ବଦଳିନି ମାନସିକତା କି ଚିନ୍ତାଧାରା; ଆଜି ବି ଅଲୋଡ଼ା ଶିଶୁ କନ୍ୟା

ଗୋଟିଏ ପଟେ ଆଜି ବିଶ୍ୱ କନ୍ୟା ସନ୍ତାନ ଦିବସ ପାଳନ କରୁଥିବାବେଳେ ଆମ ରାଜ୍ୟରୁ କିନ୍ତୁ ମିଳିଚାଲିଛି ଗୋଟିଏ ପରେ ଗୋଟିଏ କନ୍ୟା ସନ୍ତାନକୁ ଅବହେଳା ଓ ଉପେକ୍ଷାର ଖବର । ଯାଜପୁର ଟମକା ଥାନା ଚମ୍ପାଝର ପାର୍କ ନିକଟ ବସ୍ତିରେ ଜଣେ ଜନ୍ମଦାତ୍ରୀ ମାଆ ନିଜର ୩ଦିନ ଶିଶୁ କନ୍ୟାକୁ ଗଳା ଚିପି ହତ୍ୟା କରିଥିବା ଅଭିଯୋଗ ଆସିଛି । ଦ୍ୱିତୀୟ ସନ୍ତାନ ଭାବେ କନ୍ୟା ଜନ୍ମ ହେବାରୁ ରବୀନ୍ଦ୍ର ମହାନ୍ତ ନାମକ ବ୍ୟକ୍ତିଙ୍କ ପତ୍ନୀଙ୍କୁ ପୋଲିସ୍ ଗିରଫ କରି ଖୋଳତାଡ଼ ଚଳାଇଛି ।

ସେପଟେ ସୁନ୍ଦରଗଡ଼ ଭସ୍ମା ଥାନା ମୁକ୍ତିଢିପାରେ ଏକ ବୁଦାମୂଳରୁ ପରିତ୍ୟକ୍ତ ଅବସ୍ଥାରେ ଉଦ୍ଧାର ହୋଇଛି ଶିଶୁକନ୍ୟା । ତେବେ ଜନ୍ମଦେଇ ଫେରାର ଥିବା ମାଆକୁ ପରେ ଲୋକେ ଠାବ କରି ଉଭୟଙ୍କୁ ମେଡିକାଲରେ ଭର୍ତ୍ତି କରିଛନ୍ତି ସ୍ଥାନୀୟ ଲୋକେ । ମରିଗଲା ମା’ର ମମତା। ଶିଶୁକନ୍ୟାକୁ ପ୍ରସବ କରିବାର ମାତ୍ର କେଇ ମୂହୁର୍ତ୍ତ ପରେ ସବୁ ସମ୍ପର୍କ ତୁଟାଇ କନ୍ୟା ରତ୍ନକୁ ମରଣ ମୁହଁକୁ ଠେଲି ଦେଲା ମାଆ । ବୁଦା ମୂଳେ ନବଜାତ ଶିଶୁକନ୍ୟାକୁ ଜନ୍ମ ଦେଇ ଛାଡ଼ି ପଳାଇଥିଲା । ଶେଷରେ ପୁଲିସ ହାତରେ ଧରାପଡ଼ିଲା ମାଆ ।

ସେହିପରି ଭଦ୍ରକ ଚାନ୍ଦବାଲିରେ ଦ୍ୱିତୀୟ ସନ୍ତାନ ବି ଝିଅ ହେବାରୁ ମେଡିକାଲରେ ନବଜାତ କନ୍ୟା ଓ ସ୍ତ୍ରୀକୁ ଛାଡ଼ି ବାପା ଛୁ । ସ୍ଥାନୀୟ ମାତୋମାଳ ଅଞ୍ଚଳର ମୋହନ ସାହୁଙ୍କ ପତ୍ନୀ ଅନିମାଙ୍କର ମେଡିକାଲରେ ଏକ ଝିଅ ଜନ୍ମ ହୋଇଥିଲା । ହେଲେ ପୁଣି ଝିଅ ହେବାରୁ ମୋହନ ତାଙ୍କ ପତ୍ନୀ ଓ ଝିଅକୁ ଛାଡ଼ି ନିଜ ଘରକୁ ପଳାଇଛନ୍ତି । ପରେ ଅନିମାଙ୍କ ବାପ ଘର ଲୋକେ ଶିଶୁ କନ୍ୟା ଓ ତା ମାଆକୁ ଘରକୁ ନେଇଛନ୍ତି ।