Dhurandhar:ସୁଟିଂ ସେଟରେ ବଡ଼ ଅଘଟଣ, ହସପିଟାଲରେ ଭର୍ତ୍ତି ହେଲେ ୧୨୦ କ୍ରୁ ମେମ୍ବର

ରଣବୀର ସିଂହ ଅଭିନୀତ ଫିଲ୍ମ ‘ଧୁରନ୍ଧର’ର ସେଟ୍‌ରେ ଫୁଡ ପଏଜନିଂ ଯୋଗୁଁ ୧୨୦ ଜଣ କ୍ରୁ ସଦସ୍ୟଙ୍କ ସ୍ୱାସ୍ଥ୍ୟ ଅବସ୍ଥା ଖରାପ ହୋଇଛି, ସେମାନଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି। ଫିଲ୍ମର ଶୁଟିଂ ଲେହରେ ଚାଲିଥିଲା, ଯେଉଁଠାରେ ୧୭ ଅଗଷ୍ଟରେ ୬୦୦ ଜଣଙ୍କ ପାଇଁ ଖାଦ୍ୟ ପ୍ରସ୍ତୁତ କରାଯାଇଥିଲା। ଖାଦ୍ୟ ଖାଇବା ପରେ ତୁରନ୍ତ ୧୨୦ ଜଣଙ୍କ ସ୍ୱାସ୍ଥ୍ୟ ଖରାପ ହୋଇଥିଲା ଏବଂ ସେମାନଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା।

ହସ୍ପିଟାଲ ଏହି ଘଟଣାର ସୂଚନା ଲେହ ପୁଲିସ, ଜିଲ୍ଲା ପ୍ରଶାସନ ଏବଂ ଖାଦ୍ୟ ସୁରକ୍ଷା ବିଭାଗକୁ ଦେଇଥିଲା, ଯାହା ପରେ ଖାଦ୍ୟ ନମୁନା ଯାଞ୍ଚ ପାଇଁ ପଠାଯାଇଛି। ଏହି ମାମଲାରେ ଏବେ AICWA (ଅଲ୍‌ ଇଣ୍ଡିଆ ସିନେ ଓ୍ଵାର୍କର୍ସ ଆସୋସିଏସନ) କଡ଼ା ତଦନ୍ତର ଦାବି କରିଛି। ଆସୋସିଏସନ ଏକ ପୋଷ୍ଟ ସେୟାର କରି ଲେଖିଛି, “ଆସୋସିଏସନ ଲେହରେ ଚାଲିଥିବା ‘ଧୁରନ୍ଧର’ ଫିଲ୍ମର ଶୁଟିଂ ସେଟ୍‌ରେ ଘଟିଥିବା ଘଟଣାକୁ ନେଇ ଗଭୀର ଚିନ୍ତାରେ ଅଛି, ଯେଉଁଠାରେ ୧୫୦ ଜଣ କର୍ମୀଙ୍କୁ ଫୁଡ ପଏଜନିଂ ହୋଇଛି। ମୁଖ୍ୟ ଅଭିନେତା ରଣବୀର ସିଂହଙ୍କ ଉପସ୍ଥିତି ଏବଂ ଉଚ୍ଚ ବଜେଟ ଥାଇ ମଧ୍ୟ ଏହା ଅତ୍ୟନ୍ତ ଦୁଃଖଦ ଯେ ସେଟ୍‌ରେ ସ୍ୱଚ୍ଛ ଓ ନିରାପଦ ଖାଦ୍ୟ ଭଳି ମୌଳିକ ଆବଶ୍ୟକତାକୁ ଅଣଦେଖା କରାଯାଇଛି।

