ହୋମଗାର୍ଡଙ୍କୁ ନିର୍ଯାତନା ମାମଲା; ମାମଲା ରୁଜୁ କଲେ ରାଜ୍ୟ ମହିଳା କମିଶନ

ମହିଳା ହୋମଗାର୍ଡ ସୈରିନ୍ଦ୍ରୀ ସାହୁଙ୍କୁ ନିର୍ଯାତନା ଅଭିଯୋଗ ମାମଲାରେ ବଢ଼ିବ କି DIG ବ୍ରିଜେଶ ରାୟଙ୍କ ଅଡୁଆ ? ରାଷ୍ଟ୍ରପତି, ରାଜ୍ୟପାଳ ଏବଂ ମୁଖ୍ୟମନ୍ତ୍ରୀଙ୍କ ଯାଏଁ ମାମଲା ପହଞ୍ଚି ଥିବାରୁ ହେବ କି ବଡ଼ କାର୍ଯ୍ୟାନୁଷ୍ଠାନ ? ଏଭଳି ନାନା ଆଶା ଆଉ ଆଶଙ୍କା ଭିତରେ ରାଜ୍ୟ ପୋଲିସ ବିଭାଗରେ ଏବେ କମ୍ପନ । ଅନୁଗୁଳ ଏସ.ପି.ଙ୍କୁ ପ୍ରାରମ୍ଭିକ ରିପୋର୍ଟ ମାଗିଛନ୍ତି ହୋମଗାର୍ଡ ଡିଜି ସୁଧାଂଶୁ ଷଡ଼ଙ୍ଗୀ ।

ହୋମଗାର୍ଡ ଡିଜିଙ୍କ କାର୍ଯ୍ୟାଳୟ ପକ୍ଷରୁ ମିଳିଥିବା ସୂଚନା ଅନୁଯାୟୀ, ସୁସ୍ଥ ହେବା ପରେ ମହିଳା ହୋମଗାର୍ଡ ସୈରିନ୍ଦ୍ରୀ ସାହୁଙ୍କୁ ପଚରାଉଚରା କରାଯିବ । ସଂପୂର୍ଣ୍ଣ ଚିକିତ୍ସା ରାଜ୍ୟ  ସରକାର ବହନ କରିବେ । ଆବଶ୍ୟକ ହେଲେ ତାଙ୍କ ଝିଅକୁ ହୋମଗାର୍ଡରେ ଥଇଥାନ କରାଯିବ । ଅପରପକ୍ଷେ ନିଜ ଆଡୁ ମାମଲା ରୁଜୁ କରି ରିପୋର୍ଟ ତଲବ କରିଛନ୍ତି ରାଜ୍ୟ ମହିଳା କମିଶନ । ୧୫ ଦିନ ଭିତରେ ତଦନ୍ତ କରି ମହିଳା ଅପରାଧ ନିରୋଧି ସେଲ୍ ADGଙ୍କୁ ରିପୋର୍ଟ ଦେବାକୁ ନିର୍ଦ୍ଦେଶ ଦେଇଛନ୍ତି ।

ଏହି ଘଟଣା ପରେ ଏବେ ପୁଣି ତାଜା ହୋଇଛି ରାଜ୍ୟର IPS ଅଫିସର ମାନଙ୍କ ଘରେ ନିଯୁକ୍ତ ହୋମଗାର୍ଡଙ୍କୁ ନିର୍ଯାତନାର ପୁରୁଣା ମାମଲା । ଏ ହେଉଛନ୍ତି, ଭୁବନେଶ୍ୱର କମିଶନରେଟ ପୋଲିସରେ କାର୍ଯ୍ୟରତ ହୋମଗାର୍ଡ ସ୍ୱପ୍ନା ସେନ୍ । ତାଙ୍କ ଅଭିଯୋଗ, ମହିଳା ଥାନାର ଜଣେ ତତ୍କାଳୀନ ଆଇଆଇସିଙ୍କ ଦ୍ୱାରା ନିର୍ଯାତନାର ଶୀକାର ହୋଇଥିଲେ । ବ୍ୟକ୍ତିଗତ କାମ କରିବାକୁ କହିଥିଲେ, ନଶୁଣିବାରୁ ଚାକିରୀରୁ ବହିଷ୍କାର କରିଦେଇଥିଲେ । ଅବଶ୍ୟ ବିଭିନ୍ନ ଫୋରମର ଦ୍ୱାରସ୍ଥ ହେବା ପରେ ପରବର୍ତ୍ତୀ ସମୟରେ ଫେରିପାଇଥିଲେ ଚାକିରୀ ।

