LIVE TV
ଆରମ୍ଭ ହେବ ଇଣ୍ଟିଗ୍ରେଟେଡ ବି.ଇଡି । ଏଣିକି କମର୍ସ ପିଲା ବି ଶିକ୍ଷକତା ପାଠ ପଢିପାରିବେ । ଏନେଇ ଉଚ୍ଚଶିକ୍ଷା ବିଭାଗ ଯୋଜନା କରିଛି । ଚଳିତବର୍ଷ ରାଜ୍ୟର ସବୁ ଶିକ୍ଷକ ଶିକ୍ଷା ଅନୁଷ୍ଠାନଗୁଡିକ ପୂର୍ଣ୍ଣ ପର୍ଯ୍ୟାୟରେ ଚାଲିବ । ଗତବର୍ଷ ଅଧ୍ୟାପକ ଓ ଭିତ୍ତିଭୂମି ଅଭାବରୁ ଏନସିଟିଇ ମାନ୍ୟତା ଉଠାଇ ନେବା ଭଳି ପରିସ୍ଥିତି ଉପୁଯିବାରୁ ଆଡମିଶନ ବାଧାପ୍ରାପ୍ତ ହୋଇଥିଲେ ବି ଏଯାଏଁ ଅଧ୍ୟାପକ ନିଯୁକ୍ତି ହୋଇନାହାଁନ୍ତି ।
୨୦୨୩-୨୪ ଶିକ୍ଷା ବର୍ଷରୁ ଆରମ୍ଭ ହେବ ଇଣ୍ଟିଗ୍ରେଟେଡ ବି.ଇଡି କୋର୍ସ । ସେହିପରି କମର୍ସ ବିଭାଗରେ ମଧ୍ୟ ବି.ଇଡି କୋର୍ସ ଆରମ୍ଭ ହେବ । ରାଜ୍ୟର ଯୁକ୍ତ ଦୁଇ କଲେଜରେ ବଢୁଥିବା ଅଧ୍ୟାପକ ମରୁଡିକୁ ଦୃଷ୍ଟିରେ ରଖି ଉଚ୍ଚ ଶିକ୍ଷା ବିଭାଗ ଏଭଳି ନିଷ୍ପତ୍ତି ନେଇଛି । ସେହିପରି ରାଜ୍ୟର ଶିକ୍ଷକ ଶିକ୍ଷା କଲେଜ ଗୁଡିକରେ ଚଳିତ ଶିକ୍ଷାବର୍ଷରୁ ବର୍ଦ୍ଧିତ ସିଟରେ ଆଡମିଶନ୍ ହେବ । ଏନେଇ ଉଚ୍ଚ ଶିକ୍ଷା ସଚିବ ଶିକ୍ଷାନୁଷ୍ଠାନ ଗୁଡିକୁ ଅବଗତ କରାଇଛନ୍ତି ।
ନାସନାଲ୍ କାଉନସିଲ୍ ଫର ଟିଚର ଏଜୁକେସନ୍, ଏନସିଟିଇର ଅନୁମତି ଲାଗି କଲେଜ ଗୁଡିକ ମେ ୩୧ ସୁଦ୍ଧା ଆବେଦନ କରିବାକୁ ନିର୍ଦ୍ଦେଶ ରହିଛି । ଚଳିତବର୍ଷ ରାଜ୍ୟର ୧୬ଟି ଶିକ୍ଷକ ଶିକ୍ଷା କଲେଜରେ ୧୫୦ ସିଟ୍ ବି.ଇଡି ପାଇଁ ଉପଲବ୍ଧ ହେବ। ସେହିପରି କଟକ, ଭୁବନେଶ୍ୱର, ବ୍ରହ୍ମପୁର, ସମ୍ବଲପୁର ଓ ଅନୁଗୁଳରେ ବି.ଇଡି ସମେତ ୫୦ ସିଟ୍ ବିଶିଷ୍ଟ ଏମ୍.ଇଡି ରହିବ । ଅନ୍ୟପଟେ ୧୪ଟି ଡିଗ୍ରୀ କଲେଜରେ ସେଲ୍ଫ ଫାଇନାନ୍ସିଂ ମୋଡେର ଚାଲୁଥିବା ବି.ଇଡି କୋର୍ସକୁ ଉଚ୍ଛେଦ କରାଯାଇ ରେଗୁଲାର୍ ମୋଡେର ଚଲାଇବାକୁ କଲେଜ ଅଧ୍ୟକ୍ଷମାନଙ୍କୁ ନିର୍ଦ୍ଦେଶ ହୋଇଛି ।
