Helen: ସଲମାନ୍ ଖାନ୍‌ଙ୍କ ମା’ଙ୍କ ଉତ୍ସାହ; କହିଲେ କାହିଁକି ଆଜି ବି ସେ ସକ୍ରିୟ

ବଲିଉଡ୍‌ର ବରିଷ୍ଠ ଅଭିନେତ୍ରୀ ହେଲେନ୍ ପୁଣି ଥରେ ଖବରର ଶିରୋନାମାରେ ଅଛନ୍ତି। ଏଥର, ତାଙ୍କର କୌଣସି ଫିଲ୍ମ ଭୂମିକା ପାଇଁ ନୁହେଁ, ବରଂ ତାଙ୍କର ଆଶ୍ଚର୍ଯ୍ୟଜନକ ଫିଟ୍‌ନେସ୍ ଏବଂ ବିନ୍ଦାସ୍ ଜୀବନଶୈଳୀ ପାଇଁ। ୮୫ ବର୍ଷ ବୟସରେ ମଧ୍ୟ ହେଲେନ୍ ଖୁବ୍ ସକ୍ରିୟ ଏବଂ ଉତ୍ସାହୀ ଅଛନ୍ତି।

ସେ ପିଲାଟେ ବ୍ୟାୟାମ, ଟ୍ରାମ୍ପୋଲାଇନ୍ ଜମ୍ପ୍‌ କରୁଥିବା ଏବଂ ତାଙ୍କର ପ୍ରସିଦ୍ଧ ଗୀତଗୁଡ଼ିକରେ ନାଚିବାର ଏକ ଭିଡିଓ ଦେଖାଇ ସମସ୍ତଙ୍କୁ ଚକିତ କରିଦେଇଛନ୍ତି। ଏହି ଭିଡିଓଟି ତାଙ୍କ ଫିଟନେସ୍ ପ୍ରଶିକ୍ଷକ ୟାସ୍‌ମିନ୍ କରାଚୀୱାଲା ଇନ୍‌ଷ୍ଟାଗ୍ରାମ୍‌ରେ ଶେୟାର କରିଛନ୍ତି, ଯାହା ଏବେ ସୋସିଆଲ ମିଡିଆରେ ଖୁବ୍ ଭାଇରାଲ ହେବାରେ ଲାଗିଛି।

ବୟସ ବଢିବା ସହିତ ଶରୀରରେ ବଢ଼ୁଥିବା ସମସ୍ୟା ପ୍ରାୟତଃ ଲୋକଙ୍କୁ ଅଳସୁଆ କରିଦିଏ। କିନ୍ତୁ ହେଲେନ୍‌ ଏବେ ବି ଫିଟ୍‌ନେସ୍‌ ମାମଲାରେ ଯୁବପିଢ଼ିଙ୍କୁ ମଧ୍ୟ ପଛରେ ପକାଇ ଦେଉଥିବାର ଦେଖାଯାଉଛି। ତାଙ୍କର ବ୍ୟାୟାମ ଭିଡିଓ ଏବଂ ସକାରାତ୍ମକ ମନୋଭାବ ବୟସ୍କମାନଙ୍କ ମଧ୍ୟରେ ମଧ୍ୟ ଏକ ସୁସ୍ଥ ଜୀବନଶୈଳୀକୁ ନେଇ ନୂତନ ଚିନ୍ତାଧାରା ସୃଷ୍ଟି କରିଛି।

ଅଧିକ ପଢ଼ନ୍ତୁ:Y+ ସୁରକ୍ଷା ପରେ ବି ଜଣେ ଯୁବତୀ ସଲମାନ ଖାନଙ୍କ ଫ୍ଲାଟ୍‌କୁ ପଶିଲେ; ପଚାରିବାରୁ କହିଲେ ଏମିତି

