ବାଲେଶ୍ୱର ନୀଳଗିରିର ବ୍ୟସ୍ତ ବହୁଳ ସନ୍ତରାଗଡିଆ ବଜାର । ଖଚାଖଚ ଥାଏ ଭିଡ଼ । ଗ୍ରାହକ ଓ ଦୋକାନୀ, କାହାକୁ ତର ନାହିଁ । ଯାହାର ଫାଇଦା ଉଠାଇଛନ୍ତି ଜାଲ୍ ନୋଟ୍ର କାରବାର କରୁଥିବା ଦଲାଲ । ଛୋଟ ଦୋକାନ ଓ ସାପ୍ତାହିକ ହାଟର ଭିଡ଼ରେ ପଶି ଅତି ସହଜରେ ଚଳାଇ ନେଇଛନ୍ତି ହଜାର ହଜାର ଟଙ୍କାର ନକଲି ନୋଟ୍ । ହେଲେ ଧରା ପଡିଯାଇଛନ୍ତି ବିଦେଶୀ ମଦ କାଉଣ୍ଟରରେ ।
ଜାଲ୍ ନୋଟ୍ କାରବାର ଅଭିଯୋଗରେ ପୋଲିସ ଦୁଇ ଜଣଙ୍କୁ ଗିରଫ କରିଛି । ସେମାନଙ୍କ ଠାରୁ ୩୨ ହଜାର ୭ ଶହ ଟଙ୍କାର ଜାଲ୍ ନୋଟ୍ ଜବତ ହୋଇଛି । ବଡ଼ କଥା ହେଉଛି ଯେ, ଜବତ ଜାଲ୍ ନୋଟ୍ ଭିତରେ ୫ ଶହ ସମେତ ଶହେ ଏବଂ ଦୁଇ ଶହର ନୋଟ୍ ବି ରହିଛି । ଯାହାକୁ ନେଇ ବ୍ୟବସାୟୀ ଓ ଗ୍ରାହକଙ୍କ ମଧ୍ୟରେ ଖେଳିଯାଇଛି କୋକୁଆ ଭୟ ।
Also Read
ଏପଟେ ଗତକାଲି ଜାଲନୋଟ୍ ମିଳିଥିବା ସୋନପୁର ଉଲୁଣ୍ଡା ଥାନା ମାଟଖାଇ ନୂଆବସ୍ତିରେ ଆଜି ଖୋଳତାଡ଼ କରିଛି କ୍ରାଇମବ୍ରାଂଚ୍ ଏସଟିଏଫ୍ ଟିମ୍ । ଜାଲ୍ ନୋଟ୍ କାରବାରରେ ଗିରଫ ଦୀପକ ମେହେରର ପରିବାର ସଦସ୍ୟଙ୍କୁ ପଚରାଉଚରା ହୋଇଛି । ଜାଲ୍ ନୋଟ୍ ଏଠାରେ ତିଆରି ହେଉଥିଲା କି ? ଯଦି ହେଉନଥିଲା ତେବେ କିଏ, କେବେ ଏବଂ କାହିଁକି ଏହି ନକଲି ନୋଟ୍ ଦେଇଥିଲା ? ଜାଲ୍ ନୋଟ୍ କାରବାରରେ ଆଉ କିଏ କିଏ ସଂପୃକ୍ତ ? ଏନେଇ ଘଂଟାଚକଟା କରିଛି ଏସଟିଏଫ୍ । ପରେ ଟିମ୍ ଜାଲ୍ ନୋଟ୍ କାରବାରର ଲିଙ୍କ ଖୋଜିବାକୁ ଛତିଶଗଡ ଯାଇଥିବା ସୂଚନା ମିଳିଛି ।
ଗତକାଲି ସୋନପୁରରେ ଚଢାଉ ବେଳେ କ୍ରାଇମବ୍ରାଂଚ୍ STF ହାତରେ ଲାଗିଥିଲା ୪୧ ଲକ୍ଷ ୧୬ ହଜାର ଟଙ୍କାର ନକଲି ନୋଟ୍ । ଜବତ ହୋଇଥିବା ଜାଲ୍ ନୋଟ୍ ଛତିଶଗଡରୁ ପଶ୍ଚିମ ଓଡିଶାର ବିଭିନ୍ନ ସୀମାବର୍ତ୍ତୀ ଜିଲ୍ଲା ଦେଇ ଓଡ଼ିଶାରେ ପ୍ରବେଶ କରୁଥିବା ବେଳେ ୧ ଲକ୍ଷର ଫେକ୍ ନୋଟ୍ ପାଇଁ ୧୦ରୁ ୨୫ ହଜାର ଟଙ୍କା ଯାଏଁ ଡିଲ୍ ହେଉଥିବା STF ସୂଚନା ଦେଇଛି।
କ୍ରାଇମବ୍ରାଂଚ୍ ଏସଟିଏଫ୍ ଏଯାଏଁ ୧ କୋଟି ୧୯ ଲକ୍ଷ ଟଙ୍କାର ନକଲି ନୋଟ ଜବତ କରିଛି । ତାମଧ୍ୟରୁ ଗତ ଫେବ୍ରୁଆରୀରେ ଟିଟଲାଗଡରୁ ୩୧ ଲକ୍ଷ ଟଙ୍କାର ଜାଲ୍ ନୋଟ୍ ଜବତ ହୋଇଥିଲା। ଏହା ପୂର୍ବରୁ ବରଗଡର ବରପାଲି, ରାଉରକେଲା ଏବଂ ସମ୍ବଲପୁରର ଜୁଜୁମରାରୁ ବିପୁଳ ପରିମାଣର ନକଲି ନୋଟ୍ ଜବତ ହୋଇଥିଲା।