ସେପଟେ ଚଳିତବର୍ଷ ଉଚ୍ଚ ଶିକ୍ଷା ବିଭାଗ ପୁଣିଥରେ ପୂର୍ଣ୍ଣମାତ୍ରାରେ ଶିକ୍ଷକ ଶିକ୍ଷା କଲେଜଗୁଡିକୁ ଚଳାଇବାକୁ ନିର୍ଦ୍ଦେଶ ଦେଇଛି । ତେବେ ଭୁବନେଶ୍ୱର ନଳିନୀ ଦେବୀ କଲେଜ, କଟକ ରାଧାନାଥ ଟ୍ରେନିଂ କଲେଜ ଓ ବାଲେଶ୍ୱର ଶିକ୍ଷକ ଶିକ୍ଷା କଲେଜରେ ସ୍ଥିତି ସଙ୍ଗୀନ । ଏଯାଏ କଲେଜ ଗୁଡ଼ିକରେ ଅଧ୍ୟାପକ ନିଯୁକ୍ତି ହୋଇନାହାଁନ୍ତି । କେବଳ ଏ ତିନି କଲେଜ ନୁହେଁ, ସବୁ କଲେଜରେ ଅଧ୍ୟାପକ ମରୁଡି, ଯାହାକି ଏନସିଟିଇ ନିୟମକୁ ଖିଲାପ କରୁଛି । ସେହିପରି ଅଧିକାଂଶ କଲେଜରେ ଅଣତାଲିମପ୍ରାପ୍ତ ଶିକ୍ଷକ ପିଲାଙ୍କୁ ପାଠ ପଢାଉଛନ୍ତି । ଯେଉଁଥିଲାଗି ଗୁଣାତ୍ମକ ଶିକ୍ଷା ଉପରେ ପ୍ରଶ୍ନବାଚୀ ଲାଗିଛି । ଅନ୍ୟପଟେ ଶିକ୍ଷକ ମରୁଡି ରୋକିବାକୁ ୩୮୫ ପଦବୀ ପୂରଣ ଲାଗି ଓପିଏସପି ପକ୍ଷରୁ ପ୍ରକ୍ରିୟା ଆରମ୍ଭ ହୋଇଛି ।
ଗତବର୍ଷ ଏନସିଟିଇ, ରାଜ୍ୟର ଶିକ୍ଷକ ଶିକ୍ଷା କଲେଜ ଗୁଡିକରେ ଭିତ୍ତିଭୂମି ଅଭାବ, ଅନଭିଜ୍ଞ ଅଧ୍ୟାପକ ପଢାଉଥିବା ଓ ଅଧ୍ୟାପକ ମରୁଡି କାରଣ ଦର୍ଶାଇ ଅନୁମତି କାଢିନେବା ଲାଗି ଚିଠି କରିଥିଲା । ପରେ ଉଚ୍ଚ ଶିକ୍ଷା ବିଭାଗ ପକ୍ଷରୁ ଅନୁରୋଧ କରାଯିବା ପରେ ୧୬ରୁ ମାତ୍ର ୯ କଲେଜରେ ୫୦ ସିଟରେ ପାଠ ପଢାଇବା ଲାଗି ଅନୁମତି ମିଳିଥିଲା । ୭ କଲେଜରେ ଆଡମିଶନ ବନ୍ଦ ରହିଥିଲା ଶିକ୍ଷାବିତଙ୍କ ମତରେ ଯୁଦ୍ଧକାଳୀନ ଭିତ୍ତିରେ ପଦବୀ ପୂରଣ କରାଗଲେ ଛାତ୍ରଛାତ୍ରୀ ଉପକୃତ ହେବେ ।
