Babil Khan: କାନ୍ଦିଲେ ଇର୍‌ଫାନ୍‌ ଖାନଙ୍କ ପୁଅ; କହିଲେ ବଲିଉଡ୍ ବହୁତ ଖରାପ, ବଲିଉଡ୍ ବହୁତ ଅସଭ୍ୟ

ଦିବଂଗତ ସୁପର୍‌ଷ୍ଟାର୍‌ ଇର୍‌ଫାନ୍‌ ଖାନଙ୍କ ପୁଅ ତଥା ଅଭିନେତା ବାବିଲ ଖାନଙ୍କ ଏକ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ୍‌ ହେଉଛି, ଏଥିରେ ସେ କାନ୍ଦି କାନ୍ଦି ଫିଲ୍ମ ଇଣ୍ଡଷ୍ଟ୍ରିରେ ଏକାକୀ ଅନୁଭବ କରିବା ବିଷୟରେ କହୁଥିବା ନଜର ଆସନ୍ତି।

ସେ କହୁଛନ୍ତି, "ବଲିଉଡ୍ ବହୁତ ଖରାପ, ବଲିଉଡ୍ ବହୁତ ଅସଭ୍ୟ।" ଏହି କ୍ଲିପ୍‌ରେ ସେ ଶନାୟା କପୁର, ଅନନ୍ୟା ପାଣ୍ଡେ, ଅର୍ଜୁନ କପୁର, ସିଦ୍ଧାନ୍ତ ଚତୁର୍ବେଦୀ, ରାଘବ ଜୁୟାଲ, ଆଦର୍ଶ ଗୌରବ ଏବଂ ଅରିଜିତ ସିଂହଙ୍କ ନା’ ନେଇଥିବାର ନଜର ଆସିଛନ୍ତି।

ଭିଡିଓରେ ବାବିଲ କାନ୍ଦି କାନ୍ଦି କହୁଛନ୍ତି, " ମୁଁ ଆପଣଙ୍କୁ କେବଳ ଏତିକି କହିବାକୁ ଚାହୁଁଛି ଯେ ଶନାୟା କପୁର, ଅନନ୍ୟା ପାଣ୍ଡେ, ଅର୍ଜୁନ କପୁର, ସିଦ୍ଧାନ୍ତ ଚତୁର୍ବେଦୀ, ରାଘବ ଜୁୟାଲ ଏବଂ ଆଦର୍ଶ ଗୌରବ ଏବଂ ଏପରିକି... ଅରିଜିତ ସିଂହଙ୍କ ଭଳି ଲୋକ ଅଛନ୍ତି? ଏମିତି ଅନେକ ନାଁ ଅଛି। ବଲିଉଡ୍‌ ବହୁତ ଖରାପ। ବଲିଉଡ ବହୁତ ଅସଭ୍ୟ।"

ଅଧିକ ପଢ଼ନ୍ତୁ: ଆଦିବାସୀ ସଂପ୍ରଦାୟଙ୍କୁ ଅପମାନ ଦେଇ ବିବାଦରେ ବିଜୟ ଦେବରକୋଣ୍ଡା

ବାବିଲ ଅନ୍ୟ ଏକ ଭିଡିଓରେ କହିଛନ୍ତି, “ବଲିଉଡ୍ ହେଉଛି ସବୁଠାରୁ ନକଲି ଶିଳ୍ପ ଯାହା ମୁଁ ଅନୁଭବ କରିଛି। କିନ୍ତୁ କିଛି ଲୋକ ଅଛନ୍ତି ଯେଉଁମାନେ ବଲିଉଡ୍‌କୁ ଭଲ କରିବାକୁ ଚାହାଁନ୍ତି, ଏହା ଅର୍ଥହୀନ।” ଭିଡିଓର ଶେଷରେ, ସେ ଜୋରରେ କାନ୍ଦିବାକୁ ଆରମ୍ଭ କରନ୍ତି।

