ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟରୁ ଆସିଛି ଡାକରା; ଦିଲ୍ଲୀ ଯିବେ ଓଡ଼ିଆ ଚାଷୀ

ଦିଲ୍ଲୀ ଯିବେ, ଲାଲକିଲ୍ଲାରେ ସ୍ୱାଧୀନତା ଦିବସ କାର୍ଯ୍ୟକ୍ରମକୁ ପାଖରୁ ଦେଖିବେ । ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟରୁ ଏଥିପାଇଁ ଡାକରା ଆସିଛି । ଚାଷୀ, ଏସଏଚଜି ସଦସ୍ୟ, ମହିଳା ବ୍ୟବସାୟୀ ଏମିତି ବିଭିନ୍ନ ଉଲ୍ଲେଖନୀୟ କାର୍ଯ୍ୟ ଓ ଦକ୍ଷତା ସମ୍ପନ୍ନ ବ୍ୟକ୍ତିଙ୍କୁ ମିଳିଛି ନିମନ୍ତ୍ରଣ । ଏହି ଖବର ଗାଁରେ ପହଞ୍ଚିବା ପରେ ଖେଳି ଯାଇଛି ଖୁସିର ସମ୍ଭାର ।

ସେ ଚାଷୀ, ଚାଷ ତାଙ୍କ ବେଉସା, ଚାଷ ତାଙ୍କ ଭରସା । ଆଉ ଏହି ଚାଷ ହିଁ ତାଙ୍କୁ ଆଜି ପରିଚୟ ଦେଇଛି । ଦିଲ୍ଲୀ ଯିବେ ସୁବର୍ଣ୍ଣପୁର ଖଇରଟିକ୍ରା ଗାଁର ସନ୍ତୋଷିନୀ ମିଶ୍ର । ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟରୁ ତାଙ୍କୁ ଡକରା ହୋଇଛି, ସ୍ୱାଧୀନତା ଦିବସରେ ସେ ଲାଲକିଲ୍ଲାରେ ଯୋଗଦେବେ । ଆଉ ଏହି ଖବର ପହଞ୍ଚିବା ପରେ ଖୁସି କାହିଁକିରେ କଣ । ଖଇରଟିକ୍ରା ଗାଁରେ ପ୍ରାୟ ୬ ଏକର ଜମିରେ ଜୈବିକ ପ୍ରଦ୍ଧତିରେ ଚାଷ କରନ୍ତି ସନ୍ତୋଷିନୀ ।

ବର୍ଷକ ବାରମାସ ତାଙ୍କ କ୍ଷେତରେ କିଛି ନା କିଛି ଚାଷ ହେଉଥାଏ । ସନ୍ତୋଷିନୀ ଏହି ଚାଷ ଜମିରୁ ନିଜର ପରିବାର ସହ ଆହୁରୀ ୬ ପରିବାରଙ୍କୁ ନିଯୁକ୍ତି ଦେଇଛନ୍ତି । ନୂଆପଡ଼ା ଜିଲ୍ଲା ସୁନାବେଡ଼ା ଗାଁର ଯୁବରାଜ ଛତ୍ରିଆ । ପ୍ରଧାନମନ୍ତ୍ରୀ କିଷାନ ନିଧି ଯୋଜନାରେ ମିଲେଟ୍ ଚାଷ କରିଛନ୍ତି । ନିଜର ଦକ୍ଷ ଚାଷ ପ୍ରଦ୍ଧତି ପାଇଁ ବେଶ୍ ଜଣାଶୁଣା ଯୁବରାଜଙ୍କୁ ବି ଦିଲ୍ଲୀ ଯିବାକୁ ନିମନ୍ତ୍ରଣ ହୋଇଛି ।

ଏଇ ଟାଇଲ୍ ଘରେ ଚାଲେ ଜୀବନ ଜୀବିକା । ମହିଳା ଏଠୁ ସ୍ୱାବଲମ୍ବୀ ହୁଅନ୍ତି, ବଲାଙ୍ଗିର ଟିଟିଲାଗଡ଼ ବ୍ଲକ ଖୋଲାନ ଗାଁର ଯାଜ୍ଞସିନି ପୁଟେଲା ସେ ବି ଯିବେ ଦିଲ୍ଳୀ, ତାଙ୍କୁ ହୋଇଛି ଡକରା । ସରକାରଙ୍କ ଯୋଜନା ତୃଣମୂଳ ସ୍ତରରେ କାର୍ଯ୍ୟକାରୀ କରିଛନ୍ତି । ସେହିପରି ତୁରେକେଲା କୃଷକ ଉତ୍ପାଦନ କମ୍ପାନିର ଏମଡି ସ୍ନିଗ୍ଧା ମେହେର । ମାତ୍ର ୬ ମାସରେ ଆଖପାଖ ଅଞ୍ଚଳର ଚାଷୀଙ୍କଠୁ ୭୭ ଲକ୍ଷ ଟଙ୍କାର କପା ସଂଗ୍ରହ କରି ମହାରାଷ୍ଟ୍ରରେ ବିକ୍ରି କରିଥିଲୋ ଯାହା ଅନ୍ୟ ଚାଷୀଙ୍କ ପାଇଁ ଉଦାହରଣ ସାଜିଥିଲା । ସେ ବି ସ୍ୱାଧୀନତାଦିବସରେ ଦିଲ୍ଲୀ କାର୍ଯ୍ୟକ୍ରମରେ ସାମିଲ ହେବେ ।

ଚାଷଠୁ ବ୍ୟବସାୟ ବିଭିନ୍ନ କ୍ଷେତ୍ରରେ ଉଲ୍ଲେଖନୀୟ କାର୍ଯ୍ୟ ଓ ଦକ୍ଷତା ପାଇଁ ରାଜ୍ୟର ଅନେକ ବ୍ୟକ୍ତିବିଶେଷ ସ୍ୱାଧୀନତା ଦିବସ କାର୍ଯ୍ୟକ୍ରମରେ ଦିଲ୍ଲୀ ଲାଲକିଲ୍ଲା ଯିବେ ।