୧୦୦ରୁ ଅଧିକ ମହିଳାଙ୍କୁ ଦୁଷ୍କର୍ମ କରି ଭିଡିଓ କଲେ; ଏବେ ଜେଲ୍‌ରେ

ହରିୟାଣାର ଫତେହାବାଦର ଟୋହାନାରେ ଜଣେ ବାବାଙ୍କ ଦୁଷ୍କର୍ମ ମାମଲା ସାମ୍ନାକୁ ଆସିଛି। ଏ ହେଉଛନ୍ତି ସେହି ବାବା ଯିଏ ୧୦୦ ରୁ ଅଧିକ ମହିଳାଙ୍କୁ ଦୁଷ୍କର୍ମ କରିବା ଏବଂ ସେମାନଙ୍କ ଭିଡିଓ କରିବା ଅଭିଯୋଗରେ ଏକ ଫାଷ୍ଟ-ଟ୍ରାକ୍ ସ୍ୱତନ୍ତ୍ର କୋର୍ଟ ଦ୍ୱାରା ଦୋଷୀ ସାବ୍ୟସ୍ତ ହୋଇଛନ୍ତି।

ତନ୍ତ୍ର-ମନ୍ତ୍ର ବାହାନାରେ ମହିଳାଙ୍କୁ ନିଶା ଦେଇ ସେମାନଙ୍କ ସହ ଦୁଷ୍କର୍ମ କରି ଅଶ୍ଳୀଳ ଭିଡିଓ କରିବା ନେଇ ଅତିରିକ୍ତ ଜିଲ୍ଲା ତଥା ସେସନ୍ସ ଜଜ୍ ତଥା ଫାଷ୍ଟ ଟ୍ରାକ୍ କୋର୍ଟର ଜଜ୍ ବଲୱନ୍ତ ସିଂହ ଜଲେବୀ ବାବାଙ୍କୁ ଦୋଷୀ ସାବ୍ୟସ୍ତ କରିଛନ୍ତି।

ମହିଳାଙ୍କୁ ଦୁଷ୍କର୍ମ ମାମଲାରେ ଜଲେବୀ ବାବାଙ୍କୁ ଦୋଷୀ ସାବ୍ୟସ୍ତ କରି ପୋସ୍କୋ ଆକ୍ଟରେ କୋର୍ଟ ତାଙ୍କୁ ୧୪ ବର୍ଷ, ଦୁଷ୍କର୍ମ ମାମଲାରେ ୭ ବର୍ଷ ଏବଂ ଆଇଟି ଆକ୍ଟରେ ୫ ବର୍ଷ ଦଣ୍ଡିତ କରିଥିବାବେଳେ ତାଙ୍କୁ ୩୫,୦୦୦ ଟଙ୍କା ଜରିମାନା କରାଯାଇଛି। ଜରିମାନା ନଦେଲେ ଦୁଇ ବର୍ଷର ଅତିରିକ୍ତ ଦଣ୍ଡ ଭୋଗିବାକୁ ପଡ଼ିବ। ସମସ୍ତ ଦଣ୍ଡ ଏକାସାଙ୍ଗରେ ଚାଲିବ।

ସୂଚନାଯୋଗ୍ୟ ଯେ ଜୁଲାଇ ୨୦୧୮ରେ ବାବାଙ୍କର ଏକ ଭିଡିଓ ଭାଇରାଲ୍‌ ହୋଇଥିଲା ଯେଉଁଥିରେ ସେ ଜଣେ ମହିଳାଙ୍କୁ ଦୁଷ୍କର୍ମ କରୁଥିବା ଦେଖିବାକୁ ମିଳିଥିଲା। ଭିଡିଓ ଭାଇରାଲ୍‌ ହେବା ମାତ୍ରେ ଟୋହାନାରେ ବିରୋଧର ସ୍ୱର ବ୍ୟାପିଗଲା ଏବଂ ଲୋକମାନେ ବାବାଙ୍କ ବିରୋଧରେ ସ୍ୱର ଉଠେଇବା ଆରମ୍ଭ କଲେ।

ଅଧିକ ପଢ଼ନ୍ତୁ: ଦୁଷ୍କର୍ମ ଅଭିଯୋଗରେ ବନ୍ଧା ହେଲେ ‘ମିର୍ଚି ବାବା’, ସନ୍ତାନ ପ୍ରାପ୍ତି ପାଇଁ ବାବାଙ୍କ ପାଖକୁ ଆସିଥିଲେ ମହିଳା

ଜୁଲାଇ ୧୯, ୨୦୧୮ରେ ଟୋହାନା ନଗର ପୋଲିସ ଷ୍ଟେସନ୍‌ର ତତ୍କାଳୀନ ଦାୟିତ୍ୱରେ ଥିବା ପ୍ରଦୀପ କୁମାରଙ୍କ ଅଭିଯୋଗରେ ଟୋହାନା ପୋଲିସ ଦୁଷ୍କର୍ମ, ପୋସ୍କୋ ଆକ୍ଟ ସମେତ ବିଭିନ୍ନ ବିଭାଗରେ ବାବା ଅମର ପୁରୀ ବା ବିଲୁରାମ ଛଦ୍ମନାମ ଜଲେବୀ ବାବାଙ୍କ ବିରୋଧରେ ମାମଲା ରୁଜୁ କରିଥିଲା।