ଭିଡିଓ ଆରମ୍ଭରେ ହେଲେନ୍ ମଜାରେ କହୁଛନ୍ତି, 'ହାଏ, ମୁଁ ୮୫ ବର୍ଷର ଝିଅ, ଏବଂ ଏସବୁ ପିଲେଟ୍ସ ଯୋଗୁଁ'। ଏହାର ଅର୍ଥ ହେଉଛି ଏବେ ବି ସେ ନିଜକୁ ୮୫ ବର୍ଷର ଝିଅ ବୋଲି ଭାବନ୍ତି ଆଉ ଏସବୁ କେବଳ ପିଲେଟ୍ସ ଯୋଗୁଁ ସମ୍ଭବ ହୋଇଛି ବୋଲି ତାଙ୍କର ମତ।

ଭିଡିଓରେ ହେଲେନ୍ କ’ଣ କରୁଛନ୍ତି:

• ବିନା ସାହାରାରେ ସିଡ଼ି ଚଢୁଛନ୍ତି
• ଟ୍ରାମ୍ପୋଲାଇନ୍ ଉପରେ ଡେଉଁଛନ୍ତି
• ପିଲେଟ୍ସ ମାଧ୍ୟମରେ ଶରୀରକୁ ଫ୍ଲେକ୍ସ କରଛନ୍ତି
• ସବୁଠାରୁ ବଡ କଥା ହେଲା ସେ 'ମୋନିକା ଓ ମାଇ ଡାର୍ଲିଙ୍ଗ' ଏବଂ 'ପିଆ ତୁ ଅବ୍ ତୋ ଆଜା' ଭଳି ତାଙ୍କର ପ୍ରସିଦ୍ଧ ଗୀତଗୁଡ଼ିକରେ ନାଚୁଛନ୍ତି
• ହେଲେନ୍ "ବେଣ୍ଡ୍‌ ଇଟ୍ ଲାଇକ୍ ବେକହମ"ର କଥା କହିଛନ୍ତି ଏବଂ ଲୋକମାନଙ୍କୁ ମଧ୍ୟ ଏହା କରିବାକୁ ଚ୍ୟାଲେଞ୍ଜ୍‌ ଦେଇଛନ୍ତି
• ଭିଡିଓରେ, ୟାସ୍‌ମିନ୍ ତାଙ୍କୁ ସବୁଠାରୁ କଷ୍ଟକର ବ୍ୟାୟାମ କରିବାକୁ କୁହନ୍ତି, ଯାହାକୁ ହେଲେନ୍ କରିକି ଦେଖାନ୍ତି

ପ୍ରକାଶଥାଉ ଯେ ହେଲେନ୍ ତାଙ୍କ ସମୟରେ 'ହାଓଡ଼ା ବ୍ରିଜ୍' (୧୯୫୮), 'ଶୋଲେ' (୧୯୭୫), ଏବଂ 'ଡନ୍' (୧୯୭୮) ଭଳି ଫିଲ୍ମରେ ତାଙ୍କର ଡ୍ୟାନ୍ସ ଏବଂ ଅଭିନୟ ପାଇଁ ପ୍ରସିଦ୍ଧି ଅର୍ଜନ କରିଥିଲେ। ତାଙ୍କର ଗୀତ- 'ପିଆ ତୁ ଅବ୍‌ ତୋ ଆଜା...' ଏବେ ବି ଲୋକଙ୍କ ହୃଦୟରେ ରାଜ କରେ।

ହେଲେନ୍ ଏବେ ବି ତାଙ୍କ ଡ୍ୟାନ୍ସ ପାଇଁ ଜଣାଶୁଣା। ତାଙ୍କୁ ୨୦୦୯ ମସିହାରେ ପଦ୍ମଶ୍ରୀ ପୁରସ୍କାର ମିଳିଥିଲା। ତାଙ୍କର ଫିଟ୍‌ନେସ୍‌ର ଏହି ଉଦାହରଣ ପ୍ରକୃତରେ ପ୍ରମାଣ କରିଦେଇଛି ଯେ ଯୌବନ ବୟସରୁ ନୁହେଁ, ହୃଦୟରୁ ହୋଇଥାଏ।

ଅଧିକ ପଢ଼ନ୍ତୁ:ପହଲଗାମ ଆକ୍ରମଣ ପରେ ଦୁଃଖରେ ସଲମାନ ଖାନ; ନେଲେ ଏହି ବଡ଼ ପଦକ୍ଷେପ