The Raja Saab Teaser: ଆସିଲା 'ଦି ରାଜା ସାବ'ର ଦମଦାର ଟିଜର୍; ନୂଆ ଅବତାରରେ ପ୍ରଭାସ

ସୁପର୍‌ଷ୍ଟାର୍‌ ପ୍ରଭାସଙ୍କ ବହୁ ପ୍ରତୀକ୍ଷିତ ଫିଲ୍ମ 'ଦି ରାଜା ସାବ'ର ଟିଜର୍‌ ରିଲିଜ୍ ହୋଇଛି। ଟିଜର୍‌ ଲଞ୍ଚ୍‌ ପାଇଁ ହାଇଦ୍ରାବାଦରେ ଏକ ଭବ୍ୟ କାର୍ଯ୍ୟକ୍ରମ ଆୟୋଜନ କରାଯାଇଥିଲା, ଯେଉଁଥିରେ ପ୍ରଭାସଙ୍କ ପ୍ରଶଂସକମାନେ ମଧ୍ୟ ଅଂଶଗ୍ରହଣ କରିଥିଲେ। 'ଦି ରାଜା ସାବ'ର ଏକ ହରର୍‌ କମେଡି ଫିଲ୍ମ। ଏଥିରେ ପ୍ରେମକୁ ମଧ୍ୟ ଯୋଡା ଯାଇଛି।

ସୋମବାର ସକାଳେ ହାଇଦ୍ରାବାଦର ପ୍ରସିଦ୍ଧ ପ୍ରସାଦ ମଲ୍ଟିପ୍ଲେକ୍ସରେ 'ଦି ରାଜା ସାବ'ର ଟିଜର ବଡ଼ ଧୁମ୍‌ଧାମ୍‌ରେ ​​ଲଞ୍ଚ୍‌ କରାଯାଇଛି। ଆକର୍ଷଣୀୟ କଥା ହେଉଛି ଏହି ଭବ୍ୟ କାର୍ଯ୍ୟକ୍ରମରେ ଅଭିନେତା ପ୍ରଭାସ ନିଜେ ଉପସ୍ଥିତ ନଥିଲେ, ତଥାପି ତାଙ୍କ ପ୍ରଶଂସକଙ୍କ କ୍ରେଜ୍ କମି ନ ଥିଲା। ଥିଏଟର ବାହାରେ ପ୍ରାୟ ୩୦୦ ପ୍ରଶଂସକ ପ୍ରଭାସଙ୍କ କଟ୍‌ଆଉଟ୍‌କୁ କ୍ଷୀରରେ ସ୍ନାନ କରିଥିଲେ, ସ୍ଲୋଗାନ ଦେଇଥିଲେ ଏବଂ ଜୋରଦାର ନାଚିଥିଲେ।

ଟିଜର୍‌ ଲଞ୍ଚ୍‌ ଅବସରରେ, ପ୍ରଶଂସକମାନେ କହିଛନ୍ତି ଯେ ଯଦି ଏହି କାର୍ଯ୍ୟକ୍ରମରେ ମାଗଣା ପ୍ରବେଶ ଥାଆନ୍ତା, ତେବେ ସମଗ୍ର ଅଞ୍ଚଳର ରାସ୍ତାଗୁଡ଼ିକ ଭିଡ ହୋଇଯାଆନ୍ତା। ଜଣେ ପ୍ରଶଂସକ କହିଛନ୍ତି, 'ପାସ୍ ଯୋଗୁଁ ଭିଡ଼ ସୀମିତ ଥିଲା, ନଚେତ୍ ଏହି ଦୃଶ୍ୟ ଆହୁରି ବଡ଼ ହୋଇଥାଆନ୍ତା।'

ଅଧିକ ପଢ଼ନ୍ତୁ: ଆସିଲା ସାଉଥ୍ ସିନେମାର ମଲ୍ଟିଷ୍ଟାରର ଫିଲ୍ମ ‘କନ୍ନପ୍ପା’ର ଟ୍ରେଲର୍; ୨୦୨୫ ର ସମସ୍ତ ରେକର୍ଡ ଭାଙ୍ଗିବ ଫିଲ୍ମ

ପ୍ରଭାସଙ୍କ ବ୍ୟତୀତ ଏହି ଫିଲ୍ମରେ ମାଳବିକା ମୋହନନ, ନିଧି ଅଗ୍ରୱାଲ, ରିଦ୍ଧି ଅଗ୍ରୱାଲ ଏବଂ ସଞ୍ଜୟ ଦତ୍ତ ମଧ୍ୟ ଅଭିନୟ କରିଛନ୍ତି। ଫିଲ୍ମର ଟିଜର ୨ ମିନିଟ୍ ୨୮ ସେକେଣ୍ଡ୍‌ ହୋଇଥିଲେ ବି ଦମଦାର ହୋଇଛି। ଏଥିରେ ପ୍ରଭାସ ଜଣେ ସରଳ ପ୍ରେମିକ ଭୂମିକାରେ ନଜର ଆସିଛନ୍ତି।

‘ଦି ରାଜା ସାବ’ର ଟିଜର୍‌ ଦେଖି ଲାଗୁଛି ଯେ ଏଥିରେ ପୌରାଣିକ ଉପାଦାନଗୁଡ଼ିକ ମଧ୍ୟ ଯୋଡା ଯାଇଛି। VFX ପାଇଁ ବହୁତ ଟଙ୍କା ଖର୍ଚ୍ଚ ହୋଇଛି। ପ୍ରଭାସ ଦୁଇଟି ଭିନ୍ନ ଲୁକ୍‌ରେ ନଜର ଆସିଛନ୍ତି। ତେବେ ଟିଜରରେ ସଞ୍ଜୟ ଦତ୍ତଙ୍କ ଲୁକ୍ ଦେଖି ସମସ୍ତେ ଆଶ୍ଚର୍ଯ୍ୟ ହୋଇଛନ୍ତି।

