ୍ଷ ଟଙ୍କାର ବଜେଟ୍‌ରେ ନିର୍ମିତ ଏହି ଫିଲ୍ମ ସାରା ବିଶ୍ୱରେ ୧୦୪୫ କୋଟି ଟଙ୍କା ଆୟ କରିଥିଲା। ସେହିପରି ୨୦୦୩ରେ ମାତ୍ର ୧୦ ହଜାର ଟଙ୍କାରେ ନିର୍ମିତ ଫିଲ୍ମ ‘ଟାର୍ନେସନ୍’ ୫.୫ କୋଟି ଟଙ୍କା ରୋଜଗାର କରିବାରେ ସ‍କ୍ଷମ ହୋଇଥିଲା।

ଅନ୍ୟପ‍କ୍ଷରେ ୧୯୭୨ରେ ପର୍ନୋଗ୍ରାଫିକ୍ ଫିଲ୍ମ ‘ଡିପ୍ ଟ୍ରୋଟ୍’ ୧.୯ ଲକ୍ଷ ଟଙ୍କାର ବଜେଟ୍‌ରେ ନିର୍ମିତ ହୋଇଥିବା ବେଳେ ଏହା ମୋଟ ୧୭ କୋଟି ଟଙ୍କା ରୋଜଗାର କରିଥିଲା। ସେହିପରି ୧୯୭୭ରେ ହରର ଫିଲ୍ମ ‘ଇରେଜର ହେଡ୍’ ମାତ୍ର ୮୭ ହଜାର ଟଙ୍କାରେ ତିଆରି ହୋଇ ୬ କୋଟି ଟଙ୍କା ରୋଜଗାର କରିଥିଲା।