କେବଳ ସୈରିନ୍ଦ୍ରୀ କି ସ୍ୱପ୍ନା ନୁହଁନ୍ତି । ରାଜ୍ୟର ଆଇପିଏସ୍ ଅଧିକାରୀ ମାନଙ୍କ ଘରେ ନିଯୁକ୍ତ ଏକାଧିକ ହୋମଗାର୍ଡ ନିର୍ଯାତନାର ଅଭିଯୋଗ ଆଣି ଗୃହ ବିଭାଗକୁ କାଠଗଡ଼ାରେ ଛିଡ଼ା କରାଇଛନ୍ତି । ମିଳିଥିବା ସୂଚନା ଅନୁଯାୟୀ, ରାଜ୍ୟରେ ଅଛନ୍ତି ୧୫,୭୦୮ ଜଣ ହୋମଗାର୍ଡ । ରାଜ୍ୟ ହୋମଗାର୍ଡ ସର୍ଭିସ୍ ରୁଲ୍ ଅନୁସାରେ ଏମାନେ ଆଇନଶୃଙ୍ଖଳା, ଟ୍ରାଫିକ ନିୟନ୍ତ୍ରଣ ସହ ଆପାତକାଳୀନ ସମୟରେ ନିଯୁକ୍ତି ପାଇଥାନ୍ତି । ଏପରିକି ଡିଜି, ଡିଆଇଜି ଏବଂ ଏସପିଙ୍କ ମାନଙ୍କ ସରକାରୀ ବାସଭବନରେ ସରକାରୀ କାମ ପାଇଁ ବି ଏମାନଙ୍କୁ ନିଯୁକ୍ତ କରାଯାଇଥାଏ । ଯଥା, ଫାଇଲ୍ ନେବା ଆଣିବା, ପିଇବା ପାଣି ଦେବା, ସରକାରୀ ବାସଭବନ ଓ ଅଧିକାରୀଙ୍କ ସୁରକ୍ଷା ସହ ବଗିଚା ଆଦିରେ କାମ କରିବା । କିନ୍ତୁ ଘରୋଇ କିମ୍ବା ବ୍ୟକ୍ତିଗତ କାମ କରାଇବା ଆଇନ ବିରୋଧୀ ।

ତେବେ ସ୍ୱାଧୀନତାର ୭୭ ବର୍ଷ ପରେ ବି କାହିଁକି ବ୍ରିଟିଶ୍ ଅମଳର କୁତ୍ସିତ ପ୍ରଥା ଜାରି ରହିଛି ? ହୋମଗାର୍ଡଙ୍କୁ ନିର୍ଯାତନା ଘଟଣା ବାରମ୍ବାର ସାମ୍ନାକୁ ଆସୁଥିଲେ ବି କାହିଁକି ଚୁପ୍ ଗୃହ ବିଭାଗ ? କାହିଁକି ଏ ସଂକାନ୍ତରେ କୌଣସି ନିର୍ଦ୍ଦେଶନାମା ଜାରି କରାଯାଉନି କି ଦୃଷ୍ଟାନ୍ତମୂଳକ ପଦକ୍ଷେପ ନିଆଯାଉନି ? ଏବେ DIG ବ୍ରିଜେଶ ରାୟଙ୍କ ଘରେ ଯେଉଁ ଘଟଣା ଘଟିଥିବା ଅଭିଯୋଗ ଆସିଛି, କାହିଁକି ଏଯାଏଁ ହୋଇନି ଆଇନଗତ କାର୍ଯ୍ୟାନୁଷ୍ଠାନ ? ତାକୁ ନେଇ ନାନା ପ୍ରଶ୍ନ ଉଠୁଥିବାବେଳେ ଗତକାଲି ନିର୍ଯାତନା ଅଭିଯୋଗ ଖଣ୍ଡନ କରିଥିଲେ ଡିଆଇଜି ବ୍ରିଜେଶ ରାୟ ।