ଏହା ପରେ ପୋଲିସ ଅଭିଯୁକ୍ତ ବାବାଙ୍କୁ ଗିରଫ କରିଥିଲା ​​ଏବଂ ତାଙ୍କ ଘରୁ ଅଫିମ, ବନ୍ଧୁକ ଏବଂ ଅନ୍ୟାନ୍ୟ ଆପତ୍ତିଜନକ ଜିନିଷ ଜବତ କରାଯାଇଥିଲା। ୧୦୦ ଜଣରୁ ଅଧିକ ମହିଳାଙ୍କ ସହ ବାବାଙ୍କ ସମ୍ପର୍କ ଥିବା ଭିଡିଓ ମଧ୍ୟ ପୋଲିସ ଉଦ୍ଧାର କରିଛି। ଜାନୁଆରୀ ୫ ରେ ତାଙ୍କୁ କୋର୍ଟ ଦୋଷୀ ସାବ୍ୟସ୍ତ କରିଥିଲେ।

ବାବାଙ୍କଠାରୁ ୧୨୦ଟି ଭିଡିଓ ଜବତ:

ଖବର ଅନୁଯାୟୀ, ଜଲେବୀ ବାବା ଭିଡିଓ କ୍ଲିପ୍‌ଗୁଡିକ ବ୍ୟବହାର କରି ମହିଳାମାନଙ୍କୁ ଶୋଷଣ ଏବଂ ବ୍ଲାକ୍‌ମେଲ୍‌ କରୁଥିଲେ। ଏକ ଭିଡିଓ ଭାଇରାଲ୍‌ ହେବା ପରେ ଟୋହାନା ପୋଲିସ ତାଙ୍କ ବିରୋଧରେ ୧୯ ଜୁଲାଇ ୨୦୧୮ରେ ଏକ ମାମଲା ରୁଜୁ କରିଥିଲା। ଯେତେବେଳେ ପୋଲିସ ଅନୁସନ୍ଧାନ କଲା, ବାବାଙ୍କ ଠାରୁ ପ୍ରାୟ ୧୨୦ଟି ଭିଡିଓ କ୍ଲିପ୍ ମିଳିଥିଲା, ଯାହା ବିଭିନ୍ନ ମହିଳାଙ୍କ ଥିଲା। ଏହି ସମସ୍ତ ଭିଡିଓ କେବଳ ବାବାଙ୍କ ମୋବାଇଲ୍‌ରୁ ସୁଟ୍ କରାଯାଇଥିଲା।

କିଏ ଏହି ଜଲେବୀ ବାବା:

ଜଲେବୀ ବାବା ପଞ୍ଜାବର ମନସା ସହରରୁ ପ୍ରାୟ ୨୩ ବର୍ଷ ପୂର୍ବେ ଟୋହାନକୁ ଆସିଥିଲେ। ତାଙ୍କ ପତ୍ନୀଙ୍କର ମୃତ୍ୟୁ ହୋଇଥିବା ବେଳେ ବାବାଙ୍କର ୪ ଝିଅ ଏବଂ ୨ ପୁଅ ଅଛନ୍ତି। ବାବା ପ୍ରଥମ ୧୩ ବର୍ଷ ପାଇଁ ଏକ ଜଲେବି ଷ୍ଟଲ୍ ଚଳାଉଥିଲେ। ସେହି ସମୟରେ ସେ ଏକ ତାନ୍ତ୍ରିକଙ୍କୁ ଭେଟିଥିଲେ।

ଅମରବୀର ସେହି ତାନ୍ତ୍ରିକଙ୍କ ଠାରୁ ତନ୍ତ୍ର-ମନ୍ତ୍ର ଶିକ୍ଷା କରି ସହରରୁ ଅଦୃଶ୍ୟ ହୋଇ ହରିୟାଣାର ଟୋହାନାରେ ରହିବାକୁ ଲାଗିଲେ। ଏଠାରେ ସେ ଅନେକ ମହିଳାଙ୍କୁ ତାଙ୍କ ଜାଲରେ ପକାଇଥିଲେ। ୨୦୧୮ ମସିହାରେ ତାଙ୍କର ଜଣେ ପରିଚିତଙ୍କ ପତ୍ନୀ ମନ୍ଦିର ଭିତରେ ଦୁଷ୍କର୍ମ କରବା ନେଇ ବାବାଙ୍କ ବିରୋଧରେ ଅଭିଯୋଗ କରିଥିଲେ, କିନ୍ତୁ ପରେ ସେ ଜାମିନ ପାଇଥିଲେ। କିନ୍ତୁ ବର୍ତ୍ତମାନ ବାବା ୧୦୦ରୁ ଅଧିକ ମହିଳାଙ୍କୁ ଦୁଷ୍କର୍ମ ମାମଲାରେ ଦୋଷୀ ସାବ୍ୟସ୍ତ ହୋଇଛନ୍ତି।