Murder:ମହଙ୍ଗା ପଡ଼ିଲା ଲିଭ୍‌-ଇନ୍‌ ରିଲେସନସିପ୍ , ପେଟ୍ରୋଲ ଢ଼ାଳି ଜାଳି ଦେଲା ପ୍ରେମିକ

ଜୀବନ ନେଇଗଲା ପୂର୍ବତନ ପ୍ରେମିକ । ପେଟ୍ରୋଲ ଢ଼ାଳି ଜାଳି ଦେଲା ପ୍ରେମିକାକୁ । ଏଭଳି ଅଭାବନୀୟ ଘଟଣା ଘଟିଛି ଆଇଟି ସିଟି ବେଙ୍ଗାଲୁରୁରେ । ଜଣେ ୩୫ ବର୍ଷୀୟ ମହିଳାଙ୍କୁ ତାଙ୍କ ପୂର୍ବତନ ଲିଭ୍‌ ଇନ୍‌ ପାର୍ଟନର ନିଆଁ ଲଗାଇ ଦେଇଛନ୍ତି । ମହିଳାଙ୍କ ନାଁ ବନଜକ୍ଷୀ । ତାଙ୍କୁ ଜଳିଯାଇଥିବା ଅବସ୍ଥାରେ ଡାକ୍ତରଖାନାକୁ ନିଆଯାଇଥିଲା। କିନ୍ତୁ ଚିକିତ୍ସା ସମୟରେ ତାଙ୍କର ମୃତ୍ୟୁ ହୋଇଛି।

ପୁଲିସ୍‌ କହିଛି ଯେ ବନଜକ୍ଷୀ, ବିଠଲ ନାମକ ଜଣେ ଯୁବକଙ୍କ ସହ ରହୁଥିଲେ। ଅଭିଯୁକ୍ତ ଜଣେ କ୍ୟାବ୍‌ ଡ୍ରାଇଭର ଏବଂ ମଦ୍ୟପ । ବନଜକ୍ଷୀ ପ୍ରାୟ ଚାରି ବର୍ଷ ପୂର୍ବେ ତାଙ୍କ ସହ ଲିଭ୍‌-ଇନ୍‌ ସମ୍ପର୍କରେ ଥିଲେ। ଏହା ପୂର୍ବରୁ ସେ ଦୁଇଥର ବିବାହ କରିଥିଲେ। ଅନ୍ୟପକ୍ଷେ ଅଭିଯୁକ୍ତ ତିନିଥର ବିବାହ କରିଥିଲେ। ବନଜକ୍ଷୀ ବିଠଲଙ୍କ ମଦ୍ୟପାନ ଅଭ୍ୟାସରୁ ବିରକ୍ତ ହୋଇ ତାଙ୍କ ଠାରୁ ଦୂରେଇ ଯାଇଥିଲେ। ବନଜକ୍ଷୀଙ୍କର ନିକଟରେ ମରିଅପ୍ପା ନାମକ ଜଣେ ବ୍ୟକ୍ତିଙ୍କ ସହ ବନ୍ଧୁତା ହୋଇଥିଲା। ବିଠଲଙ୍କୁ ଏହି ବନ୍ଧୁତା ପସନ୍ଦ ନଥିଲା। ଏହାକୁ ନେଇ ବନଜକ୍ଷୀଙ୍କୁ ନିଆଁ ଲଗାଇ ଦେଇଥିଲେ ବିଠଲ।