ସେପଟେ ଏହି ଘଟଣାରେ ରାଜ୍ୟ ସରକାରଙ୍କୁ ରିପୋର୍ଟ ତଲବ କରିଛନ୍ତି ଜାତୀୟ ମାନବାଧିକାର କମିଶନ । ରାଜ୍ୟ ଗୃହ ସଚିବ ଓ ପୋଲିସ ଡିଜି ପ୍ରମୁଖଙ୍କୁ ରିପୋର୍ଟ ତଲବ କରିଛନ୍ତି । ହୋମଗାର୍ଡ ସୌରିନ୍ଦି ସାହୁଙ୍କ ମାମଲାରେ କି ପଦକ୍ଷେପ ନିଆଯାଇଛି, ସେନେଇ ତଦନ୍ତ କରି ରିପୋର୍ଟ ଦେବାକୁ କହିଛନ୍ତି । ଆସନ୍ତା ୪ ସପ୍ତାହ ଭିତରେ ତଦନ୍ତ କରି ରିପୋର୍ଟ ଦେବାକୁ ଏହି ସମସ୍ତଙ୍କୁ ନିର୍ଦ୍ଦେଶ ଦେଇଛନ୍ତି ଜାତୀୟ ମାନବାଧିକାର କମିଶନ ।

ମହିଳା ହୋମଗାର୍ଡଙ୍କ ଆତ୍ମହତ୍ୟା ଉଦ୍ୟମ ଘଟଣାରେ ରାଜ୍ୟପାଳଙ୍କୁ ଭେଟିଲା ବିଜେପି । ରାଜ୍ୟପାଳଙ୍କୁ ଭେଟି ଡିଆଇଜି ଓ ତାଙ୍କ ପତ୍ନୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଛନ୍ତି ବିଜେପି ନେତ୍ରୀ ଲେଖାଶ୍ରୀ ସାମନ୍ତସିଂହାର । ହୋମଗାର୍ଡଙ୍କ ଦୁଇ ଝିଅଙ୍କୁ ଚାକିରି ଓ ପରିବାର ଥଇଥାନ କରାଯାଉ । DIGଙ୍କୁ ବଦଳି କରି ଘଟଣା ଚାପି ଦେବାକୁ ସରକାର ଚେଷ୍ଟା କରିଥିବା ଅଭିଯୋଗ କରିଛନ୍ତି । ଡିଆଇଜି ଓ ତାଙ୍କ ପତ୍ନୀଙ୍କୁ ଖସେଇ ଦେବାକୁ ପ୍ରଶାସନ ଲାଗିଛି । ତେଣୁ ଉଭୟଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ହେଉ ଏବଂ ପରିବାରକୁ ନ୍ୟାୟ ମିଳୁ ବୋଲି କହିଛି ବିଜେପି ।

ସେହିପରି କଂଗ୍ରେସ ବି ଏନେଇ ରାଜ୍ୟ ସରକାରଙ୍କୁ ଘେରିଛି । ଡିଆଇଜିଙ୍କୁ ନିଲମ୍ବିତ କରାଯାଇ ତାଙ୍କ ସ୍ତ୍ରୀଙ୍କ ବିରୋଧରେ ଅପରାଧିକ ମାମଲା ରୁଜୁ କରାଯାଉ ବୋଲି ଦାବି କରିଛନ୍ତି ବରିଷ୍ଠ କଂଗ୍ରେସ ନେତା ତାରାପ୍ରସାଦ ବାହିନୀପତି । ସେପଟେ ଘଟଣାରେ ପ୍ରତିକ୍ରିୟା ରଖିଛି ବିଜେଡି ।