ଚାଲୁନି ‘ତେଜସ୍’; ହଲ୍‌କୁ ଯାଇ ଫିଲ୍ମ ଦେଖିବାକୁ ନେହୁରା ହେଲେ କଙ୍ଗନା

ଅକ୍ଟୋବର ୨୭ରେ କଙ୍ଗନା ରାଣାୱତଙ୍କ ‘ତେଜସ୍’ ଏବଂ ବିକାଶ ମାସେଙ୍କ ‘ଦ୍ୱାଦଶ ଫେଲ୍’ ମୁକ୍ତିଲାଭ କରିଛି। ‘ତେଜସ୍’ ପାଇଁ ନେଗେଟିଭ୍ ସମୀକ୍ଷା ମିଳୁଥିବା ବେଳେ ‘ଦ୍ୱାଦଶ ଫେଲ୍’ ପାଇଁ ପଜିଟିଭ୍ ସମୀକ୍ଷା ମିଳୁଛି। ଦୁଇ ଦିନ ମଧ୍ୟରେ ଫିଲ୍ମର ରୋଜଗାର କଙ୍ଗନା ରାଣାୱତଙ୍କ ‘ତେଜସ’ର ତୁଳନାରେ ଅଧିକ ହୋଇପାରିଛି, ଯାହା ପ୍ରଶଂସକଙ୍କ ପାଇଁ ଖୁସି ଖବର ଅଟେ।

‘ତେଜସ୍‌’ର କଥା କହିଲେ ବକ୍ସ ଅଫିସ୍ ଟ୍ରାକର୍ ସକ୍‌ନିଲ୍କ ଅନୁଯାୟୀ ପ୍ରଥମ ଦିନରେ ଫିଲ୍ମ ୧.୨୫ କୋଟି ଟଙ୍କା ରୋଜଗାର କରିଥିବା ବେଳେ ଦ୍ୱିତୀୟ ଦିନରେ ମଧ୍ୟ ୧.୨୫ କୋଟି ଟଙ୍କା ରୋଜଗାର କରିଛି। ଭାରତରେ ଏହି ଚଳଚ୍ଚିତ୍ରର ସଂଗ୍ରହ ଦୁଇ ଦିନରେ ୨.୫୬ କୋଟିରେ ପହଞ୍ଚିଛି। ବିଶ୍ୱବ୍ୟାପୀ ଏହା ୩କୋଟି ଟଙ୍କା ରୋଜଗାର କରିବାରେ ସଫଳ ହୋଇଛି।

‘ଦ୍ୱାଦଶ ଫେଲ୍’ କଥା କହିଲେ ଫିଲ୍ମ ପ୍ରଥମ ଦିନରେ ୧.୧୦ କୋଟି ଟଙ୍କା ରୋଜଗାର କରିଥିବା ବେଳେ ଦ୍ୱିତୀୟ ଦିନରେ ଫିଲ୍ମ ୨.୨୦ କୋଟି ଟଙ୍କା ରୋଜଗାର କରିଛି। ଦୁଇ ଦିନରେ ଏହା ମୋଟ୍ ୩.୩୦ କୋଟି ରୋଜଗାର କରିଛି, ଯାହା ‘ତେଜସ୍’ ଠାରୁ ଅଧିକ। ରବିବାର ଦିନ ଏହି ସଂଖ୍ୟା ବଢିପାରେ ବୋଲି ଆଶା ରହିଛି।

ଅନ୍ୟପକ୍ଷରେ ‘ତେଜସ୍’ର ଏଭଳି ଧିମା ରୋଜଗାର ଦେଖି କଙ୍ଗନା ଭାଙ୍ଗିପଡିଛନ୍ତି। ସିନେମାହଲ୍‌କୁ ଯାଇ ଏହି ଫିଲ୍ମ ଦେଖିବାକୁ ସେ ଦର୍ଶକଙ୍କୁ ନେହୁରା ହୋଇ କହିଛନ୍ତି।

