ଆର୍ଥିକ ସଂକଟରେ ‘ଭୀମ’; ସହାୟତା ପାଇଁ ନିବେଦନ

ଆପଣମାନଙ୍କର ନିଶ୍ଚିତ ମନେଥିବ ୩ ଦଶନ୍ଧି ପୂର୍ବରୁ ଦୂରଦର୍ଶନରେ ପ୍ରସାରିତ ହୋଇଥିବା ମେଗା ଧାରାବାହିକ ‘ମହାଭାରତ’। ଲକ୍‌ଡାଉନ୍ ସମୟରେ ଏହାକୁ ପୁନର୍ବାର ମଧ୍ୟ ପ୍ରସାରିତ କରାଯାଇଥିଲା। ୩୦ ବର୍ଷ ପୂର୍ବେ 'ମହାଭାରତ' ଟିଭିର ସେହି ଶୋ’ ଥିଲା, ଯେଉଁଥିପାଇଁ ଲୋକମାନେ ଗାଁ-ଗହଳିରେ ଏକାଠି ହେଇଯାଉଥିଲେ।

ଲକ୍‌ଡାଉନ୍ ସମୟରେ ଏହି ଶୋ’କୁ ମଧ୍ୟ ବହୁତ ଭଲ ପାଇବା ମିଳିଥିଲା। ଶୋ’ରେ ନିଜ ନିଜ ଚରିତ୍ରରେ ଅଭିନୟ କରିଥିବା ଅଭିନେତାମାନଙ୍କ ମଧ୍ୟରୁ ଜଣେ ହେଲେ ‘ଗଦାଧାରୀ ଭୀମ’। ଭୀମର ଚରିତ୍ରକୁ ପ୍ରବୀଣ କୁମାର ସୋବତି ଅଭିନୟ କରିଥିଲେ। ନିକଟରେ ସେ ତାଙ୍କର ୭୪ତମ ଜନ୍ମଦିନ ପାଳନ କରିଥିଲେ। ବର୍ତ୍ତମାନ ପ୍ରବୀଣ ପାଏ ପାଏ ରୋଗରେ ଆକ୍ରାନ୍ତ। ତାଙ୍କର ଆର୍ଥିକ ଅବସ୍ଥା ଏତେ ଗମ୍ଭୀର ହୋଇଛି ଯେ ସେ ବର୍ତ୍ତମାନ ସହାୟତା ପାଇଁ ସରକାରଙ୍କୁ ନିବେଦନ କରିଛନ୍ତି।

୬ ଫୁଟରୁ ଅଧିକ ଉଚ୍ଚତା ବିଶିଷ୍ଟ ପ୍ରବୀଣ କୁମାର ସୋବତି ନିଜର ଜବରଦସ୍ତ ଅଭିନୟରେ ଲୋକଙ୍କ ହୃଦୟରେ ଏକ ସ୍ୱତନ୍ତ୍ର ସ୍ଥାନ ସୃଷ୍ଟି କରିଥିଲେ। ୭୪ ବର୍ଷ ଜୀବନ ଅତିବାହିତ କରିବା ପରେ, ବର୍ତ୍ତମାନ ପ୍ରବୀଣ ପାଏ ସହ ଲଢୁଛନ୍ତି। ଖୁବ ଯନ୍ତ୍ରଣାରେ ସେ ନିଜ ଜୀବନ ବିତାଇ ଆସୁଥିଲେ ମଧ୍ୟ ବର୍ତ୍ତମାନ ବଞ୍ଚିବା ତାଙ୍କ ପାଇଁ କଷ୍ଟକର ହୋଇପଡିଛି। ତେଣୁ ବଞ୍ଚିବା ପାଇଁ ପେନ୍‌ସନ୍‌ ଆଶାରେ ସେ ପଞ୍ଜାବ ସରକାରଙ୍କୁ ନିବେଦନ କରିଛନ୍ତି।

ଗଣମାଧ୍ୟମର ରିପୋର୍ଟ ଅନୁଯାୟୀ, ଅଭିନେତା କହିଛନ୍ତି ଯେ “ପଞ୍ଜାବରେ ଗଠିତ ସମସ୍ତ ସରକାରଙ୍କ ନିକଟରେ ମୋର ଅଭିଯୋଗ ଯେ ଯେଉଁ ଖେଳାଳିମାନେ ଏସୀୟ ଗେମ୍ସ ଖେଳୁଛନ୍ତି କିମ୍ବା ପଦକ ଜିତୁଛନ୍ତି ସେମାନଙ୍କୁ ପେନ୍ସନ୍ ଦିଆଯାଉଛି। କିନ୍ତୁ ମୋତେ ଏହି ଅଧିକାରରୁ ବଞ୍ଚିତ କରାଯାଇଛି।

ଦୁଇଥର ଅଲିମ୍ପିକ୍ସ ପୁଣି ଏସିଆନ୍ କମନୱେଲଥ୍‌ରେ ଅନେକ ସ୍ୱର୍ଣ୍ଣ, ରୌପ୍ୟ ପଦକ ଜିତିଥିବା ପ୍ରବୀଣ ୧୯୬୭ରେ ଖେଳରେ ସର୍ବୋଚ୍ଚ ସମ୍ମାନ 'ଅର୍ଜୁନ ପୁରସ୍କାର' ପାଇଥିଲେ। କ୍ରୀଡା ଠାରୁ ଚଳଚ୍ଚିତ୍ର ଗ୍ଲାମର ପର୍ଯ୍ୟନ୍ତ ଏକ ସଫଳ ଯାତ୍ରା କରିଥିବା 'ଭୀମ' ବର୍ତ୍ତମାନ ଆର୍ଥିକ ସଙ୍କଟ ସହ ମୁକାବିଲା କରୁଛନ୍ତି। ପ୍ରବୀଣ କୁମାର ସୋବତି ପଞ୍ଜାବର ଅମୃତସର ନିକଟ ସରହଲି ନାମକ ଏକ ଗାଁର ବାସିନ୍ଦା।

ଏକ ସାକ୍ଷାତକାର ସମୟରେ ଟିଭିର ଭୀମ କହିଛନ୍ତି ଯେ କରୋନା ସମ୍ପର୍କର ସତ୍ୟତାକୁ ପଦାରେ ପକେଇଦେଇଛି। ସମସ୍ତ ସମ୍ପର୍କ ଫମ୍ପା ଅଟେ। କଠିନ ସମୟରେ କୌଣସି ସମର୍ଥନ ତ ଦୂରର କଥା ନିଜ ଲୋକମାନେ ମଧ୍ୟ ଦୂରେଇ ଯାଉଛନ୍ତି। ପ୍ରବୀଣ କହିଛନ୍ତି ଯେ ବର୍ତ୍ତମାନ ତାଙ୍କ ସ୍ୱାସ୍ଥ୍ୟ ଭଲ ନାହିଁ, ଖାଦ୍ୟରେ ମଧ୍ୟ ଅନେକ ପ୍ରକାରର ଅବସାଦ ରହିଛି। ତାଙ୍କ ପତ୍ନୀ ତାଙ୍କର ଯତ୍ନ ନେଉଛନ୍ତି।