ପ୍ରଥମେ ପ୍ରେମ ଜାଲରେ ଫସାଇ ଟଙ୍କା ଆଦାୟ କରନ୍ତି । ଟଙ୍କା ନଦେଲେ ଆଣନ୍ତି ମିଥ୍ୟା ଦୁଷ୍କର୍ମ ଅଭିଯୋଗ । ପରେ ଆପୋଷ ବୁଝାମଣା ଆଳରେ କରିଦିଅନ୍ତି କାଙ୍ଗାଳ ।
ଡଉଲ ଡାଉଲ ଚେହେରା। ଦେଖିବାକୁ ବେସ୍ ସୁନ୍ଦର। ହେଲେ ଚିନ୍ତା ତାଙ୍କର ଭୟଙ୍କର। ବୁଢ଼ିଆଣୀ ଜାଲରେ ଥରେ ଯିଏ ଫସିଛି, ଆଉ ଫିଟିବାର ବାଟ ପାଇନି। ଖାଲି କରିଦିଅନ୍ତି ପୁରୁଷଙ୍କ ବ୍ୟାଙ୍କ ଆକାଉଣ୍ଟ। ସୁନ୍ଦରୀଙ୍କ ଏହି ମାୟାରେ ପଢ଼ିଛନ୍ତି ଅନେକ। ହେଲେ ଏବେ ପୋଲିସ ପଞ୍ଝାରେ ପଡ଼ିଛନ୍ତି ଏହି ତିନି ହନିଟ୍ରାପ୍ କୁଇନ୍। ରାଜସ୍ଥାନର ଦୌସାରୁ ଆସିଛି ଲେଡି ଲୁଟେରାଙ୍କ ଏଭଳି କିଛି ନୂଆ ମାମଲା।
Also Read
ଅଧିକ ପଢନ୍ତୁ: ସ୍ତ୍ରୀକୁ ମାରି ସୁଟକେସରେ ରଖିଲା, ଘରକୁ ଫେରି ବିଷ ପିଇଲା ଅଭିଯୁକ୍ତ
ଜୟପୁରର ଏବଂ ଅଲୱରରେ ରୁହନ୍ତି ତିନି ଜଣ ମହିଳା। ବୟସ, ୩୦, ୩୨ ଓ ୩୬। ଏମାନଙ୍କ ମୂଳ ଟାର୍ଗେଟ୍ ହେଲେ ପୁରୁଷ। ତାଙ୍କୁ ଫସାଇ ତାଙ୍କଠୁ ଟଙ୍କା ଆଦାୟ କରିବା ହେଉଛି ଏମାନଙ୍କ କାମ। ପୁରୁଷମାନେ କିଭଳି ତାଙ୍କ ମୋହରେ ଫସିବେ ତାହା ସେ଼ମାନଙ୍କୁ ବେଶ୍ ଜଣା। ସୁନ୍ଦର ଚେହେରା ଦେଖାଇ ନିଜ ଆଡକୁ ଟାଣୁଥିଲେ ଆଉ ଲୁଟୁଥିଲେ। ନିକଟରେ ମଇଁଷି ବାଛୁରୀ କିଣିବା ଆଳରେ ଜଣେ ବ୍ୟକ୍ତିଙ୍କୁ ଟାର୍ଗେଟ୍ କରିଥିଲେ ତିନି ମହିଳା। ତେବେ ମଇଁଷି ବିକିବାକୁ ମନା କରିଦେଇଥିଲେ ବ୍ୟକ୍ତିଜଣକ। ଏହାପରେ ଆରମ୍ଭ ହୋଇଯାଇଥିଲା ହଙ୍ଗାମା। ଉକ୍ତ ବ୍ୟକ୍ତିଙ୍କ ଘରକୁ ଯାଇ ୫୦ ଜହାର ଟଙ୍କା ଦାବି କରିଥିଲେ ସୁନ୍ଦରୀ। ନ ଦେଲେ ମିଛ ଦୁଷ୍କର୍ମ ମାମଲାରେ ଫସାଇବାକୁ ବି ଧମକ ଦେଇଥିଲେ। ଅଭିଯୋଗ ପରେ ପୋଲିସ ଏବେ ତିନି ମହିଳାଙ୍କୁ ଗିରଫ କରିଛି। ସିକନ୍ଦରା, ବଲାହେରୀ ଓ ଜୟପୁରରୁ ଅନେକଙ୍କ ଲୋକଙ୍କୁ ଏମାନେ ହନିଟ୍ରାପ୍ରେ ଫସାଇ ପୁଳା ପୁଳା ଟଙ୍କା ଲୁଟ୍ କରିଥିବା ତଦନ୍ତରୁ ଜଣାପଡିଛି।
ତେବେ ଏମାନଙ୍କ ମୁଖିଆ କିଏ ? ଆଉ କାହା ସହ ରହିଛି ଏହି ସୁନ୍ଦରୀଙ୍କ ଲିଙ୍କ ? ଗ୍ୟାଙ୍ଗରେ ଆଉ କିଏ କିଏ ସାମିଲ ଅଛନ୍ତି ? ମହିଳାମାନଙ୍କୁ ପଚରାଉଚରା କଲେ ହନିଟ୍ରାପ୍ର ଅଧିକ ମାମଲା ସାମ୍ନାକୁ ଆସି ପାରିବ।