ପୂର୍ବରୁ ଫିଲ୍ମରେ ତାଙ୍କ ନାଁକୁ ନେଇ କୌଣସି ଆଲୋଚନା ହୋଇ ନଥିଲା। ଟିଜରରେ ତାଙ୍କୁ ଦେଖିଲେ ଲାଗୁଛି ଯେ ସେ ଏକ ନକାରାତ୍ମକ ଚରିତ୍ରରେ ଅଭିନୟ କରୁଛନ୍ତି। ସେ ଜଣେ ତାନ୍ତ୍ରିକ ଏବଂ ଅଭିଶପ୍ତ ରାଜାଙ୍କ ଭୂମିକାରେ ନଜର ଆସି ପାରନ୍ତି।

ନିର୍ମାତା 'ଦ ରାଜା ସାବ'କୁ ପ୍ରଭାସଙ୍କ ଏପର୍ଯ୍ୟନ୍ତର ସବୁଠାରୁ ଗ୍ଲାମରସ୍, ମନୋରଞ୍ଜନକାରୀ ଏବଂ ରଙ୍ଗୀନ ଫିଲ୍ମ ବୋଲି କହିଛନ୍ତି। ତେବେ, ଟିଜରରେ ତାଙ୍କ ଝଲକ ଦେଖିବା ପରେ, ଆପଣଙ୍କୁ ରଜନୀକାନ୍ତଙ୍କ 'ଚନ୍ଦ୍ରମୁଖୀ' ଏବଂ ଅକ୍ଷୟ କୁମାରଙ୍କ 'ଭୁଲ୍‌ ଭୁଲୈୟା' ମନେପଡିବ।

ଟିଜର୍‌ଟି ଏକ ଭୟଙ୍କର ମହଲରୁ ଆରମ୍ଭ ହୁଏ। ତା'ପରେ ଫୋକସ୍ ଏକ ଚିତ୍ର ଉପରକୁ ଯାଏ, ଯାହା ସମ୍ଭବତଃ ଏହି ମହଲର ରାଜାଙ୍କର ହୋଇପାରେ।

ହଠାତ୍ ମହଲରୁ ଧୂଆଁ ଉଠେ ଏବଂ ପ୍ରଭାସ ଧୂଆଁ ମଧ୍ୟରେ ପ୍ରବେଶ କରନ୍ତି। ସେ ଆକ୍ସନ ଏବଂ କମେଡି କରୁଥିବାର ଦେଖାଯାଏ। ସେ ନିଧି ଅଗ୍ରୱାଲଙ୍କ ସହ ରୋମାନ୍ସ କରନ୍ତି। ଏହା ପରେ କାହାଣୀ ପୁଣି ଥରେ ମହଲରେ ଯାଇ ପହଞ୍ଚେ। ଏଇଠି ହୁଏ ସଞ୍ଜୟ ଦତ୍ତଙ୍କ ଏଣ୍ଟ୍ରୀ।

ତାଙ୍କୁ ସୁନାରେ ଛାଉଣି ହୋଇଥିବା ଜଣେ ତାନ୍ତ୍ରିକ ଭାବରେ ଦେଖିବାକୁ ମିଳେ, ଯାହା ଦ୍ୱନ୍ଦ୍ୱରେ ପକାଉଛି ଯେ ସେ ଜଣେ ରାଜା ନା ତାନ୍ତ୍ରିକ! ପ୍ରଭାସ ତାଙ୍କ ବନ୍ଧୁମାନଙ୍କ ସହିତ ଏହି ଭୂତ ମହଲରେ ଭୟଭୀତ ହେଉଥିବା ଦେଖାଯାଏ।

ପ୍ରଭାସଙ୍କ ଅଭିନୀତ 'ଦି ରାଜା ସାବ'ରେ ନିଧି ଅଗ୍ରୱାଲ ମୁଖ୍ୟ ଭୂମିକାରେ ଅଛନ୍ତି। ଏହି ଫିଲ୍ମ ମାଧ୍ୟମରେ ମାଳବିକା ମୋହନନ ତେଲୁଗୁରେ ଡେବ୍ୟୁ କରିଛନ୍ତି। ରିଦ୍ଧି କୁମାର ଏକ ଗୁରୁତ୍ୱପୂର୍ଣ୍ଣ ଭୂମିକାରେ ଅଛନ୍ତି। ମାରୁତି ଏହାର ନିର୍ଦ୍ଦେଶନା ଦେଇଛନ୍ତି।

ଏସ୍. ଥମନ ଏହି ଫିଲ୍ମର ସଙ୍ଗୀତ ରଚନା କରିଛନ୍ତି। ଏହି ଫିଲ୍ମଟି ୨୦୨୨ ମସିହାରୁ ନିର୍ମିତ ହେଉଛି। ଏବେ ଏହା ଡିସେମ୍ବର ୫ ତାରିଖରେ ସମଗ୍ର ଭାରତରେ ସିନେମା ହଲ୍‌ରେ ମୁକ୍ତିଲାଭ କରିବ।

ଅଧିକ ପଢ଼ନ୍ତୁ: ଇଣ୍ଟର୍‌ନେଟ୍‌ରେ ହଇଚଇ ସୃଷ୍ଟିକରୁଛି ‘ସିକନ୍ଦର’ର ଟିଜର; ସଲମାନଙ୍କ ଡାଏଲଗ ଲଗଉଛି ନିଆଁ