Online Gaming: ଆଇ.ଜିଙ୍କ ବଡ଼ ବୟାନ: ଅନଲାଇନ ଗେମ୍‌ରୁ ଅପରାଧୀ ପାଲଟିଯାଉଛନ୍ତି ଯୁବପିଢ଼ି !

ଉତ୍ତରାଂଚଳ ଆଇ.ଜି ହିମାଂଶୁ ଲାଲଙ୍କ ଖୋଲା ବୟାନ। ଆମେ ତଦନ୍ତ କରୁଥିବା ଅଧିକାଂଶ ମାମଲାରେ ସଂପୃକ୍ତ ଯୁବପିଢ଼ି। ସେମାନଙ୍କ ଭିତରୁ ଅଧିକାଂଶ ଅନଲାଇନ୍‌ ଗେମ୍‌ ଖେଳି ଲକ୍ଷ ଲକ୍ଷ ଟଙ୍କା ହାରି ଯାଉଛନ୍ତି । ତା’ ପରେ ପାଲଟିଯାଉଛନ୍ତି ଅପରାଧୀ । ଧାର କରଜ ସୁଝିବା ପାଇଁ ବ୍ୟାଙ୍କ ଡକାୟତି , ଚୋରୀ ଓ  ଚେନ୍‌ ଲୁଟ୍‌ ଭଳି ଅପରାଧରେ ସଂପୃକ୍ତ ରହୁଛନ୍ତି ଅପରାଧୀ । ବରଗଡରେ ଏକ ବ୍ୟାଙ୍କ ଡକାୟତିରେ ଗିରଫ ଅଭିଯୁକ୍ତ ମାନଙ୍କୁ କୋର୍ଟ ଚାଲାଣ କଲା ସମୟରେ, ଡାକୟତି ପଛର କାରଣ କହିଥିଲେ ଆଇ.ଜି । ଗିରଫ ପାଂଚଜଣ ଡକାୟତ, ଅଭ୍ୟାସଗତ ଡକାୟତ ନଥିଲେ । ଅନଲାଇନ ଗେମ୍‌ ଖେଳି, ୧୨ ଲକ୍ଷ ଟଙ୍କା ହାରିବା ପରେ, ଟଙ୍କା ପରିଶୋଧ ପାଇଁ ବ୍ୟାଙ୍କ ଲୁଟର ଉଦ୍ୟମ କରିଥିଲେ । ବରଗଡ ପୋଲିସ ତଦନ୍ତ କରି ଡକାୟତଙ୍କୁ କାବୁ କରିଥିଲା ।

ସେମାନଙ୍କ ପାଖରୁ ଗୋଟିଏ ବନ୍ଧୁକ, ଦୁଇଟି ଜୀବନ୍ତ ଗୁଳି , ମାରଣାସ୍ତ୍ର ଓ ଦୁଇଟି ନକଲି ବନ୍ଧୁକ ଜବତ କରି ପାଂଚ ଜଣ ଯୁବକଙ୍କୁ ବ୍ୟାଙ୍କ ଡକାୟତି ମାମଲାରେ କୋର୍ଟ ଚାଲାଣ କରିଛି ବରଗଡ ପୋଲିସ । ଅନଲାଇନ ଗେମ୍‌ରୁ ପ୍ରଥମେ ଆର୍ଥିକ ଅପରାଧ, ସାଇବର କ୍ରାଇମର ଶିକାର ହେଲା ପରେ, ଯୁବକମାନେ ଅପରାଧି ପାଳଟିଯାଉଥିବା ବରିଷ୍ଠ ପୋଲିସ ଅଧିକାରୀଙ୍କ ମତ । 

ଅଧିକ ପଢ଼ନ୍ତୁ: ଜୀବନ ହାରିବା ଆଗରୁ ଯନ୍ତ୍ରଣାଭରା ବାର୍ତ୍ତା, ପତ୍ନୀ ଦେଉଥିଲେ ମାନସିକ ନିର୍ଯ୍ୟାତନା

