ରାଉରକେଲା ସହରରେ ସତରେ କଣ ଭୁଶୁଡ଼ି ପଡିଛି ଆଇନ ଶୃଙ୍ଖଳା? ଦିନକୁ ଦିନ ଯେଭଳି ଭାବେ ଅପରାଧ ବଢୁଛି, ତାକୁ ଦେଖି ଆତଙ୍କିତ ସହର ବାସିନ୍ଦା । ନା ପୋଲିସ ଅପରାଧୀଙ୍କ ଟେର୍ ପାଉଛି, ନା ରୋକ୍ ଲାଗୁଛି ଅପରାଧରେ । ସାତ ଦିନ ମଧ୍ୟରେ ଗଣ ଦୁଷ୍କର୍ମ, ଚୋରି, ରାହାଜାନି, ଅସଦାଚରଣ, ମର୍ଡର ଭଳି ଘଟଣା ଏବେ ରାଉରକେଲା ବାସିନ୍ଦାଙ୍କ ପାଇଁ ମୁଣ୍ଡ ବିନ୍ଧାର କାରଣ ପାଲଟିଥିବା ବେଳେ ପୋଲିସ ପାଇଁ ଚ୍ୟାଲେଂଜ ପାଲଟିଛି ।
ଅସୁରକ୍ଷିତ ପାଲଟିଛି କି ରାଉରକେଲା? କ୍ରାଇମ ସିଟି ପାଲଟିଲାଣି କି ଷ୍ଟିଲସିଟି ? ବଢି ଚାଲିଛି କ୍ରାଇମ୍, ବୋଲ୍ ମାନୁ ନାହାନ୍ତି କ୍ରିମିନାଲ୍ ! ବିଗିଡ଼ି ଗଲାଣି କି ଆଇନ୍ ଶୃଙ୍ଖଳା ପରିସ୍ଥିତି? ଗଲା ୭ ଦିନ ଭିତରେ ରାଉରକେଲା ସହରରେ ଘଟି ଚାଲିଛି ଅପରାଧ ପରେ ଅପରାଧ ।
ଅଧିକ ପଢ଼ନ୍ତୁ: ପାର୍ବଣ ପୂର୍ବରୁ ରାଜଧାନୀରେ ଜୋରଦାର୍ ଧରପଗଡ଼; ଅପରାଧୀଙ୍କ ଆଡ୍ଡାସ୍ଥଳୀରେ ଛାପା ମାରୁଛି ପୋଲିସ
Also Read
ଦୁଇ ଦୁଇଟି ଗଣଦୁଷ୍କର୍ମ, ମର୍ଡର, ଅସଦାଚରଣ ଭଳି ଅଭିଯୋଗ ପରେ ଏବେ ଭୟଭୀତ ସହର ବାସିନ୍ଦା । ଏଠି ମହିଳା ହୁଅନ୍ତୁ ଅବା ନାବାଳିକା... କେହି ସୁରକ୍ଷିତ ନୁହଁନ୍ତି ବୋଲି ଆଶଙ୍କା ପ୍ରକାଶ କରିଛନ୍ତି ଲୋକେ । ଚଳିତ ମାସ ୨୧ ତାରିଖ ବିର୍ସାମୁଣ୍ଡା ଛକରେ ୨ ନାବାଳିକାଙ୍କୁ ଦୁଷ୍କର୍ମ ଅଭିଯୋଗରେ ପ୍ଲାଣ୍ଟସାଇଡ ଥାନା ପୋଲିସ ୩ ଅଭିଯୁକ୍ତଙ୍କୁ ଗିରଫ କରିଥିଲା ।
ଠିକ୍ ଏହାର ୨ ଦିନ ପରେ ୨୪ ତାରିଖ ଦିନ ରାଉରକେଲା ଷ୍ଟେସନ ନିକଟ ଏକ ସ୍କୁଲରେ ଜଣେ ନାବାଳିକାକୁ ଶିକ୍ଷକ ଅସଦାଚରଣ କରିଥିବା ଅଭିଯୋଗ ହୋଇଥିଲା । ଏହାର ଗୋଟିଏ ଦିନ ପରେ ୨୫ ତାରିଖ ଦିନ ରଘୁନାଥପାଲି ଥାନାଂଚଳରେ ଆଉ ଜଣେ ନାବାଳିକାକୁ ୫ ଜଣ ଯୁବକ ଗଣଦୁଷ୍କର୍ମ ଅଭିଯୋଗ ହୋଇଛି ।
ପୋଲିସ ତଦନ୍ତ କରୁଥିବା ବେଳେ ସେଇ ୨୫ ତାରିଖ ସଂଧ୍ୟାବେଳେ ସେକ୍ଟର-୭ ଥାନା ଅଂଚଳରେ ଜଣେ ଯୁବକଙ୍କୁ ହତ୍ୟା କରିଥିବା ନେଇ ଅଭିଯୋଗ ହୋଇଥିଲା । ତେବେ ମର୍ଡର ଓ ରଘୁନାଥପାଲି ଥାନା ଗଣଦୁଷ୍କର୍ମ ଅଭିଯୋଗ ଘଟଣାରେ ଏବେ ଯାଏ ପୋଲିସର ହାତ ଖାଲି ଥିବାବେଳେ ଏସପି କହିଛନ୍ତି, ତଦନ୍ତ ଚାଲିଛି, ଶୀଘ୍ର ଅପରାଧୀ ଧରା ପଡ଼ିବେ ।
ରାଉରକେଲାର ବିଗୁଡୁଥିବା ଆଇନ ଶୃଙ୍ଖଳା ସ୍ଥିତିକୁ ନେଇ ତେଜିଛି ରାଜନୀତି । ବିଜେଡି ଓ ବିଜେପି ପରସ୍ପରକୁ ଦୋଷାରୋପ କରିଛନ୍ତି । ଆଗକୁ ପୋଲିସ ଉପରେ ଭରସା କରିପାରିବେ ତ ଜନସାଧାରଣ? ରୋକ୍ ଲାଗିବ କି ଅପରାଧ ଉପରେ?