ଆସୁଛି 'ପୁଷ୍କରା': କହିବ ବାସ୍ତବ ଜୀବନର କଥା

ବିଗ୍ ସ୍କ୍ରିନରେ ବିଗ୍ ଏଂଟରଟେନମେଂଟ୍। ଖୁବଶୀଘ୍ର ବଡ ପରଦାକୁ ଆସୁଛି ଓଡ଼ିଆ ଚଳଚ୍ଚିତ୍ର ପୁଷ୍କରା । ତରଙ୍ଗ ସିନେ ପ୍ରଡକ୍ସନର ଏହା ୪୪ତମ ଅବଦାନ । ଫିଲ୍ମରେ ଅଭିନେତା ସବ୍ୟସାଚୀଙ୍କ ସହ ସୁପ୍ରିୟାଙ୍କୁ ଦେଖିବାକୁ ମିଳିବ। ଫିଲ୍ମର ନିର୍ଦ୍ଦେଶନା ଦେଇଛନ୍ତି ଶୁଭ୍ରାଂଶୁ ଦାଶ। ପୁଷ୍କରା ଏକ ଫିଲ୍ମ ନୁହଁ ବରଂ ହଜିଯାଉଥିବା ସଂସ୍କୃତି ଓ ପରମ୍ପରା ମଧ୍ୟରେ ବଂଚିଥିବା ଏକ ରହସ୍ୟମୟ ଚରିତ୍ର।

ସାହିତ୍ୟରୁ ସିନେମା.. ପୁରାପୁରି ଅରିଜିନାଲ ତଥା ଏକ ଜୀବନ୍ତ କାହାଣୀ। ବର୍ତ୍ତମାନ ସମାଜରେ ହଜି ଯାଉଥିବା କିଛି କୌଳିକ ବୃତ୍ତିକୁ ମଧ୍ୟ ଫିଲ୍ମରେ ସ୍ଥାନ ଦିଆଯାଇଛି। ଫିଲ୍ମର ଭିନ୍ନ ଏକ କାହାଣୀ ଓ କଳାକାରଙ୍କ ଦମଦାର ଅଭିନୟ ଦର୍ଶକଙ୍କୁ ପସନ୍ଦ ଆସିବା ନେଇ ଆଶା କରାଯାଉଛି। ଶଙ୍କର ତ୍ରିପାଠୀଙ୍କ ଦ୍ୱାରା ରଚିତ ଉପନ୍ୟାସ ନାଦବିନ୍ଦୁ ଉପରେ ଆଧାରିତ ହୋଇଛି ଚଳଚ୍ଚିତ୍ର ପୁଷ୍କରା।

ଫିଲ୍ମକୁ ନେଇ ଅଭିନେତା ସବ୍ୟସାଚୀ ମିଶ୍ର କହିଛନ୍ତି ଯେ ଏଇ ମାଟି ପାଣି ଓ ପବନରେ ବଞ୍ଚିଥିବା ଗୋଟିଏ ରହସ୍ୟମୟ ଚରିତ୍ରକୁ ନେଇ ତିଆରି ହୋଇଛି ଚଳଚ୍ଚିତ୍ର ପୁଷ୍କରା । ଏନେଇ ଶଙ୍କର ତ୍ରିପାଠୀ କହିଛନ୍ତି ଯେ ''୨୦୦୦ ମସିହାରେ ଏହି ଉପନ୍ୟାସଟି ପ୍ରକାଶିତ ହୋଇଥିଲା। ସେତେବେଳେ ଏହା ପାଠକଙ୍କ ଆଦୃତି ଲାଭ କରିଥିଲା। ସେତେବେଳେ ଏହାକୁ ନେଇ ଚଳଚିତ୍ରର ରୂପ ଦେବା ପାଇଁ ଅନେକ ପାଠକ କହିଥିଲେ।''