”ଆସୋସିଏସନର ମତରେ, ଫିଲ୍ମର ପ୍ରଯୋଜକ ଏବଂ ଆର୍ଥିକ ସହଯୋଗୀମାନେ ଖର୍ଚ୍ଚ ବଞ୍ଚାଇବା ପାଇଁ ଖାଦ୍ୟର ଗୁଣବତ୍ତା ସହିତ ବୁଝାମଣା କରନ୍ତି ଏବଂ କର୍ମୀମାନଙ୍କୁ ଅସ୍ୱାସ୍ଥ୍ୟକର ଖାଦ୍ୟ ପରଷି ସେମାନଙ୍କ ଜୀବନକୁ ବିପଦରେ ପକାନ୍ତି। ଆଗକୁ ଲେଖାଯାଇଛି, “ପ୍ରାୟ ପ୍ରତ୍ୟେକ ଶୁଟିଂ ସେଟ୍‌ରେ ଦୁଇଟି ଅଲଗା ଡାଇନିଂ ଟେବୁଲ୍‌ ଥାଏ, ଗୋଟିଏ ଶ୍ରମିକମାନଙ୍କ ପାଇଁ ଏବଂ ଅନ୍ୟଟି ପ୍ରଯୋଜକ, ପ୍ରଡକ୍ସନ ଟିମ୍‌ ଏବଂ ଅଭିନେତାମାନଙ୍କ ପାଇଁ।

ଶ୍ରମିକମାନଙ୍କୁ ନିମ୍ନମାନର ଏବଂ ଅସ୍ୱାସ୍ଥ୍ୟକର ଖାଦ୍ୟ ପରଷା ଯାଏ, ଯେତେବେଳେ ଉଚ୍ଚମାନର ଖାଦ୍ୟ ପ୍ରଯୋଜକ ଓ ଅଭିନେତାମାନଙ୍କ ପାଇଁ ରଖାଯାଏ। ଏହା ଖୋଲାଖୋଲି ଭେଦଭାବ ଦର୍ଶାଏ ଯେ ଫିଲ୍ମ ଇଣ୍ଡଷ୍ଟ୍ରିରେ ଶ୍ରମିକମାନଙ୍କ ସ୍ୱାସ୍ଥ୍ୟ ଓ ସମ୍ମାନକୁ କେତେ କମ୍‌ ଗୁରୁତ୍ୱ ଦିଆଯାଏ।

”ଆଗକୁ ଲେଖାଯାଇଛି, “AICWA କଡ଼ା ଭାବେ ଦାବି କରୁଛି ଯେ ପ୍ରଯୋଜକ ଏବଂ ଧୁରନ୍ଧର ପ୍ରଡକ୍ସନ ହାଉସ ଏହି ଘଟଣାର ସମ୍ପୂର୍ଣ୍ଣ ଦାୟିତ୍ୱ ନିଅନ୍ତୁ ଏବଂ ନିଶ୍ଚିତ କରନ୍ତୁ ଯେ ସମସ୍ତ ପ୍ରଭାବିତ କର୍ମୀମାନେ ଭଲ ହସ୍ପିଟାଲରେ ତୁରନ୍ତ ଏବଂ ଉଚିତ ଚିକିତ୍ସା ପାଆନ୍ତି।

ଫିଲ୍ମ ‘ଧୁରନ୍ଧର’ର ନିର୍ଦ୍ଦେଶନା ଆଦିତ୍ୟ ଧର କରୁଛନ୍ତି। ଫିଲ୍ମର ପ୍ରଯୋଜକ ଜ୍ୟୋତି ଦେଶପାଣ୍ଡେ ଏବଂ ଆଦିତ୍ୟ ଧର ଏହାର ସହ-ପ୍ରଯୋଜକ। ଫିଲ୍ମରେ ରଣବୀର ସିଂହ, ସାରା ଅର୍ଜୁନ, ସଞ୍ଜୟ ଦତ୍ତ, ଆର. ମାଧବନ ଏବଂ ଅକ୍ଷୟ ଖାନ୍ନା ମୁଖ୍ୟ ଭୂମିକାରେ ଅଛନ୍ତି। ଏହି ଫିଲ୍ମ ୫ ଡିସେମ୍ବରରେ ମୁକ୍ତିଲାଭ କରିବ ।