Javed Akhtar: ବିରାଟଙ୍କ ଟେଷ୍ଟ୍‌ କ୍ରିକେଟରୁ ସନ୍ନ୍ୟାସ ପରେ ନିରାଶରେ ଜାଭେଦ ଅଖ୍‌ତର୍; କାନ ଧରି କହିଲେ ଫେରିଆସ

ଟି-୨୦ ଅନ୍ତର୍ଜାତୀୟ କ୍ରିକେଟ୍‌ ପରେ, ବିରାଟ କୋହଲି ସୋମବାର ଟେଷ୍ଟ୍‌ କ୍ରିକେଟରୁ ଅବସର ଘୋଷଣା କରିଛନ୍ତି, ଯାହା ତାଙ୍କ ଭବିଷ୍ୟତକୁ ନେଇ ଚାଲିଥିବା କଳ୍ପନାଜଳ୍ପନାର ଅନ୍ତ ଘଟାଇଛି। ୩୬ ବର୍ଷୀୟ କିଙ୍ଗ୍‌ କୋହଲି ଭାରତ ପାଇଁ ୧୨୩ଟି ଟେଷ୍ଟ୍‌ ମ୍ୟାଚ୍ ଖେଳିଛନ୍ତି, ଯେଉଁଥିରେ ସେ ୯୨୩୦ ରନ୍ କରିଛନ୍ତି ଏବଂ ୩୦ଟି ଶତକ ମାରିଛନ୍ତି।

ଏବେ ସେ କେବଳ ODI ମ୍ୟାଚ୍ ଖେଳିବେ। ବିରାଟ କୋହଲିଙ୍କ ଏହି ନିଷ୍ପତ୍ତି ସାରା ବିଶ୍ୱକୁ ଚକିତ କରିଛି। ସିନେମା ଶିଳ୍ପର ଅନେକ ପ୍ରବୀଣ କଳାକାର ଏହା ଉପରେ ଦୁଃଖ ପ୍ରକାଶ କରିଛନ୍ତି। ଏବେ, ହିନ୍ଦୀ ସିନେମାର ପ୍ରବୀଣ ଗୀତିକାର ଜାଭେଦ ଅଖତର ବିରାଟ କୋହଲିଙ୍କ ଟେଷ୍ଟ୍‌ ଅବସରକୁ ନେଇ ନିଜର ଅନ୍ତରର ଯନ୍ତ୍ରଣା ପ୍ରକାଶ କରି କ୍ରିକେଟର୍‌ଙ୍କ 'କାନ' ଧରିଛନ୍ତି।

ଜାଭେଦ ଅଖତର ତାଙ୍କର ସ୍ପଷ୍ଟବାଦୀ ଶୈଳୀ ପାଇଁ ଜଣାଶୁଣା। ଯେତେବେଳେ ବିରାଟ କୋହଲି ଟେଷ୍ଟ୍‌ କ୍ରିକେଟରୁ ଅବସର ଘୋଷଣା କଲେ, ଗୀତିକାର ସ୍ତବ୍ଧ ହୋଇଗଲେ। ସେ ସୋସିଆଲ ମିଡିଆରେ ନିଜର ଯନ୍ତ୍ରଣା ପ୍ରକାଶ କରିଛନ୍ତି। ଅନେକ କ୍ରିକେଟର ଏବଂ ପ୍ରଶଂସକଙ୍କ ପରି, ସେ ମଧ୍ୟ ବିଶ୍ୱାସ କରନ୍ତି ଯେ ତାଙ୍କର ଟେଷ୍ଟ୍‌ କ୍ରିକେଟ କ୍ୟାରିଅର୍‌ ଏପର୍ଯ୍ୟନ୍ତ ଶେଷ ହୋଇନାହିଁ।

ଅଧିକ ପଢ଼ନ୍ତୁ:‘ଅପରେସନ୍ ସିନ୍ଦୂର’କୁ ନେଇ ଏମିତି କହିଲେ ଜାଭେଦ ଅଖତର; ଲୋକେ କଲେ ଟାର୍ଗେଟ୍

ଜାଭେଦ ଅଖତରଙ୍କ ପୋଷ୍ଟ:

ଏକ ପୋଷ୍ଟ ସହିତ ଗୀତିକାର କ୍ରିକେଟର୍‌ଙ୍କୁ ତାଙ୍କ ନିଷ୍ପତ୍ତି ପୁନର୍ବିଚାର କରିବାକୁ ଅନୁରୋଧ କରିଛନ୍ତି। ସେ ପୋଷ୍ଟରେ ଲେଖିଛନ୍ତି – “ବିରାଟ କୋହଲି ଭଲଭାବେ ଜାଣନ୍ତି, କିନ୍ତୁ ଏହି ମହାନ ଖେଳାଳିଙ୍କ ପ୍ରଶଂସକ ଭାବରେ, ସମୟ ପୂର୍ବରୁ ଟେଷ୍ଟ କ୍ରିକେଟ୍‌ରୁ ଅବସର ନେବାର ତାଙ୍କର ନିଷ୍ପତ୍ତିରେ ମୁଁ ନିରାଶ।”

