LIVE TV
ନାବାଳକ ବୋଲି ଜାମିନ୍, କି ଧନୀ ବାପାର ପୁଅ ବୋଲି ମିଳିଲା ଜାମିନ୍ । ଦୁର୍ଘଟଣାରେ ଚାଲିଗଲେ ଦମ୍ପତ୍ତି । କିନ୍ତୁ ଦୁର୍ଘଟଣା ଘଟାଇଥିବା ନାବାଳକକୁ ମାତ୍ର ୧୪ ଘଣ୍ଟାରେ ମିଳିଗଲା ଜାମିନ୍ । ବୟସ ମାତ୍ର ୧୭ ବର୍ଷ । ମଦ ପିଇ ଗାଡ଼ି ଚଲାଉଥିଲା ନାବାଳକ । ଆଖି ଖୋସିଦେବା ଭଳି ଥିଲା ବେଗ ।
୨୦୦ କିଲୋମିଟର ପ୍ରତି ଘଣ୍ଟା ବେଗରେ ଆସୁଥିବା ସ୍ପୋର୍ଟ୍ସ କାରରେ ପିଟିହୋଇ ଚାଲିଗଲା ସ୍ୱାମୀ-ସ୍ତ୍ରୀଙ୍କ ଜୀବନ । ମାତ୍ର, ୧୪ ଘଣ୍ଟା ମଧ୍ୟରେ ଅଭିଯୁକ୍ତ ନାବାଳକକୁ ଜାମିନ୍ ଦେଇଦେଲେ କୋର୍ଟ । ଏପରି ଏକ ଘଟଣା ବର୍ତ୍ତମାନ ସାରା ଦେଶରେ ହଇଚଇ ସୃଷ୍ଟି କରିଛି । କିପରି ଏତେ ବଡ଼ ଅପରାଧ ପାଇଁ ଏତେ ଶୀଘ୍ର ମିଳିଗଲା ଜାମିନ୍ ।
ଏପରି ନ୍ୟାୟ ପଛରେ କାରଣ ବଡ଼ଘରର ପୁଅ ନୁହେଁ ତ! ସଡ଼କ ଦୁର୍ଘଟଣା ଉପରେ ରଚନା ଲେଖିବାର ସର୍ତ୍ତ ରଖି ଜାମିନ୍ ମିଳିଛି । ଏହାକୁ ନେଇ ବର୍ତ୍ତମାନ ପୂରା ଦେଶରେ ତୁମ୍ବିତୋଫାନ୍ ଆରମ୍ଭ ହୋଇଯାଇଛି । ମିଳିଥିବା ଖବର ଅନୁସାରେ, ପୁଣେର କଲ୍ୟାଣୀ ନଗର ଅଞ୍ଚଳରେ ଆଇଟି ସେକ୍ଟରରେ କାର୍ଯ୍ୟ କରୁଥିବା ଦମ୍ପତ୍ତି ସେମାନଙ୍କର ବନ୍ଧୁଙ୍କ ଘରୁ ଫେରୁଥିଲେ ।
Also Read
ବାଇକ ଯୋଗେ ସେମାନେ ଫେରିବା ବେଳେ ଦ୍ରୁତ ବେଗରେ ଆସୁଥିବା ପୋର୍ସେ ନାମକ ଏକ ସ୍ପୋର୍ଟ୍ସ କାର ଧକ୍କା ଦେଇଥିଲା । ଫଳରେ ଘଟଣାସ୍ଥଳରେ ହିଁ ସେମାନଙ୍କର ମୃତ୍ୟୁ ହୋଇଯାଇଥିଲା । ଦମ୍ପତ୍ତିଙ୍କର ନାମ ଅନିଶ ଅୱଧିଆ ଓ ଅଶ୍ୱିନୀ କୋଷ୍ଟା ବୋଲି ଜଣାପଡ଼ିଥିଲା । ଗାଡ଼ି ଚଳାଉଥିବା ନାବାଳକ ଜଣକ ସ୍ଥାନୀୟ ଜଣେ ବଡ଼ ଠିକାଦାରଙ୍କର ପୁଅ ବୋଲି ଜଣାପଡ଼ିଥିଲା ।
ମଦ୍ୟପାନ କରି ଅତି ତୀବ୍ର ବେଗରେ ସେ ଗାଡ଼ି ଚଳାଉଥିଲା । ଗାଡ଼ିଟି ବାପାଙ୍କ ନାଁରେ ଥିବା ବେଳେ ସେଥିରେ ନମ୍ବର ପ୍ଲେଟ୍ ମଧ୍ୟ ନଥିଲା । ପରେ ପୋଲିସ ଘଟଣାସ୍ଥଳରେ ପହଞ୍ଚି ଚାଳକକୁ ଗିରଫ କରିବା ସହ ଗାଡ଼ି ମଧ୍ୟ ଜବତ କରିଥିଲା । ଏନେଇ ଏକ ସିସିଟିଭି ଫୁଟେଜ ମଧ୍ୟ ଭାଇରାଲ ହୋଇଛି ।
