Force Conversion: ଧର୍ମ ପରିବର୍ତ୍ତନ କରିବାକୁ ପକାଉଥିଲେ ଚାପ, ମାମଲା ରୁଜୁ ପରେ ଫେରାର୍

ଏମିତି ଏକ ସାଂଘାତିକ ଖବର ଆସିଛି ତ୍ତରପ୍ରଦେଶର ନୋଏଡାରୁ। ଜଣେ ୩୦ ବର୍ଷୀୟ ମହିଳାଙ୍କ ସହ ଘଟିଛି ଏହି ଘଟଣା। ଜଣେ ମୁସଲମାନ୍ ପୁରୁଷ ବିବାହ ପ୍ରତିଶ୍ରୁତି ଦେଇ ବାରମ୍ବାର ଦୁଷ୍କର୍ମ କରୁଥିଲେ ଆଉ ଏବେ ଯେତେବେଳେ ବିବାହ କଥା ଉଠୁଛି ସେ ତାଙ୍କୁ ଜୋରଜବରଦସ୍ତ ଧର୍ମ ପରିବର୍ତ୍ତନ କରିବାକୁ ଚାପ ପକାଉଥିବା ଅଭିଯୋଗ ହୋଇଛି।

ମହିଳାଙ୍କ ଅଭିଯୋଗ ଅନୁଯାୟୀ, ଆସିଫ ତାଙ୍କୁ ବାରମ୍ବାର ଦୁଷ୍କର୍ମ କରିଛନ୍ତି ଏବଂ ବିବାହ ପାଇଁ ତାଙ୍କୁ ଧର୍ମ ପରିବର୍ତ୍ତନ କରିବାକୁ ଚାପ ପକାଉଛନ୍ତି। ଅଭିଯୋଗ ପରେ ନୋଏଡାର ସେକ୍ଟର ୧୧୩ ପୁଲିସ ଏକ ମାମଲା ରୁଜୁ କରିଛି ଏବଂ ବର୍ତ୍ତମାନ ଫେରାର ଥିବା ଆସିଫ୍‌ଙ୍କୁ ଖୋଜିବା ଆରମ୍ଭ କରିଛି।

ରିପୋର୍ଟ ଅନୁସାରେ ମହିଳା ଜଣଙ୍କ ୨୦୧୯ ମସିହାରେ ଫରିଦାବାଦରେ ଜଣେ ଯୁବକଙ୍କୁ ବିବାହ କରିଥିଲେ। କିନ୍ତୁ ସେମାନଙ୍କ ବିବାହ ବିଚ୍ଛେଦ ହୋଇ ନଥିଲେ ମଧ୍ୟ ଏବେ ସେମାନେ ଅଲଗା ରହୁଛନ୍ତି। ମହିଳାଙ୍କ କହିବା କଥା, ସେ ତାଙ୍କ ସ୍ୱାମୀଙ୍କ ମଦ୍ୟପାନ ଅଭ୍ୟାସ ଯୋଗୁଁ ଅତିଷ୍ଠ ହୋଇ ଯାଇଥିଲେ ଆଉ ଅଲଗା ରହିବାକୁ ନିଷ୍ପତ୍ତି ନେଇଥିଲେ।

ମହିଳା ଜଣକ ନୋଏଡାରେ ତାଙ୍କ ଝିଅ ସହିତ ରହିଥିଲେ ଆଉ ସେକ୍ଟର ୧୨୧ରେ ଥିବା ଆସିଫଙ୍କ ଏକ ସେଲୁନ୍‌ରେ ମଧ୍ୟ କାମ କରିବା ଆରମ୍ଭ କରିଥିଲେ। ଏହାରି ଭିତରେ ଉଭୟଙ୍କ ମନ ମିଶିଲା ଓ ସେମାନଙ୍କ ମଧ୍ୟରେ ଗଢ଼ି ଉଠିଥିଲା ପ୍ରେମ ସମ୍ପର୍କ। ପରେ ସେମାନେ ଏକାଠି ରହିବା ଆରମ୍ଭ କରିଥିଲେ।

ଆସିଫ୍ ବିବାହର ପ୍ରତିଶ୍ରୁତି ଦେଉଥିଲେ ଆଉ ମହିଳାଙ୍କୁ ବାରମ୍ବାର ଦୁଷ୍କର୍ମ କରିବାର ଫାଇଦା ନେଉଥିଲେ। ମହିଳା ଜଣକ ଯେତେବେଳେ ବିବାହ ପାଇଁ କହୁଥିଲେ, ଆସିଫ ତାଙ୍କୁ ଧର୍ମ ପରିବର୍ତ୍ତନ କରି ଇସ୍‌ଲାମ୍ ହେବା ପାଇଁ ଚାପ ପକାଉଥିଲେ, ଆଉ ଧର୍ମ ପରିବର୍ତ୍ତନ ନ କଲେ ବିବାହ ହୋଇପାରିବ ନାହିଁ ବୋଲି କହୁଥିଲେ। ଖାଲି ଏତିକି ନୁହେଁ ଆସିଫ ତାଙ୍କୁ ଜବରଦସ୍ତି କଲମା ପଢାଉଥିଲେ ଏବଂ ମାରପିଟ ମଧ୍ୟ କରୁଥିବା ଅଭିଯୋଗ ହୋଇଛି।

ସେକ୍ଟର-୧୧୩ ଥାନା ପ୍ରଭାରୀ କହିଛନ୍ତି ଯେ ମହିଳାଙ୍କ ଅଭିଯୋଗ ଆଧାରରେ ଏକ ମାମଲା ରୁଜୁ କରାଯାଇଛି। ଅଭିଯୁକ୍ତ ଏବେ ଫେରାର୍ ଅଛି ଏବଂ ତାକୁ ଖୋଜା ଚାଲିଛି। ଅଭିଯୁକ୍ତକୁ ଖୁବ୍ ଶୀଘ୍ର ଗିରଫ କରାଯିବ।

(ବ୍ୟୁରୋ ରିପୋର୍ଟ୍, ଓଟିଭି)