କଙ୍ଗନା ରାଣାୱତ ତାଙ୍କ ଇନଷ୍ଟାଗ୍ରାମରେ ଫିଲ୍ମକୁ ନେଇ ଏକ ଭିଡିଓ ଶେୟାର କରିଛନ୍ତି। ଏହି ଭିଡିଓ ମାଧ୍ୟମରେ କଙ୍ଗନା ତାଙ୍କ ପ୍ରଶଂସକମାନଙ୍କୁ କହିଛନ୍ତି ଯେ “ଆମର ଫିଲ୍ମ 'ତେଜସ୍' ପ୍ରେକ୍ଷାଳୟକୁ ଆସିଛି, ଯିଏ ବି ଏହି ଫିଲ୍ମ ଦେଖିଛନ୍ତି ଆମକୁ ପ୍ରଶଂସା କରିଛନ୍ତି ଏବଂ ଆଶୀର୍ବାଦ ଦେଇଛନ୍ତି, କିନ୍ତୁ କୋଭିଡ୍‌ ପରେ ଆମର ହିନ୍ଦୀ ଫିଲ୍ମ ଇଣ୍ଡଷ୍ଟ୍ରି ସମ୍ପୂର୍ଣ୍ଣ ଭାବେ ଠିକ୍ ହୋଇପାରି ନାହିଁ। ୯୯ ପ୍ରତିଶତ ଫିଲ୍ମକୁ ଦର୍ଶକ ସୁଯୋଗ ଦେଇ ନ ଥାନ୍ତି।”

କଙ୍ଗନା ଏହି ଭିଡିଓରେ ଆହୁରି କହିଛନ୍ତି ଯେ “ଥିଏଟର ହେଉଛି ଆମ ସୋସିଆଲ୍ ନେଟ୍‌ୱାର୍କର ଏକ ଗୁରୁତ୍ୱପୂର୍ଣ୍ଣ ଅଂଶ। ମୁଁ ମଲ୍ଟିପ୍ଲେକ୍ସ ଦର୍ଶକଙ୍କୁ ଅନୁରୋଧ କରୁଛି ଯେ ଯଦି ଆପଣ 'ଉରୀ', 'ନିର୍‌ଜା', 'ମେରିକମ୍‌' ଭଳି ଚଳଚ୍ଚିତ୍ରକୁ ଉପଭୋଗ କରିଛନ୍ତି, ତେବେ ଆପଣ 'ତେଜସ୍‌' କୁ ମଧ୍ୟ ବହୁତ ପସନ୍ଦ କରିବେ।”

View this post on Instagram

A post shared by Kangana Ranaut (@kanganaranaut)

ଭିଡିଓ ଶେଅୟାର କରି କଙ୍ଗନା କ୍ୟାପ୍‌ସନ୍‌ରେ ଲେଖିଛନ୍ତି, “କୋଭିଡ ପୂର୍ବରୁ ମଧ୍ୟ ପ୍ରେକ୍ଷାଳୟରେ ଦର୍ଶକଙ୍କ ସଂଖ୍ୟାରେ ବହୁତ ହ୍ରାସ ଘଟିଥିଲା। କୋଭିଡ୍‌ ପରେ ଏହା ବହୁତ ଦ୍ରୁତ ଗତିରେ ବୃଦ୍ଧି ପାଇଛି। ଅନେକ ପ୍ରେକ୍ଷାଳୟ ବନ୍ଦ ହେବାରେ ଲାଗିଛି। ମାଗଣା ଟିକେଟ୍ ଏବଂ ଅନେକ ଅଫର ସତ୍ତ୍ୱେ ଦର୍ଶକଙ୍କ ସଂଖ୍ୟା ଯଥେଷ୍ଟ ହ୍ରାସ ପାଇବାରେ ଲାଗିଛି। ଲୋକଙ୍କୁ ଅନୁରୋଧ କରୁଛି ଥିଏଟର ଯାଆନ୍ତୁ, ଫିଲ୍ମ ଦେଖନ୍ତୁ ଏବଂ ପରିବାର ଏବଂ ସାଙ୍ଗମାନଙ୍କ ସହିତ ଉପଭୋଗ କରନ୍ତୁ। ନହେଲେ ପ୍ରେକ୍ଷାଳୟଗୁଡିକ ଠିଆ ହେବାକୁ ସମର୍ଥ ହେବେ ନାହିଁ। ଧନ୍ୟବାଦ।”