ଦୁର୍ଘଟଣା ଘଟିବାର କିଛି ସମୟ ପୂର୍ବରୁ ସେ ନିଜର ଦ୍ୱାଦଶ ଶ୍ରେଣୀ ଫଳାଫଳ ବାହାରିବାର ଖୁସିକୁ ପାର୍ଟି କରି ପାଳନ କରୁଥିଲେ । ସିସିଟିଭି ଫୁଟେଜରେ ଏହାର ଦୃଶ୍ୟ କଏଦ ହୋଇଛି । ଭିଡିଓରେ ଦେଖିବାକୁ ମିଳୁଛି ଯେ, ନାବାଳକ ଜଣକ ନିଜ ସାଙ୍ଗମାନଙ୍କ ସହ ମଦ୍ୟପାନ କରୁଛନ୍ତି ।
वेदांत अगरवालची Alcohol test निगेटिव्ह आल्याचे समोर आले आहे. परंतु या व्हीडीओ मध्ये तो मित्रांसोबत पार्टी करताना स्पष्ट दिसत आहे. मग वेदांत चा खोटा रिपोर्ट देण्यात आला का? खोटे रिपोर्ट देणार्यांविरुद्ध कारवाई होणार का?@AjitPawarSpeaks @suniltingre @Dev_Fadnavis @DGPMaharashtra pic.twitter.com/gRQdFhzXct
— Archana More-Patil (@Archana_Scoope) May 20, 2024
ମହାରାଷ୍ଟ୍ରରେ ୨୫ ରୁ କମ ବୟସର ପିଲାଙ୍କ ପାଇଁ ମଦ୍ୟପାନ ବାରଣ ଥିବା ବେଳେ ସେ କିପରି ପିଇଲେ ଏହାକୁ ନେଇ ମଧ୍ୟ ବିତର୍କ ଆରମ୍ଭ ହୋଇଯାଇଛି । ଏନେଇ ଉକ୍ତ ବାର୍ ମାଲିକଙ୍କୁ ମଧ୍ୟ ନୋଟିସ୍ ମିଳିଛି ।
ଜାମିନ୍ ସର୍ତ୍ତ
ଟ୍ରାଫିକ ପୋଲିସ ସହ ୧୫ ଦିନ କାମ କରିବା ସହ ମଦ ପିଇବାର ଅଭ୍ୟାସ ପାଇଁ ନିଜର ଚିକିତ୍ସା କରାଇବାକୁ ସର୍ତ୍ତ ରଖି କୋର୍ଟ ଜାମିନ ଦେଇଛନ୍ତି । ଅଭିଯୁକ୍ତ ବିରୋଧରେ ପୋଲିସ IPC ଧାରା ୩୦୪ ଅନୁସାରେ ମାମଲା ରୁଜୁ କରିଥିଲା । ଅଭିଯୁକ୍ତ ନାବାଳକ ନୁହେଁ ବରଂ ଜୁଭେନାଇଲ ଜଷ୍ଟିସ୍ ଆକ୍ଟ ଧାରା ୨ ଅନୁଯାୟୀ ସାବାଳକ ଭାବେ ବିଚାର କରିବାକୁ ପୋଲିସ ସର୍ତ୍ତ ରଖିଥିଲା ।
କିନ୍ତୁ ଏ ସମସ୍ତ ବିଷୟକୁ ଅଣଦେଖା କରି କୋର୍ଟ ଅଭିଯୁକ୍ତ ନାବାଳକୁ ଜାମିନ୍ ପ୍ରଦାନ କରିଛନ୍ତି । ୩୦୦ ଶବ୍ଦର ଦୁର୍ଘଟଣା ଉପରେ ରଚନା ଲେଖିବାର ସର୍ତ୍ତରେ ଜାମିନ ଦେଇଛନ୍ତି କୋର୍ଟ । ଏହାକୁ ନେଇ ଦେଶରେ ଝଡ଼ ସୃଷ୍ଟି ହୋଇଛି । ଅଭିଯୁକ୍ତ ଚାଳକକୁ କଡ଼ା ଦଣ୍ତ ବଦଳରେ ଏପରି ସର୍ତ୍ତରେ ଜାମିନ୍ ଦେବା ଚର୍ଚ୍ଚାର ବିଷୟ ପାଲଟିଛି । ଏହାକୁ ପୁଣେ ପୋଲିସ କମିସନର ମଧ୍ୟ ବିରୋଧ କରିଛନ୍ତି ।
