Vijay Mallya: ମାଲ୍ୟା ଓ ନୀରବ ଭଳି ପଳାତକ ଅଭିଯୁକ୍ତ ଭାରତ ଫେରିବେ, ରହିବେ ତିହାର ଜେଲରେ ?

ଜୁଲାଇ ମାସରେ ବ୍ରିଟେନର କ୍ରାଉନ ପ୍ରୋସିକ୍ୟୁସନ ସର୍ଭିସ (ସିପିଏସ)ର ଏକ ଦଳ ତିହାର ଜେଲର ନିରୀକ୍ଷଣ କରିଥିଲେ। ଏହି ଦଳରେ ପାଞ୍ଚ ଜଣ ସଦସ୍ୟ ଥିଲେ। ଏହି ଗସ୍ତର ଉଦ୍ଦେଶ୍ୟ ଥିଲା ବ୍ରିଟେନର ଅଦାଲତଗୁଡ଼ିକୁ ଦେଖାଇବା ଯେ ଏହି ଅଭିଯୁକ୍ତମାନଙ୍କୁ ତିହାର ଜେଲରେ ସୁରକ୍ଷିତ ପରିବେଶ ମିଳିବ। ବ୍ରିଟେନର ଅଦାଲତଗୁଡ଼ିକ ଅନେକ ମାମଲାରେ ଭାରତର ପ୍ରତ୍ୟର୍ପଣ ଆବେଦନକୁ ଖାରଜ କରିଦେଇଥିଲେ। ଏହାର କାରଣ ଭାବେ ତିହାର ଜେଲର ସ୍ଥିତିକୁ ଦର୍ଶାଯାଇଥିଲା। ଏହା ପରେ ଭାରତ ସରକାର ଅଦାଲତଗୁଡ଼ିକୁ ଆଶ୍ୱାସନା ଦେଇଥିଲେ ଯେ ଜେଲରେ ଅଭିଯୁକ୍ତମାନଙ୍କୁ ମାଡ ମରାଯିବ ନାହିଁ କି ସେମାନଙ୍କୁ ଅବୈଧ ଭାବେ ପଚରାଉଚରା କରାଯିବ ନାହିଁ।

ସିପିଏସ ଦଳକୁ କୁହାଯାଇଥିଲା ଯେ ଜେଲରେ ସେମାନଙ୍କୁ ମାନବାଧିକାର ଅନୁସାରେ ସୁବିଧା ଯୋଗାଇ ଦିଆଯିବ। ଜେଲ ଅଧିକାରୀମାନେ ସିପିଏସ ଦଳକୁ ଆଶ୍ୱାସନା ଦେଇଥିଲେ ଯେ ଆବଶ୍ୟକ ହେଲେ ଜେଲ ପରିସରରେ ଏକ ବିଶେଷ ‘ଏନକ୍ଲେଭ’ ନିର୍ମାଣ କରାଯିବ, ଯେଉଁଠାରେ ବିଜୟ ମାଲ୍ୟା ଓ ନୀରବ ମୋଦି ଭଳି ହାଇ-ପ୍ରୋଫାଇଲ ଅଭିଯୁକ୍ତମାନଙ୍କୁ ସୁରକ୍ଷିତ ଭାବେ ରଖାଯାଇପାରିବ। ବ୍ରିଟେନରୁ ଆସିଥିବା ଅଧିକାରୀମାନେ ଜେଲର ହାଇ-ସିକ୍ୟୁରିଟି ଓ୍ୱାର୍ଡର ନିରୀକ୍ଷଣ କରିଥିଲେ। ସେମାନେ ସେଠାକାର କେତେଜଣ ବନ୍ଦୀଙ୍କ ସହ ମଧ୍ୟ କଥାବାର୍ତ୍ତା କରିଥିଲେ।

ବିଦେଶରେ ଭାରତର ୧୭୮ଟି ପ୍ରତ୍ୟର୍ପଣ ଆବେଦନ ବାକି ଅଛି। ଏଥିମଧ୍ୟରୁ ୨୦ଟି ବ୍ରିଟେନରେ ଅଛି, ଯେଉଁଥିରେ ବିଜୟ ମାଲ୍ୟା, ନୀରବ ମୋଦି, ଅସ୍ତ୍ର ବ୍ୟବସାୟୀ ସଞ୍ଜୟ ଭଣ୍ଡାରୀ ଏବଂ ଅନେକ ଖଲିସ୍ତାନୀ ନେତାଙ୍କ ନାମ ଅନ୍ତର୍ଭୁକ୍ତ। କେନ୍ଦ୍ର ସରକାର ଏହି ମାମଲାଗୁଡ଼ିକ ନେଇ ବ୍ରିଟେନ ସରକାରଙ୍କ ସହ ଯୋଗାଯୋଗରେ ଅଛନ୍ତି। ବିଜୟ ମାଲ୍ୟାଙ୍କ ବିରୁଦ୍ଧରେ ଭାରତରେ ପ୍ରାୟ ୯,୦୦୦ କୋଟି ଟଙ୍କାର ଋଣ ଖିଲାପ ସମ୍ପର୍କିତ ଅନେକ ମାମଲା ଚାଲିଛି।

୨୦୧୬ ମସିହାରେ ସେ ଦେଶ ଛାଡ଼ି ଫେରାର ହୋଇଯାଇଥିଲେ। ୫ ଜାନୁଆରୀ, ୨୦୧୯ରେ ମୁମ୍ବାଇର ଏକ ବିଶେଷ ଅଦାଲତ ମାଲ୍ୟାଙ୍କୁ ‘ପଳାତକ’ ଘୋଷଣା କରିଥିଲା। ହୀରା ବ୍ୟବସାୟୀ ନୀରବ ମୋଦି ଏବଂ ତାଙ୍କ ମାମୁ ମେହୁଲ ଚୋକ୍ସୀଙ୍କ ବିରୁଦ୍ଧରେ ପଞ୍ଜାବ ନ୍ୟାସନାଲ ବ୍ୟାଙ୍କ (ପିଏନବି) ସହ ପ୍ରାୟ ୧୪,୫୦୦ କୋଟି ଟଙ୍କାର ଠକେଇ କରିବାର ଅଭିଯୋଗ ରହିଛି। ଏହି ଦୁହେଁ ୨୦୧୮ ମସିହାରେ ଭାରତ ଛାଡ଼ି ଫେରାର ହୋଇଯାଇଥିଲେ। ନୀରବ ମୋଦିଙ୍କୁ ୨୦୧୯ ମସିହାରେ ଲଣ୍ଡନରେ ଗିରଫ କରାଯାଇଥିଲା।

ଅଧିକ ପଢ଼ନ୍ତୁ: ସେକ୍ସ ରାକେଟ ଚଳାଇବା ଅଭିଯୋଗରେ ଅଭିନେତ୍ରୀ ଅନୁଷ୍କା ମୋନି ଗିରଫ, ଗ୍ରାହକ ସାଜୁଥିଲେ ହାଇ ପ୍ରୋଫାଇଲ ବିଜନେସମ୍ୟାନ