ବନଜକ୍ଷୀ ମରିଅପ୍ପାଙ୍କ ସହ ମନ୍ଦିରକୁ ଯାଇଥିଲେ ଏବଂ ଗୋଟିଏ କ୍ୟାବ୍‌ରେ ଘରକୁ ଫେରୁଥିଲେ। ଏକ ଟ୍ରାଫିକ୍‌ ସିଗନାଲରେ ଗାଡ଼ି ଅଟକିବା ମାତ୍ରେ ଅଭିଯୁକ୍ତ ବନଜକ୍ଷୀ, ମରିଅପ୍ପା ଏବଂ ଡ୍ରାଇଭରଙ୍କ ଉପରେ ପେଟ୍ରୋଲ ଢାଳି ଦେଇଥିଲେ। ବନଜକ୍ଷୀ, ମରିଅପ୍ପା ଏବଂ ଡ୍ରାଇଭର ଗାଡ଼ିରୁ ଦୌଡ଼ି ପଳାଇବାକୁ ଚେଷ୍ଟା କରିଥିଲେ। ଅନ୍ୟମାନେ ପଳାଇବାରେ ସଫଳ ହୋଇଥିଲେ, କିନ୍ତୁ ବିଠଲ ବନଜକ୍ଷୀଙ୍କ ପଛରେ ଯାଇଥିଲା । ତାଙ୍କ ଉପରେ ଆହୁରି ପେଟ୍ରୋଲ ଢାଳି ଲାଇଟରରେ ନିଆଁ ଲଗାଇ ଦେଇଥିଲେ।

ସେହି ରାସ୍ତା ଦେଇ ଯାଉଥିବା ଜଣେ ଯୁବକ ଏହି ଭୟଙ୍କର ଘଟଣା ଦେଖି ବନଜକ୍ଷୀଙ୍କୁ ବଞ୍ଚାଇବାକୁ ଚେଷ୍ଟା କରିଥିଲେ। ସେ ଗୋଟିଏ କପଡ଼ାରେ ନିଆଁକୁ ଲିଭାଇଥିଲେ ଏବଂ ବନଜକ୍ଷୀଙ୍କୁ ଏକ ଘରୋଇ ଡାକ୍ତରଖାନାକୁ ନେଇଥିଲେ। ବନଜକ୍ଷୀ ପ୍ରାୟ ୬୦ପ୍ରତିଶତ ଜଳି ଯାଇଥିଲେ ଏବଂ ଡାକ୍ତରଙ୍କ ସମସ୍ତ ପ୍ରୟାସ ସତ୍ତ୍ୱେ ତାଙ୍କର ମୃତ୍ୟୁ ଘଟିଥିଲା ।

ଘଟଣା ସମୟରେ ବିଠଲ ନିଜେ ମଧ୍ୟ ଆହତ ହୋଇଛନ୍ତି । ହୁଲିମାଭୁ ପୁଲିସ୍‌ ୨୪ ଘଣ୍ଟା ମଧ୍ୟରେ ବିଠଲକୁ ଗିରଫ କରିଥିଲେ। ପୁଲିସ କହିଛି ଯାହା ଘଟିଛି ତାହା ଦୁର୍ଭାଗ୍ୟଜନକ। ଆମେ ୨୪ ଘଣ୍ଟା ମଧ୍ୟରେ ଅଭିଯୁକ୍ତଙ୍କୁ ଗିରଫ କରିଛୁ। ଆମେ ସେହି ବ୍ୟକ୍ତିଙ୍କ ପ୍ରୟାସକୁ ମଧ୍ୟ ପ୍ରଶଂସା କରୁଛୁ ଯିଏ ତାଙ୍କୁ ବଞ୍ଚାଇବାକୁ ଆସିଥିଲେ। ସମସ୍ତ ପ୍ରୟାସ ସତ୍ତ୍ୱେ ମହିଳାଙ୍କର ମୃତ୍ୟୁ ହୋଇଛି। ଅଭିଯୁକ୍ତକୁ ଏହି ଜଘନ୍ୟ ଅପରାଧର ମୂଲ୍ୟ ଦେବାକୁ ପଡ଼ିବ। ତାଙ୍କ ବିରୁଦ୍ଧରେ କଡ଼ା ଧାରା ଲଗାଯାଇଛି।” ପୁଲିସ୍‌ ହତ୍ୟା ମାମଲା ରୁଜୁ କରିଛି ଏବଂ ଅଧିକ ତଦନ୍ତ ଜାରି ରହିଛି।