Radhika Yadav Murder: ରାଧିକାଙ୍କ ସହ ସମ୍ପର୍କ ନେଇ ମୁହଁ ଖୋଲିଲେ ଅଭିନେତା, ମ୍ୟୁଜିକ୍‌ ଭିଡିଓରେ ନଜର ଆସିଥିଲେ ଉଭୟ

ଟେନିସ ଖେଳାଳି ରାଧିକା ଯାଦବ ହତ୍ୟା ମାମଲା । ରାଧିକାଙ୍କ ମ୍ୟୁଜିକ୍ ଭିଡିଓ ଭାଇରାଲ ପରେ ମୁହଁ ଖୋଲିଲେ ଭିଡିଓରେ ଥିବା ଅଭିନେତା ଇନାମ-ଉଲ-ହକ୍। ଦୁବାଇରେ ଆୟୋଜିତ ଟେନିସ ପ୍ରିମିୟର ଲିଗ୍‌ରେ ରାଧିକାଙ୍କ ସହ ଦେଖା ହୋଇଥିବା କହିଛନ୍ତି, "ଇନାମ । ଏହା ପରେ ଉଭୟ ଏକ ମ୍ୟୁଜିକ୍ ଭିଡିଓ ସୁଟ୍‌ କରିଥିବା କଥା ସେ କହିଛନ୍ତି ।" 

ଇନାମ-ଉଲ-ହକ୍ ଏହା ମଧ୍ୟ କହିଛନ୍ତି, "ମୋର ତାଙ୍କ ସହ କୌଣସି ବ୍ୟକ୍ତିଗତ ସମ୍ପର୍କ ନାହିଁ । କେବଳ ପ୍ରଫେସନାଲ କାମ ପାଇଁ କଥା ହୋଇଛି । ମୁଁ ତାଙ୍କୁ ଜଣେ ଅଭିନେତ୍ରୀ ଭାବେ ଜାଣିଛି । ସେହି ଭିଡିଓଟି ପାଇଁ କୌଣସି ଟଙ୍କା ବି ମିଳିନଥିଲା । ପରେ ଆମେ ପରସ୍ପରକୁ ଆଉ ଯୋଗାଯୋଗ ବି କରିନାହୁଁ ।"

ସୂଚନାଯୋଗ୍ୟ, ଗୁରୁବାର ଟେନିସ ଖେଳାଳି ରାଧିକା ଯାଦବଙ୍କୁ ଗୁଳିକରି ହତ୍ୟା କରାଯାଇଛି । ରାଧିକାଙ୍କ ବାପା ଦୀପକ ଯାଦବ ତାଙ୍କ ଉପରକୁ ୩ ରାଉଣ୍ଡ ଗୁଳି ଚଳାଇଥିଲେ । ଏହାପରେ ରାଧିକାଙ୍କୁ ଗୁରୁତର ଅବସ୍ଥାରେ ହସ୍ପିଟାଲ ନିଆଯାଇଥିଲା । ହେଲେ ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଛି । ମାମଲାର ଛାନଭିନ ଜାରି ରହିଛି । ପୋଷ୍ଟମର୍ଟମରୁ ଜଣାପଡ଼ିଛି ଯେ, ରାଧିକାଙ୍କ ପଛପଟେ ୩ ଟି ଗୁଳି ବାଜିଛି । ରାଧିକା ଏକ ଟେନିସ ଏକାଡେମୀ କରିଥିବାବେଳେ ଏହାକୁ ବିରୋଧ କରିଆସୁଥିଲେ ବାପା । ସାଙ୍ଗସାଥୀଙ୍କ ଟାହିଟାପରା ସହିନପାରି ଝିଅକୁ ହତ୍ୟା କରିଥିବା ସ୍ୱୀକାର କରିଛି ଅଭିଯୁକ୍ତ ଦୀପକ ଯାଦବ । 

ଅଧିକ ପଢନ୍ତୁ: ହତ୍ୟାର ୩ ଦିନ ପୂର୍ବରୁ ଧମକ ଦେଇଥିଲେ ରାଧିକାଙ୍କ ବାପା