ସେ ଆହୁରି ଲେଖିଛନ୍ତି – “ମୁଁ ଭାବୁଛି ତାଙ୍କ ଭିତରେ ଏବେ ବି ବହୁତ କ୍ରିକେଟ୍ ବାକି ଅଛି। ମୁଁ ତାଙ୍କୁ ତାଙ୍କ ନିଷ୍ପତ୍ତି ପୁନର୍ବିଚାର କରିବାକୁ ବିନମ୍ରତାର ସହ ଅନୁରୋଧ କରୁଛି।”

ଅନେକ ସୋସିଆଲ ମିଡିଆ ବ୍ୟବହାରକାରୀ ମଧ୍ୟ ଜାଭେଦ ଅଖତରଙ୍କ ସହ ସହମତ ହୋଇଛନ୍ତି। ଗୀତିକାରଙ୍କ ପୋଷ୍ଟରେ ପ୍ରତିକ୍ରିୟା ଦେଇ ଜଣେ ପ୍ରଶଂସକ ଲେଖିଛନ୍ତି, “ଆମର ଅତ୍ୟନ୍ତ ସମ୍ମାନଜନକ ଜାଭେଦ ସାହେବଙ୍କଠାରୁ ଏହା ଶୁଣିବା ବହୁତ ବଡ଼ କଥା! ଆଶା କରୁ @imVkohli ତାଙ୍କ ନିଷ୍ପତ୍ତିର ପୁନର୍ବିଚାର କରିବେ।”

ଆଉ ଜଣେ ଲେଖିଛନ୍ତି, “ଠିକ୍ କହିଛନ୍ତି। ମୁଁ ମଧ୍ୟ ଚାହୁଁଛି ଯେ ସେ ତାଙ୍କ ନିଷ୍ପତ୍ତିର ପୁନର୍ବିଚାର କରନ୍ତୁ। ଆଉ ଜଣେ ଲେଖିଛନ୍ତି, “ସମ୍ପୂର୍ଣ୍ଣ ସହମତ!!!! ଏହା ବ୍ୟତୀତ ବିରାଟ, ରୋହିତ ଏବଂ ଅଶ୍ୱିନଙ୍କ ଭଳି ଖେଳାଳିଙ୍କୁ ଏକ ବିଦାୟକାଳୀନ ମ୍ୟାଚ୍ ମିଳିବା ଉଚିତ!!!!”

ବିରାଟଙ୍କ ପ୍ରତି ସମ୍ମାନ:

ପ୍ରକାଶଥାଉ ଯେ ଜାଭେଦ ଅଖତର ଏହି ବର୍ଷ ଆରମ୍ଭରେ ବିରାଟ କୋହଲିଙ୍କ ବହୁତ ପ୍ରଶଂସା କରିଥିଲେ। ଯେତେବେଳେ ଭାରତ ICC ଚାମ୍ପିଅନ୍ସ ଟ୍ରଫିର ସେମିଫାଇନାଲରେ ପାକିସ୍ତାନକୁ ପରାସ୍ତ କରିଥିଲା ସେ X ରେ ଲେଖିଥିଲେ, “ବିରାଟ କୋହଲି, ଜିନ୍ଦାବାଦ! ଆମେ ସମସ୍ତେ ତୁମ ପାଇଁ ବହୁତ ଗର୍ବିତ।” ଯେତେବେଳେ କିଛି ଟ୍ରୋଲର୍ ଅଖତରଙ୍କ ଦେଶପ୍ରେମ ଉପରେ ପ୍ରଶ୍ନ ଉଠାଇଥିଲେ, ସେ ସେମାନଙ୍କୁ ଉପଯୁକ୍ତ ଉତ୍ତର ଦେଇଥିଲେ।

ଟ୍ରୋଲର୍‌ଙ୍କୁ ଜବାବ:

ସେ ଲେଖିଥିଲେ, “ପୁଅ, ଯେତେବେଳେ ତୁମର ବାପା ଏବଂ ଜେଜେବାପା ବ୍ରିଟିଶଙ୍କ ଜୋତା ଚାଟୁଥିଲେ, ସେତେବେଳେ ଆମର ଲୋକମାନେ ସ୍ୱାଧୀନତା ପାଇଁ ଜେଲ୍‌ରେ ଏବଂ କଳାପାଣିରେ ଥିଲେ। ମୋ ଶିରାରେ ଦେଶପ୍ରେମୀଙ୍କ ରକ୍ତ ପ୍ରବାହିତ ହେଉଛି ଏବଂ ତୁମ ଶିରାରେ ବ୍ରିଟିଶ କର୍ମଚାରୀଙ୍କ ରକ୍ତ ପ୍ରବାହିତ ହେଉଛି। ଏହି ପାର୍ଥକ୍ୟକୁ ଭୁଲ ନାହିଁ।”

ଅଧିକ ପଢ଼ନ୍ତୁ:ପାକିସ୍ତାନ ଲୋକଙ୍କ ପ୍ରତି ମୋର କୌଣସି ଅଭିଯୋଗ ନାହିଁ; ଜାଭେଦ ଅଖତର