କେବଳ ବରଗଡରେ ନୁହେଁ, ବଲାଙ୍ଗିରରେ ବି ଅନଲାଇନ୍‌ରୁ ଅପରାଧୀ ପାଲଟିବାର ନଜିର କମ ନାହିଁ । ଗୋଟିଏ ମାସ ତଳେ, ବଂଗୋମୁଣ୍ଡା ପୋଷ୍ଟ ଅଫିସରେ ଟଙ୍କା ହଡପ ଘଟଣାକୁ ନେଇ ତଦନ୍ତ କରିଥିଲା ପୋଲିସ । ତଦନ୍ତ ରିପୋର୍ଟରେ ଅନଲାଇନ୍‌ ଗେମ୍‌ରୁ ଅପରାଧ କରିଥିଲେ । ପୋଷ୍ଟ ଅଫିସରେ କାର୍ଯ୍ୟରତ ପୋଷ୍ଟାଲ ଆସିଷ୍ଟାଣ୍ଟ ପୂର୍ଣ୍ଣଚନ୍ଦ୍ର ଭୋଇ ଏବଂ ସବ-ପୋଷ୍ଟ ମାଷ୍ଟର ଅଭିମନ୍ୟୁ ଛତ୍ରିଆ ୬୦ ଲକ୍ଷ ଟଙ୍କା ହଡପ ଅଭିଯୋଗରେ ଗିରଫ ହୋଇ କୋର୍ଟ ଚାଲାଣ ହୋଇଥିଲେ । ତଦନ୍ତରୁ ସ୍ପଷ୍ଟ ହୋଇଥିଲା ପ୍ରଥମେ ଅନଲାଇନ ଗେମ୍‌ରେ ଟଙ୍କା ଲଗାଇଥିଲେ । ଆଜି ହେବ କାଲି ହେବ କହି ବାରବାର ଅନଲାଇନ ଗେମ୍‌ରେ ଟଙ୍କା ଲଗାଉଥିଲେ ଦୁଇ କର୍ମଚାରୀ ।

ପୋଷ୍ଟ ଅଫିସକୁ ଟଙ୍କା ଡିପୋଜିଟ କରିବାକୁ ଆସୁଥିବା ଗ୍ରାହକଙ୍କ ଟଙ୍କାକୁ ଅନଲାଇନ ଗେମରେ ଲଗାଉଥିଲେ ଉଭୟ କର୍ମଚାରୀ । ପାଖାପାଖି ୬୦ ଲକ୍ଷ ଟଙ୍କା ପୋଷ୍ଟ ଅଫିସରେ ଡିପୋଜିଟ ନହେବା ପରେ ପ୍ରଘଟ ହୋଇଥିଲା କଥା । ସାମ୍ନାକୁ ଆସିଲା ସାଂଘାତିକ ତଥ୍ୟ । ଅନଲାଇନ ଗେମରେ ନିଜ ଟଙ୍କା ତକ ସରିଗଲା ପରେ, ପୋଷ୍ଟ ଅଫିସରୁ ଫନ୍ଦିଫିକର କରି ଅନଲାଇନ ଗେମରେ ବିଭାଗୀୟ ଟଙ୍କା ଲଗାଇଥିଲେ ଦୁଇ କର୍ମଚାରୀ । କେବଳ ଗୋଟିଏ ଘଟଣା ନୁହେଁ, ଏଭଳି ଅନେକ ଘଟଣାରେ ଏବେ ଯୁବ ସମାଜ ଫଶିଥିବା କହିଛନ୍ତି ବଲାଙ୍ଗିର ଏସ୍.ପି । 

ସେଥିପାଇଁ ଜିଲ୍ଳାର ବିଭିନ୍ନ ଅଂଚଳରେ ବୁଲୁଛି ସଚେତନତା ରଥ । କିନ୍ତୁ ଅନଲାଇନ ଗେମ୍‌ରୁ ଯୁବକ ଅପରାଧି ହେଉଥିବାରୁ, ଅନଲାଇନ ଗେମ୍‌ର ଆଇନଗତ ଦିଗ ପ୍ରତି ତଦନ୍ତ କରୁଥିବା କହିଛନ୍ତି ଉତ୍ତରାଂଚଳ ଆଇ.ଜି । 

ଅଧିକ ପଢ଼ନ୍ତୁ: କୋହଳ ହେବ କଏଦୀଙ୍କ ସଜା, ସମୟ ଆଗରୁ ମୁକ୍ତିର ଆନନ୍ଦ