ତେବେ କୁହାଯାଉଛି ଯେ ଏହା ତାଙ୍କ ଫିଲ୍ମ 'ଲଗ୍‌ଆଉଟ୍'ର ପ୍ରମୋସନାଲ୍ ଭିଡିଓ ଥିଲା। ସେ ଭୁଲବଶତଃ ଏହାକୁ ଇନ୍‌ଷ୍ଟା ଷ୍ଟୋରୀରେ ପୋଷ୍ଟ କରିଥିଲେ। ତେଣୁ ସେ ଏହାକୁ ଡିଲିଟ୍ କରିଦେଲେ। କିନ୍ତୁ ସେତେବେଳକୁ ଭିଡିଓ ଭାଇରାଲ୍‌ ହୋଇଯାଇଥିଲା। ଏହାକୁ ଦେଖିବା ପରେ, ପ୍ରଶଂସକଙ୍କ ପ୍ରତିକ୍ରିୟା ଭାଇରାଲ୍‌ ହେବାରେ ଲାଗିଛି।

ଜଣେ ବ୍ୟକ୍ତି ଲେଖିଛନ୍ତି "ହେ ଭଗବାନ, ଏହା ପ୍ରକୃତରେ ଦୁଃଖଦ। ସେ ବହୁତ କଷ୍ଟ ଦେଇ ଗତି କରୁଛନ୍ତି,"। ଅନ୍ୟଜଣେ ଲେଖିଛନ୍ତି, "କିଛି ତ ଗୋଟେ ହୋଇଛି। ସେ ଯୁବକ ଅଛନ୍ତି ଏବଂ ବାପାଙ୍କ ବିନା ଏକ ଅତ୍ୟନ୍ତ ପ୍ରତିଯୋଗିତାମୂଳକ ପରିବେଶରେ ସେ ଦୁର୍ବଳ ହୋଇପଡିଛନ୍ତି। ମୁଁ ଆଶା କରୁଛି ଯେ ତାଙ୍କୁ କିଛି ସହଯୋଗ ମିଳିବ ଏବଂ ସେ ଏହାକୁ ଏକ ଘଟଣା ଭାବରେ ଗ୍ରହଣ କରିବେ ଏବଂ ପୂର୍ବ ଅପେକ୍ଷା ଅଧିକ ଶକ୍ତିଶାଳୀ ହୋଇ ଫେରିବେ।"

ଏହାରି ଭିତରେ, ଅନନ୍ୟା ପାଣ୍ଡେଙ୍କ ଏକ ସିକ୍ରେଟ୍ ପୋଷ୍ଟ୍‌ ସୋସିଆଲ ମିଡିଆରେ ପ୍ରକାଶ ପାଇଛି, ଯେଉଁଥିରେ ସେ ଇନ୍‌ଷ୍ଟାଗ୍ରାମ୍‌ରେ ତାଙ୍କ "ସାମ୍ପ୍ରତିକ ଜୀବନ"ର ଏକ କାହାଣୀ ଶେୟାର କରିଥିବା ଦେଖିବାକୁ ମିଳେ।

ଅନନ୍ୟା ଲେଖିଛନ୍ତି, "ଯାହା ଆସିବାର ଅଛି ତାହା ଆସିବ ଏବଂ ଯେତେବେଳେ ଆସିବ ଆମେ ଏହାର ସମ୍ମୁଖୀନ ହେବୁ।" ପ୍ରଶଂସକମାନେ ଏହାକୁ ବାବିଲ ଖାନଙ୍କ ଭାଇରାଲ ଭିଡିଓ ସହିତ ଯୋଡୁଥିବାର ଦେଖାଯାଉଛି।

ସୂଚନାଯୋଗ୍ୟ ଯେ ଗୋଟିଏ ସପ୍ତାହ ପୂର୍ବରୁ ବାବିଲ ଖାନ ତାଙ୍କ ବାପାଙ୍କ ପଞ୍ଚମ ଶ୍ରାଦ୍ଧ ବାର୍ଷିକୀରେ ଏକ ପୋଷ୍ଟ ଶେୟାର କରିଥିଲେ, ଯେଉଁଥିରେ ସେ ଭାବପ୍ରବଣ ହୋଇଯାଉଥିବାର ଦେଖାଯାଇଥିଲେ।

ଅଧିକ ପଢ଼ନ୍ତୁ: ରଶ୍ମିକା ମନ୍ଦାନା ଏବଂ ବିଜୟ ଦେବରାକୋଣ୍ଡାଙ୍କ ଫଟୋ ହେଲା ଭାଇରାଲ୍; ବଢିଲା ସନ୍ଦେହ