ରାତିରେ ସ୍ତ୍ରୀ ଘରଛାଡ଼ି ପଳାଇଲା, ସ୍ୱାମୀ ଅତ୍ୟଧିକ ମଦ ପିଇ ରେଲୱେ ଓଭରବ୍ରିଜରୁ...

ମୁକେଶ ନାମକ ଜଣେ ୨୮ ବର୍ଷୀୟ ଯୁବକ ଦୁଃଖରେ ପତ୍ନୀ ପାଇଁ ଗୀତ ଗାଇଲେ । ତା ପରେ ରେଲୱେ ଓଭରବ୍ରିଜରୁ ତଳକୁ ଡେଇଁପଡିଲେ । ସେ ଆତ୍ମହତ୍ୟା କରିବାକୁ ଚେଷ୍ଟା କରିଥିଲେ । ସେ ସୌଭାଗ୍ୟକ୍ରମେ ବଞ୍ଚିଯାଇଛନ୍ତି । ଡାକ୍ତରଖାନାରେ ଏବେ ଚିକିତ୍ସିତ ହେଉଛନ୍ତି । ଏହା ଏକ ଦୁଃଖଦ ଘଟଣା ଭାବେ ଚର୍ଚ୍ଚାରେ ରହିଛି। ଏହି ଘଟଣା ଗତ ୨୭ ତାରିଖରେ ଗ୍ୱାଲିଅରରେ ଘଟିଛି ।

ମୁକେଶ ନାମକ ଏହି ଯୁବକଙ୍କର ରାତିରେ ତାଙ୍କ ସ୍ତ୍ରୀ ସହ ଝଗଡା ହୋଇଥିଲା। ଝଗଡା ପରେ ତାଙ୍କ ସ୍ତ୍ରୀ ରାଗରେ ଘର ଛାଡି ଚାଲିଯାଇଥିଲେ। ମୁକେଶ ସାରା ରାତି ତାଙ୍କୁ ଖୋଜିଥିଲେ, କିନ୍ତୁ ସେ ତାଙ୍କୁ ପାଇ ନଥିଲେ। ସକାଳେ ମଧ୍ୟ ସ୍ତ୍ରୀଙ୍କୁ ନପାଇ ମୁକେଶ ଅତ୍ୟଧିକ ମଦ୍ୟପାନ କରିଥିଲେ। ମଦ୍ୟପାନ କରି ସେ ବିର୍ଲାନଗର ରେଲୱେ ଷ୍ଟେସନ ଓଭରବ୍ରିଜକୁ ଯାଇଥିଲେ। ପ୍ରତ୍ୟକ୍ଷଦର୍ଶୀଙ୍କ କହିବା ଅନୁସାରେ, ଓଭରବ୍ରିଜରୁ ଡେଇଁବା ପୂର୍ବରୁ ମୁକେଶ ବଲିଉଡ ଗୀତ “ତୁଝକୋ ପୁକାରେ ମେରା ପ୍ୟାର” ଗାଇଥିଲେ। ଏହାପରେ ସେ ପ୍ରାୟ ୩୫ ଫୁଟ ଉଚ୍ଚ ଓଭରବ୍ରିଜରୁ ଡେଇଁପଡ଼ିଥିଲେ।

ଘଟଣା ସମ୍ପର୍କରେ ସୂଚନା ପାଇବା ପରେ ରେଲୱେ ପୋଲିସ ଘଟଣାସ୍ଥଳରେ ପହଞ୍ଚି ମୁକେଶଙ୍କୁ ନିକଟସ୍ଥ ହସ୍ପିଟାଲରେ ଭର୍ତ୍ତି କରିଥିଲେ। ଚିକିତ୍ସା ଅବସ୍ଥାରେ ତାଙ୍କର ସ୍ଥିତି ଗୁରୁତର ଥିବା ଜଣାପଡ଼ିଥିଲା। ପୋଲିସ ଏହି ଘଟଣାକୁ ଏକ ଆତ୍ମହତ୍ୟା ଉଦ୍ୟମ ମାମଲା ଭାବେ ରୁଜୁ କରି ତଦନ୍ତ ଆରମ୍ଭ କରିଛି। ନିଶାଗ୍ରସ୍ତ ଅବସ୍ଥାରେ ମୁକେଶ ଡେଇଁଥିଲେ ବୋଲି ପୋଲିସ କହିଛି ।

ମୁକେଶଙ୍କ ସ୍ତ୍ରୀଙ୍କ ସହ ଝଗଡା ଏବଂ ତାଙ୍କ ନିଖୋଜ ତାଙ୍କୁ ମାନସିକ ଭାବେ ବିଚଳିତ କରିଥିଲା । ଯାହା ଫଳରେ ସେ ମଦ୍ୟପାନ କରି ଏପରି ନିଷ୍ପତ୍ତି ନେଇଥିଲେ । ସୋସିଆଲ ମିଡିଆରେ ଏହି ଘଟଣା ବିଷୟରେ ବିଭିନ୍ନ ପ୍ରକାରର ମତ ପ୍ରକାଶ ପାଇଛି । କେହି କେହି ଏହାକୁ ଦୁଃଖଦ ଘଟଣା ଭାବେ ଦେଖୁଛନ୍ତି ତ ପୁଣି କେହି କେହି ମାନସିକ ସ୍ୱାସ୍ଥ୍ୟ ସମ୍ପର୍କିତ ସଚେତନତାର ଆବଶ୍ୟକତା ଉପରେ ଜୋର ଦେଇଛନ୍ତି।

ଅଧିକ ପଢ଼ନ୍ତୁ: ଧର୍ମ ପରିବର୍ତ୍ତନ କରିବାକୁ ପକାଉଥିଲେ ଚାପ, ମାମଲା ରୁଜୁ ପରେ ଫେରାର୍